കൂടത്തായി കൂട്ടക്കൊലക്കേസില്‍ ജോളി തന്നോട് കുറ്റം ഏറ്റുപറഞ്ഞിരുന്നുവെന്ന് അവരുടെ സുഹൃത്ത് ജോണ്‍സണ്‍ സാക്ഷിവിസ്താരത്തില്‍ പറഞ്ഞു. ബി.എസ്.എന്‍.എല്‍. ജീവനക്കാരനായ താനുമായി ജോളിക്ക് ആഴത്തിലുള്ള ബന്ധമുണ്ടെന്നമട്ടിലാണ് കേസില്‍ ഇരുപത്തിയൊന്നാം സാക്ഷിയായ ജോണ്‍സണ്‍ പ്രത്യേക കോടതിയില്‍ മൊഴിനല്‍കി.

2019-ഒക്ടോബര്‍ നാലിനാണ് അന്വേഷണസംഘം കല്ലറപൊളിച്ചത്. ഒക്ടോബര്‍ രണ്ടിന് തന്നെ വിളിച്ചുവരുത്തി കല്ലറ പൊളിക്കുന്നത് തടയാനാവുമോയെന്ന് ജോളി ചോദിച്ചതായി ജോണ്‍സണ്‍ . അത് എന്തിനാണെന്ന് ചോദിച്ചപ്പോഴാണ് ബന്ധുക്കളുടെ മരണത്തില്‍ തനിക്കുള്ള പങ്കിനെക്കുറിച്ചും കല്ലറപൊളിച്ചാലുള്ള ഭവിഷ്യത്തിനെക്കുറിച്ചും ജോളി വെളിപ്പെടുത്തിയത്.

ശരീരഭാഗങ്ങള്‍ ഫൊറന്‍സിക് പരിശോധനയ്ക്കയച്ചാല്‍ താന്‍ കുടുങ്ങുമെന്ന് ജോളി ഭയപ്പെട്ടിട്ടുണ്ടായിരുന്നു. റോയി തോമസിന്റെ അമ്മ അന്നമ്മ തോമസിനെ വിഷം നല്‍കിയും മറ്റ് അഞ്ചുപേരെ സയനൈഡ് നല്‍കിയും കൊലപ്പെടുത്തുകയായിരുന്നുവെന്ന് ജോളി തന്നോട് വെളിപ്പെടുത്തിയിരുന്നുവെന്ന് ജോണ്‍സണ്‍ .

കല്ലറ തുറക്കുന്നതിനുമുമ്പ് മൃതദേഹാവശിഷ്ടങ്ങള്‍ മാറ്റണമെന്നായിരുന്നു ജോളിയുടെ ആവശ്യം. കുറ്റകൃത്യം പുറത്തുവരുമെന്ന് ഭയന്ന ജോളി കേസ് നടത്തണമെന്നും ജോണ്‍സനോട് ആവശ്യപ്പെട്ടിട്ടുണ്ടായിരുന്നു. അതിനായി സ്വര്‍ണാഭരണങ്ങളും ഏല്പിച്ചിരുന്നു. ഭാര്യ അറിയാതെ സ്വകാര്യമായി മറ്റൊരുനമ്പറില്‍ ജോളിയുമായി സംവദിച്ചിരുന്നുവെന്നും ജോണ്‍സണ്‍ വെളിപ്പെടുത്തി.

എന്നാല്‍, ഇതൊന്നും വിശ്വസനീയമല്ലെന്നും ഇത്രയും വലിയൊരു സത്യാവസ്ഥ വെളിപ്പെടുത്താന്‍ മാത്രം ആഴത്തിലുള്ള ബന്ധം ജോണ്‍സണുമായി ജോളിക്കുണ്ടോ എന്നും ക്രോസ്വിസ്താരം നടത്തിയ അഭിഭാഷകന്‍ ഷഹീര്‍സിങ് സംശയം പ്രകടിപ്പിച്ചു. ഒന്നാംപ്രതി ജോളിയുടെ അഭിഭാഷകന്‍ ബി.എ. ആളൂര്‍ ബുധനാഴ്ച ഹാജരായിരുന്നില്ല.