പറഞ്ഞത് പറഞ്ഞത് തന്നെ... തെരഞ്ഞെടുപ്പില് ബി.ജെ.പിയെ സഹായിക്കുമെന്ന നിലപാട് ആവര്ത്തിച്ച് തലശ്ശേരി ആര്ച്ച് ബിഷപ്പ് മാര് ജോസഫ് പാംപ്ലാനി
ബി.ജെ.പിയെക്കുറിച്ചുള്ള പ്രസ്താവനയില് അണുവിട പിന്നോട്ടില്ലെന്ന് തലശേരി അതിരൂപത ആര്ച്ച് ബിഷപ്പ് മാര് ജോസഫ് പാംപ്ലാനി. ഒരു രാഷ്ട്രീയപാര്ട്ടിയുമായും ബാന്ധവമില്ല. ഒരുപക്ഷമേയുള്ളു, അത് കര്ഷകപക്ഷമാണ്. കര്ഷകരുടെ കാര്യം പറയുമ്പോള് ഗോഷ്ടി കാണിച്ചിട്ട് കാര്യമില്ല. റബര് വില 300 രൂപയാക്കിയാല് തെരഞ്ഞെടുപ്പില് ബി.ജെ.പിയെ സഹായിക്കുമെന്ന നിലപാട് ആവര്ത്തിച്ച് തലശ്ശേരി ആര്ച്ച് ബിഷപ്പ് മാര് ജോസഫ് പാംപ്ലാനി.
റബറിന്റെ ഇറക്കുമതി തീരുവയില് തീരുമാനമുണ്ടാക്കുകയും വില 300 രൂപയാക്കുകയും ചെയ്താല് കേന്ദ്ര സര്ക്കാറിനെ പിന്തുണക്കാന് മലയോര ജനത തയാറാവും. മലയോര കര്ഷകരുടെ വികാരമാണ് യോഗത്തില് പ്രകടിപ്പിച്ചത്. ഇപ്പോള് ഞങ്ങളെ സഹായിക്കാന് നയം രൂപീകരിക്കാന് സാധിക്കുന്നത് ബി.ജെ.പിക്കാണ്. ബി.ജെ.പി സഹായിച്ചാല് തിരിച്ചു സഹായിക്കുമെന്നും ആര്ച്ച് ബിഷപ്പ് കൂട്ടിച്ചേര്ത്തു.
ആരെങ്കിലും എന്തെങ്കിലും വിളിച്ചു പറഞ്ഞാല് നയം മാറ്റുന്നവരാണ് കത്തോലിക്ക മെത്രാന്മാരെന്ന് ധരിക്കേണ്ട. തന്റെ പ്രസ്താവനയില് മതപക്ഷമോ രാഷ്ട്രീയപക്ഷമോ ഇല്ലെന്ന് പറഞ്ഞ ആര്ച്ച് ബിഷപ്പ്, കര്ഷകപക്ഷം മാത്രമേ ഉള്ളൂവെന്നും വ്യക്തമാക്കി. കര്ഷക വിഷയത്തില് നിന്ന് ശ്രദ്ധ മാറ്റാന് ആരെല്ലാം തലകുത്തി മറിഞ്ഞ് പരിശ്രമിച്ചാലും ഞങ്ങള് തയാറല്ല. പറഞ്ഞ വാക്കില് ഉറച്ച് നില്ക്കുന്നു. കര്ഷക പക്ഷത്ത് ആരെ നില്ക്കുന്നുവോ അവരുടെ പക്ഷത്തായിരിക്കും മലയോര കര്ഷകര്. ഈ വിഷയത്തില് ബി.ജെ.പി മതലെടുക്കാന് ശ്രമിക്കുന്നുണ്ടെങ്കില് അതിന് വഴിമരുന്നിട്ടത് ഏത് പാര്ട്ടിക്കാരാണെന്ന് ആലോചിച്ചു നോക്കിയാല് മനസിലാകും മാര് ജോസഫ് പാംപ്ലാനി പറഞ്ഞു.
രാഷ്ട്രീയ പാര്ട്ടി എന്ന നിലയില് ബി.ജെ.പി പല തരത്തിലുള്ള ശ്രമങ്ങള് നടത്തും. അവര് വെക്കുന്ന കല്ലില് തേങ്ങ എറിയാനോ അവര് ചെയ്ത അന്യായങ്ങളെയോ അതിക്രമങ്ങളെയോ ന്യായീകരിക്കാനോ ഞങ്ങള്ക്ക് ഉദ്ദേശമില്ല. മലയോര കര്ഷകരുടെ അതിജീവനമാണ് തങ്ങളുടെ ലക്ഷ്യമെന്നും ആര്ച്ച് ബിഷപ്പ് ചൂണ്ടിക്കാട്ടി. രാഷ്ട്രീയ നേതാക്കള്ക്ക് പക്വതയും കാര്യങ്ങള് മനസിലാക്കി പ്രതികരിക്കാനും തങ്ങളുടെ പ്രതികരണം ഉണ്ടാക്കാന് പോകുന്ന ഭവിഷ്യത്തുകളെയും കുറിച്ച് തിരിച്ചറിയാനും കഴിയണം. അപ്രകാരം ചെയ്യാതെ, ഇപ്പോള് ബി.ജെ.പിക്കാര് മുതലെടുക്കുന്നുവെന്ന് നിലവിളിച്ചാല് അതിന് ഞങ്ങള് ഉത്തരവാദിയല്ലെന്നും വിവാദമാക്കിയവരാണ് ഉത്തരവാദികളെന്നും ആര്ച്ച് ബിഷപ്പ് വ്യക്തമാക്കി.
റബര് വില 300 രൂപയാക്കി നിശ്ചയിച്ചാല് തെരഞ്ഞെടുപ്പില് ബി.ജെ.പിയെ സഹായിക്കുമെന്ന് കത്തോലിക്ക കോണ്ഗ്രസ് തലശേരി അതിരൂപത സംഘടിപ്പിച്ച കര്ഷകറാലിയിലാണ് തലശ്ശേരി ആര്ച്ച് ബിഷപ്പ് ജോസഫ് പാംപ്ലാനി വ്യക്തമാക്കിയത്. കേരളത്തില് ഒരു എം.പി പോലുമില്ലെന്ന ബി.ജെ.പിയുടെ സങ്കടം കുടിയേറ്റ ജനത പരിഹരിക്കും. ജനാധിപത്യത്തില് വോട്ടായി മാറാത്ത ഒരു പ്രതിഷേധവും പ്രതിഷേധമല്ലെന്ന ജനങ്ങള് മനസിലാക്കണം. കുടിയേറ്റ ജനതക്ക് അതിജീവനം വേണമെങ്കില് രാഷ്ട്രീയമായി പ്രതികരിക്കണമെന്നും ആര്ച്ച് ബിഷപ്പ് ചൂണ്ടിക്കാട്ടി.
https://www.facebook.com/Malayalivartha
