സ്ത്രീശക്തിയുടെ കേരള മോഡലായ 'കുടുംബശ്രീ'യുടെ രജതജൂബിലി ആഘോഷത്തിന് നാളെ തലസ്ഥാനം വേദിയാകും... ചടങ്ങ് ഉദ്ഘാടനം ചെയ്യുക രാഷ്ട്രപതി ദ്രൗപദി മുര്‍മു , 'ചുവട്', 'കുടുംബശ്രീ @25' പുസ്തകത്തിന്റെ പ്രകാശനം ഗവര്‍ണര്‍ നിര്‍വഹിക്കും.

തിരുവനന്തപുരം കവടിയാര്‍ ഉദയ് പാലസ് കണ്‍വന്‍ഷന്‍ സെന്ററിലാണ് ചടങ്ങ് നടക്കുക.

പകല്‍ 11.45ന് എത്തുന്ന രാഷ്ട്രപതിയെ പൗരാവലിക്കുവേണ്ടി ഗവര്‍ണര്‍ ആരിഫ് മൊഹമ്മദ് ഖാന്‍, മുഖ്യമന്ത്രി പിണറായി വിജയന്‍ എന്നിവരുടെ നേതൃത്വത്തില്‍ സ്വീകരിക്കുകയും ചെയ്യും.കുടുംബശ്രീയുടെ തുടക്കം മുതലുള്ള സിഡിഎസ് ഭരണ സമിതി അംഗങ്ങളായ അഞ്ചു ലക്ഷംപേര്‍ ചേര്‍ന്ന് കുടുംബശ്രീയുടെ ചരിത്രമെഴുതുന്ന 'രചന'യുടെ ലോഗോ രാഷ്ട്രപതി അനാച്ഛാദനം ചെയ്യും.


പട്ടികവര്‍ഗ വിഭാഗത്തില്‍പെട്ടവരുടെ സമഗ്ര വികസനത്തിനായുള്ള 'ഉന്നതി' പദ്ധതിയുടെ ഉദ്ഘാടനവും രാഷ്ട്രപതി നിര്‍വഹിക്കും. ഐടിവകുപ്പിന്റെ നേതൃത്വത്തില്‍ മലയാളത്തിലേക്ക് പരിഭാഷപ്പെടുത്തിയ ഡിപ്ലോമ, എന്‍ജിനിയറിങ് ടെക്‌നിക്കല്‍ ബുക്കുകളുടെ ആദ്യ കോപ്പി കേരള സാങ്കേതിക സര്‍വകലാശാലയുടെ വൈസ് ചാന്‍സലര്‍ രാഷ്ട്രപതിക്ക് നല്‍കും.



തുടര്‍ന്ന് 'പ്രാദേശിക സാമ്പത്തിക വികസനത്തില്‍ സ്ത്രീകൂട്ടായ്മയുടെ പങ്ക്' എന്ന വിഷയത്തില്‍ ചര്‍ച്ച നടക്കും. വൈകിട്ട് 4.30 മുതല്‍ കുടുംബശ്രീ അംഗങ്ങളുടെ കലാപരിപാടിയും അരങ്ങേറും.