അഞ്ചല്‍ ഏറം ഉത്ര വധക്കേസിനോട് അനുബന്ധിച്ചുള്ള സ്ത്രീധന പീഡന കേസിലെ രണ്ടാം സാക്ഷിയും ഉത്രയുടെ പിതാവുമായ വിജയസേനന്റെ പ്രതിഭാഗം എതിര്‍വിസ്താരം പൂര്‍ത്തിയായി. ഈമാസം ഒന്നിനും വിസ്താരം നടന്നിട്ടുണ്ടായിരുന്നു. അന്ന് ക്രോസ് വിസ്താരം 3 മണിക്കൂറിലധികം നീണ്ടിരുന്നു.
.
നാലാം സാക്ഷിയും വിജയസേനന്റെ സഹോദര പുത്രനുമായ ശ്യാംദേവിനെ വിസ്തരിക്കാനായി പുനലൂര്‍ ജുഡീഷ്യല്‍ ഒന്നാം ക്ലാസ് മജിസ്‌ട്രേട്ട് അമ്പിളി ചന്ദ്രന്‍ കേസ് 29ന് വീണ്ടും പരിഗണിക്കും.

ഉത്രയുടെ മാതാവിനെ വിസ്തരിക്കാന്‍ പ്രതിഭാഗം അഭിഭാഷകന്‍ സമയം ആവശ്യപ്പെട്ടിട്ടുണ്ട്. ഇതിനിടെ ഉത്രയുടെ സ്വര്‍ണാഭരണങ്ങള്‍ കൊല്ലം സെഷന്‍സ് കോടതിയില്‍ നിന്നു പുനലൂര്‍ കോടതിയില്‍ എത്തിച്ചു. ഉത്രയുടെ മാതാവ് ഇനി അവ തിരിച്ചറിയേണ്ടതുണ്ട്.

ഉത്ര വധക്കേസില്‍ ഇരട്ട ജീവപര്യന്തം ശിക്ഷ ലഭിച്ച് ജയിലിലുള്ള ഭര്‍ത്താവ് സൂരജ് എസ്.കുമാര്‍, ഭര്‍തൃപിതാവ് സുരേന്ദ്ര പണിക്കര്‍, ഭര്‍തൃമാതാവ് രേണുക, സഹോദരി സൂര്യ എന്നിവരാണ് പ്രതികള്‍. നേരത്തെ ഒന്നാം സാക്ഷി ഉത്രയുടെ സഹോദരന്‍ വിഷുവിനെ 5 മണിക്കൂറിലധികം സമയമെടുത്ത് വിസ്തരിച്ചിരുന്നു.


കുറ്റപത്രം വായിച്ചു കേള്‍പ്പിക്കുന്നതിനു മുന്‍പ് തന്നെ സ്ത്രീധന നിരോധന നിയമം മൂന്നും നാലും വകുപ്പു കൂടി ഈ കേസില്‍ ഉള്‍പ്പെടുത്തണമെന്ന അന്വേഷണ ഉദ്യോഗസ്ഥന്റെ അപേക്ഷ അംഗീകരിച്ച കോടതി, കേസിന്റെ പ്രധാന ഘട്ടമായ സാക്ഷി വിസ്താരത്തിലേക്ക് കടന്നപ്പോള്‍ ഇതിനായി കൂടുതല്‍ സമയം ആവശ്യമായി വന്നിരിക്കുകയാണ്. സൂരജ് എസ്.കുമാറിനെ ഇന്നലെ വിഡിയോ കോണ്‍ഫറന്‍സ് വഴി കോടതിയില്‍ ഹാജരാക്കി. മറ്റു പ്രതികള്‍ നേരിട്ടു ഹാജരായി.

അതേസമയം 2020 മേയ് 6ന് രാത്രി ഉറങ്ങാന്‍ കിടന്ന ഉത്രയെ പാമ്പുകടി ഏല്‍പിച്ചതിനെത്തുടര്‍ന്ന് അഞ്ചലിലെ സ്വകാര്യ ആശുപത്രിയില്‍ എത്തിക്കുകയും പിറ്റേന്നു പുലര്‍ച്ചെ മരിക്കുകയുമായിരുന്നു.