ബ്രഹ്‌മപുരത്തെ കരാറും, ഉപ കരാറും വിവാദമാവുമ്പോള്‍, സി.പി.എമ്മും കോണ്‍ഗ്രസും ഒരുപോലെ പ്രതിസന്ധിയിലാവുകണ്. ബി.ജെ.പി.യാകട്ടെ ഒറ്റവെടിക്ക് രണ്ട് കക്ഷികളെയും വീഴ്ത്താമെന്ന മോഹത്തിലാണ് കരുക്കള്‍ നീക്കുന്നത്. ബ്രഹ്‌മപുരത്ത് സി.ബി.ഐ. അന്വേഷണമെത്തുന്നത് വലിയ രാഷ്ട്രീയ നേട്ടമാകുമെന്ന വിലയിരുത്തലിലാണ് ബി.ജെ.പി. അതേ സമയത്ത് ബിഷപ്പ് പാംപ്ലാനി നടത്തിയ പ്രസ്താവനയും ബിജെപിയ്ക്ക് ഡബിള്‍ സപ്പോര്‍ട്ടാണ് നല്കിയിരിക്കുന്നത്. ബിഷപ്പിന്റെ റബ്ബര്‍ അധിഷ്ടിത പ്രസ്താവന താനേയുണ്ടായതെല്ലെന്നും ബിജെപിയ്ക്ക് കേരളത്തില്‍ പുതിയ സംവിധാനങ്ങള്‍ ഒരുക്കാമെന്ന വാഗ്ദാനമായിരുന്നെന്നും കേന്ദ്ര നേതൃത്വം വിലിയിരുത്തുന്നു. അതിന്റെ ഭാഗമായി ദേശീയ ശ്രദ്ധ ആകര്‍ഷിക്കാനാണ് പ്രകാശ് ജാവദേക്കര്‍ ഡെല്‍ഹിയില്‍ പത്രസമ്മേളനം നടത്തി ബ്രഹ്‌മപുരം വിഷയം ചര്‍ച്ചയാക്കിയത്.

അഴിമതിയാരോപണത്തിന്റെ മുന സി.പി.എമ്മിനെതിരേയാണെങ്കിലും അതു കോണ്‍ഗ്രസിന്റെ നെഞ്ചിലും തറയ്ക്കുന്നുണ്ട്. ബ്രഹ്‌മപുരം ഉപ കരാറിനു പിന്നിലുള്ള കോണ്‍ഗ്രസ് നേതാവിന്റെ പേരു വെളിപ്പെടുത്തി ദേശീയതലത്തില്‍തന്നെ ബി.ജെ.പി. പോര്‍മുഖം തുറന്നു കഴിഞ്ഞു. അതോടെ സി.പി.എമ്മിനെതിരേ കിട്ടിയ ആയുധം പ്രയോഗിക്കാനാവാതെ, പ്രതിരോധം തീര്‍ക്കേണ്ട അവസ്ഥയിലായി കോണ്‍ഗ്രസ്. എന്നാല്‍ കോണ്‍ഗ്രസ് നേതാവ് വേണുഗോപാല്‍ തന്റെ മരുമകന്റെ ഉപകരാര്‍ ബന്ധം തള്ളിക്കളഞ്ഞു. അത്തരത്തിലൊരു ബന്ധമുണ്ടെങ്കില്‍ തെളിയിക്കാന്‍ അദ്ദേഹം വെല്ലുവിളിച്ചിരിക്കുകയാണ്.

കൊച്ചിയിലെ ഒരു വ്യാപാരിയുടെ ഉടമസ്ഥതയിലുള്ള കമ്പനിയുമായാണ് സോണ്‍ട ഇന്‍ഫ്രാ ടെക് ഉപ കരാറുണ്ടാക്കിയിരിക്കുന്നത്. കോണ്‍ഗ്രസ് നേതാവിന്റെ മരുമകനുമായി രേഖകള്‍ പ്രകാരം ഒരു ബന്ധവും കരാറിനില്ല. എന്നാല്‍, ഈ കമ്പനിയുമായി കോണ്‍ഗ്രസ് നേതാവിന്റെ മകനുള്ള ബന്ധം അന്വേഷണത്തിലൂടെ പുറത്തുവരുമെന്ന് ബി.ജെ.പി. കരുതുന്നു. ബയോ മൈനിങ്ങിനുള്ള യന്ത്രസാമഗ്രികളും ഉപകരണങ്ങളുമെല്ലാം വാങ്ങുന്നതില്‍ ഇടനില നിന്നത് കോണ്‍ഗ്രസ് നേതാവിന്റെ മകനാണെന്നും വിശദാംശങ്ങള്‍ അന്വേഷണ ഏജന്‍സികള്‍ക്ക് പുറത്തു കൊണ്ടുവരാനാവുമെന്നുമാണ് ബി.ജെ.പി.യുടെ പ്രതീക്ഷ.

രാഷ്ട്രീയമായി ഉപയോഗിക്കാമായിരുന്ന വിഷയം കൈവിട്ടുപോകുന്ന അവസ്ഥയിലാണ് കോണ്‍ഗ്രസ്. ഉപ കരാറുണ്ടാക്കുന്നതിന് കോണ്‍ഗ്രസ് നേതാവിനെ കൊച്ചി നഗരസഭയിലെ കൗണ്‍സിലര്‍മാര്‍ സഹായിച്ചത് പാര്‍ട്ടിക്കുള്ളില്‍തന്നെ പുകയുന്നുണ്ട്. വേണുഗാപാലിന്റെ മരുമകന് ഉപകരാറില്‍ നേരിട്ട് ബന്ധമില്ലെങ്കിലും ആ കരാര്‍ നേടിയെടുക്കുന്നതില്‍ കോണ്‍ഗ്രസ് കൗണ്‍സിലര്‍മാരെ സ്വാധീനിച്ചതും കോര്‍പ്പറേഷനില്‍ അതിനുള്ള സാഹചര്യം ഒരുക്കി കൊടുത്തതും അയ്യാളാണെന്നത് വ്യക്തമാണ്. അയ്യാള്‍ കമ്മിഷന് വേണ്ടി മാത്രം രംഗത്ത് വന്ന കഥാപാത്രമാണോയെന്ന കാര്യത്തിലും സംശയമുണ്ട്.

സമ്മര്‍ദത്തിലൂടെ നേടിയെടുത്തതാണ് കരാറെന്ന ആരോപണവുമുണ്ട്. എന്നാല്‍, അതെല്ലാം പാര്‍ട്ടിയുടെ മുന്‍ മേയര്‍ കുത്തിപ്പൊക്കുന്നതാണെന്ന് കോണ്‍ഗ്രസ് നേതാവ് തിരിച്ചടിക്കുന്നു. സ്വകാര്യ കമ്പനിക്ക് അനുകൂലമായ തീരുമാനമെടുത്തത് മുന്‍ മേയറാണെന്നും അദ്ദേഹം കുറ്റപ്പെടുത്തുന്നു. ഏതായാലും തര്‍ക്കം പുകയുമ്പോള്‍ കോണ്‍ഗ്രസും പ്രതിരോധത്തിലാവുകയാണ്.

പ്ലാന്റ് നിര്‍മിക്കാന്‍ നേരത്തേ കരാര്‍ ഒപ്പിട്ടിരുന്ന കമ്പനിയെ ഒഴിവാക്കി പ്രധാന കരാര്‍ സോണ്‍ടയെ എല്പിച്ചതാണ് സി.പി.എമ്മിനെ പുകമറയില്‍ നിര്‍ത്തുന്നത്. കാര്യങ്ങള്‍ തടസ്സമില്ലാതെ നീങ്ങാന്‍ 'ഉപകരാര്‍ ഉപജാപം' കോര്‍പ്പറേഷന്‍ ഭരണനേതൃത്വം കണ്ടില്ലെന്ന് നടിച്ചതും സി.പി.എമ്മിനെ പ്രതിസന്ധിയിലാക്കുന്നുണ്ട്. ഉപ കരാറെടുത്തവരുമായി ചര്‍ച്ചകള്‍ക്ക് തയ്യാറായതും അവര്‍ക്ക് പണം വാങ്ങിക്കൊടുക്കാനായി ഇടപെട്ടതുമെല്ലാം സി.പി.എമ്മിന് തലവേദനയാവും. ഉപകരാറിന് സിപിഎമമും കോണ്‍ഗ്രസും ഒരുപോലെ ഇടപെട്ടതായാണ് ബിജെപി കണ്ടെത്തിയിരിക്കുന്നത്.

സംസ്ഥാനത്തൊട്ടാകെ ബ്രഹ്‌മപുരം ചര്‍ച്ചയാക്കുന്നതിനൊപ്പം, കൊച്ചി കോര്‍പ്പറേഷനില്‍ ശക്തമായ മുന്നേറ്റം നടത്താനും സാധിക്കുമെന്ന കണക്കുകൂട്ടലിലാണ് ബി.ജെ.പി. എങ്ങനെയും കേന്ദ്ര ഏജന്‍സിയെ ബ്രഹ്‌മപുരത്ത് എത്തിക്കാനുള്ള അണിയറ നീക്കങ്ങളിലാണ് ബി.ജെ.പി. ബ്ര്ഹമപുരം വിഷയം കത്തി നില്ക്കുന്ന സാഹചര്യത്തിലാണ് ബിഷപ്പിന്റെ പ്രസ്താവനയെന്നതും ശ്രദ്ധേയമാണ്. ഈ രണ്ട് വിഷയങ്ങളും കൂട്ടിയിണക്കുകയും കേന്ദ്ര ഏജന്‍സികള്‍ അന്വേഷണത്തിലൂടെ കണ്ടെത്തുന്ന വിവരങ്ങളും ചേര്‍ത്ത് വേരുറപ്പിക്കാനുള്ള തന്ത്രത്തിനാണ് ബിജെപി അണിയറയില്‍ തയ്യാറെടുക്കുന്നത്.