മലയാളത്തിലെ വാർത്താചാനൽ രംഗത്തെ കൂടുമാറ്റങ്ങൾ തുടരുന്നു. കൂടുതൽ പണവും മെച്ചപ്പെട്ട പദവിയും തേടി അവതാരകരും പ്രധാന റിപ്പോർട്ടർമാരും കൂടുമാറുമ്പോൾ ഈയാഴ്ച നഷ്ടമുണ്ടായിരിക്കുന്നത് മനോരമ ന്യൂസിനും മാതൃഭൂമി ന്യൂസിനുമാണ്. മനോരമാ ന്യൂസിലെ കൗണ്ടർ പോയിന്റിൻെറ അവതാരകനും ഔട്ട് പുട്ട് ഡസ്കിലെ സീനിയറുമായ അയപ്പദാസ് ചാനൽ വിട്ടു. ഡിജിറ്റൽ പ്ളാറ്റ് ഫോമായി തുടങ്ങി, സാറ്റലൈറ്റ് ചാനലായി മാറുന്ന ‘ദി ഫോർത്ത്’ വാർത്താ ചാനലിലേക്കാണ് അയ്യപ്പദാസിൻെറ ചുവടുമാറ്റം. ജോർജ്ജ് പുളിക്കൻ പോയ ഒഴിവിൽ
എക്സിക്യൂട്ടിവ് എഡിറ്ററായിട്ടാണ് അയ്യപ്പദാസ് ദി ഫോർത്തിലേക്ക് എത്തുന്നത്.
മനോരമാ ന്യൂസിൽ നിന്നും രാജി വച്ച അയ്യപ്പദാസ് ഏപ്രിൽ ആദ്യവാരത്തോടെ ദി ഫോർത്തിൽ ചുമതല ഏൽക്കും. മനോരമ ഏറ്റവും കൂടുതൽ വളർത്തുകയും മികച്ച അവസരങ്ങൾ നൽകുകയും ചെയ്തിട്ടും അയ്യപ്പദാസിൻെറ അപ്രതീക്ഷിത രാജി മാനേജ്മെന്റിന് തലവേദനയായി മാറി
അമൃതാ ടി.വിയിൽ ജോലി ചെയ്തിരുന്ന അയ്യപ്പദാസ് ചില പ്രശ്നങ്ങളെ തുടർന്ന് അവിടം വിട്ട് ഇന്ത്യാവിഷനിലെത്തുകയും അവിടെ നിന്നുമാണ് മനോരമയിലേക്ക് കൂടുമാറിയത്. ചാനലിലെ ചില അഭ്യന്തര പ്രശ്നങ്ങളെ തുടർന്നാണ് അയ്യപ്പദാസ് മനോരമാ ന്യൂസ് വിട്ടതെന്നാണ് സൂചന. 

മാതൃഭൂമി ന്യൂസിൽ നിന്ന് അനീഷ് ബർസോമും രാജിവെച്ച് ദി ഫോർത്തിൽ ചേർന്നിട്ടുണ്ട്. കുറഞ്ഞ ശമ്പളനിരക്കും എക്സിക്യൂട്ടിവ് എഡിറ്റർ രാജീവ് ദേവരാജുമായുളള അസ്വാരസ്യങ്ങളുമാണ് അനീഷിൻെറ രാജിക്ക് കാരണമെന്നാണ് മാതൃഭൂമി ന്യൂസിൽ നിന്ന് പുറത്തുവരുന്ന വിവരം.

മാതൃഭൂമിയിലെ ഗ്രാഫിക്സ് വിഭാഗം മേധാവി‌യും സീനിയർ വീഡിയോ എഡിറ്ററും രാജിവെച്ച് ദി ഫോർത്തിൽ ചേർന്നിട്ടുണ്ട്. രാജീവ് ദേവരാജ് എക്സിക്യൂട്ടിവ് എഡിറ്ററായി വന്നശേഷം നിരവധി ജേർണലിസ്റ്റുകളാണ് മാതൃഭൂമി വിട്ടത്. രാജീവ് മുൻകൈയ്യെടുത്ത് മീഡിയാ വണിൽ നിന്ന് എത്തിച്ച അഭിലാഷ് മോഹനൻ മീഡിയ വണ്ണിലേക്ക് തന്നെ മടങ്ങിപ്പോ‌യേക്കുമെന്നും സൂചനയുണ്ട്.

അതേസമയം മനോരമാ ന്യൂസ് ഡൽഹി ബ്യൂറോ ചീഫും അവതാരകയുമായ നിഷ പുരുഷോത്തമനെ കൊണ്ടുവരാൻ മാതൃഭൂമി ശ്രമം തുടങ്ങി. സംവാ​ദപരിപാടികൾ ചെയ്യാൻ നിലവിൽ മാതു സജി മാത്രമാണുളളത്. ഹാഷ്മി താജ് ഇബ്രാഹിം ശ്രീജ ശ്യാം വേണുബാലകൃഷ്ണൻ, മഞ്ജുഷ്​ഗോപാൽ എന്നിങ്ങനെ നിരവധി പേരാണ് രാജീവ് ദേവരാജിന്റെ വരവോടെ മാതൃഭൂമി വിട്ടത്. മുഖം മിനുക്കിയെത്തുന്ന റിപ്പോർട്ടർ ടി വിയിലേക്കും നിരവധി സീനിയർ ജേർണ്ണലിസ്റ്റുകളാണ് എത്തുക. ഏപ്രിലിൽ റീലോഞ്ചിനൊരുങ്ങുന്ന രാജ് ടിവിയും നിരവധി സീനിയർ ജേർണ്ണലിസ്റ്റുകളെ ചാനലിലെത്തിക്കാനുളള ശ്രമം തുടങ്ങിക്കഴിഞ്ഞു.

ബിനുപളളിമൺ