മാലിന്യ നിർമാർജ്ജന പ്രവർത്തനങ്ങൾ നിരീക്ഷിക്കുന്നതിനും ലംഘനങ്ങക്ക് പിഴ ചുമത്തി നടപടികൾ എടുക്കുന്നതിനും ജില്ലയിൽ എൻഫോഴ്‌സ്‌മെന്റ് സ്‌ക്വാഡ് പ്രവർത്തനം ആരംഭിച്ചു. സ്‌ക്വാഡിന് വേണ്ടി സജ്ജമാക്കിയ പ്രത്യേക വാഹനം ജില്ല പഞ്ചായത്ത് പ്രസിഡന്റ് കെ.ടി ബിനു ഫ്‌ളാഗ് ഓഫ് ചെയ്തു.

മാലിന്യ സംസ്‌കരണവുമായി ബന്ധപ്പെട്ട നിയമ ലംഘനങ്ങൾ കണ്ടെത്തുക, നിരോധിത പ്ലാസ്റ്റിക് ഉൽപ്പന്നങ്ങളുടെ സംഭരണം,വിൽപ്പന എന്നിവ തടയുകയാണ് ലക്ഷ്യം. അനധികൃതമായി മാലിന്യം കടത്തുന്ന വാഹനങ്ങൾ പോലീസിന്റെ സഹായത്തോടെ കസ്റ്റഡിയിൽ എടുക്കുവാനും കുറ്റക്കാരെ അറസ്റ്റ് ചെയ്യുവാനും സ്‌ക്വാഡിന് അധികാരമുണ്ട്.

ചെറുതോണി ടൗണിലുള്ള കടകളിലും സ്ഥാപനങ്ങളിലും സ്‌ക്വാഡ് പരിശോധന നടത്തി. പെരിയാറിന്റെ തീരത്തെ കടകളിൽ നിന്നും സ്ഥാപനങ്ങളിൽ നിന്നും മാലിന്യങ്ങൾ തള്ളുന്നത് കണ്ടെത്തിയിട്ടുണ്ട് . പ്രസ്തുത സ്ഥാപനങ്ങൾക്കെതിരെ നടപടി സ്വീകരിക്കുവാൻ വാഴത്തോപ്പ് പഞ്ചായത്ത് സെക്രട്ടറിക്കും മാലിന്യം നീക്കം ചെയ്യാൻ കട ഉടമകൾക്കുംനിർദേശം നൽകിയിട്ടുണ്ട് .

വരും ദിവസങ്ങളിൽ പരിശോധനകൾ കൂടുതൽ ശക്തമാക്കും. നിയമലംഘനം നടക്കുന്നത് ശ്രദ്ധയിൽപ്പെട്ടാൽ പൊതുജനങ്ങൾക്ക് കത്ത് വഴിയോ , ഇമെയിൽ, വഴിയോ ശുചിത്വ മിഷനിലേക്ക് പരാതികൾ അറിയിക്കാം. വിലാസം ജില്ലാ കോ ഓർഡിനേറ്റർ, ജില്ലാ ശുചിത്വ മിഷൻ, ജില്ലാ പഞ്ചായത്ത് ബിൽഡിങ്, പൈനാവ് പി.ഒ ,കുയിലിമല ഫോൺ; 04862 232295 enfodsmidk23@gmail.com

എൻഫോഴ്‌സ്‌മെന്റ് സ്‌ക്വാഡ് വാഹനത്തിന്റെ ഫ്ളാഗ് ഓഫ് ചടങ്ങിൽ തദ്ദേശസ്വയംഭരണ വകുപ്പ് ജോയിന്റ് ഡയറക്ടർ കുര്യാക്കോസ് കെ.വി, ശുചിത്വമിഷൻ ജില്ല കോർഡിനേറ്റർ കെ സെൻകുമാർ , തദ്ദേശസ്വയംഭരണ വകുപ്പ് അസിസ്റ്റന്റ് ഡയറക്ടർ ശ്രീലേഖ എന്നിവർ പങ്കെടുത്തു.