കൊറിയര്‍ സര്‍വീസിന്റെ മറവില്‍ മാരക മയക്കുമരുന്ന് വില്‍പന നടത്തിയ രണ്ടു പേര്‍ പോലീസ് പിടിയില്‍. വടകര ഏറാമല ഉഷസില്‍ റാനിഷ് (30), എടച്ചേരി ഒതയോത്ത് അഭിന്‍ (35) എന്നിവരെയാണ് എടച്ചേരി എസ്.ഐ ആന്‍ഫി റസലും സംഘവും ചേര്‍ന്ന് പിടികൂടിയത്.

15 പായ്ക്കറ്റ് എംഡിഎംഎ ആണ് സംഘം കണ്ടെടുത്തത്. പൊലീസിന്റെ രഹസ്യാന്വേഷണ വിഭാഗം നല്‍കിയ വിവരത്തിന്റെ അടിസ്ഥാനത്തിലാണ് അറസ്റ്റ്.

കാര്‍ത്തികപ്പള്ളി റോഡില്‍ എളങ്ങോളിയില്‍ ഇവര്‍ നടത്തുന്ന കൊറിയര്‍ സ്ഥാപനത്തില്‍ നടത്തിയ പരിശോധനയിലാണ് ലഹരിവസ്തുക്കള്‍ പിടിച്ചെടുത്തത്. പിടിയിലായ രണ്ടു പേരെയും ചോദ്യം ചെയ്തുവരികയാണെന്ന് പൊലീസ്.

. എവിടെ നിന്നാണ് എംഡിഎംഎ എത്തിച്ചതെന്നും പിന്നിലാരാണെന്നും വ്യക്തമാക്കാനായി കൂടുതല്‍ അന്വേഷണം വേണ്ടിവന്നേക്കും.