എലത്തൂര്‍ ട്രെയിന്‍ തീവയ്പ്പ് കേസിലെ പ്രതി ഷാരൂഖ് സെയ്ഫിക്കെതിരെ യു എ പി എ ചുമത്തിയത് വ്യക്തമായ തെളിവുകളുടെ അടിസ്ഥാനത്തിലാണെന്ന് എ ഡി ജി പി എം ആര്‍ അജിത് കുമാര്‍ . ഷാരൂഖ് തന്നെയാണ് കുറ്റകൃത്യം ചെയ്തതെന്ന് തെളിഞ്ഞിട്ടുണ്ടെന്നും അതിനുള്ള തെളിവുകള്‍ ലഭിച്ചിട്ടുണ്ടെന്നും എ ഡി ജി പി .

പുരോഗമന തീവ്രവാദപരമായ ചിന്താഗതിയുള്ളയാളാണ് ഷാരൂഖ് സെയ്ഫിയെന്ന് എ ഡി ജി പി പറഞ്ഞു. 'സക്കീര്‍ നായിക്, ഇസ്രാ അഹമ്മദ് പോലുള്ള തീവ്രവാദ ചിന്താഗതിയുള്ളവരുടെ വീഡിയോകള്‍ നിരന്തരം കാണാറുണ്ടായിരുന്നു.

ഷാരൂഖ് കേരളത്തിലെത്തിയത് തീവയ്പ്പ് നടത്താനായി പദ്ധതിയിട്ടു തന്നെയാണ്. മാത്രവുമല്ല മറ്റാരുടെയെങ്കിലും സഹായം ലഭിച്ചോയെന്നത് അന്വേഷിക്കുകയും ചെയ്യുന്നുണ്ട്. ഷാരൂഖ് സെയ്ഫിയ്ക്ക് പ്‌ളസ്ടു വിദ്യാഭ്യാസമാണുള്ളത്. 27 വയസാണ്. നാഷണല്‍ ഓപ്പണ്‍ സ്‌കൂളിലാണ് പഠിച്ചത്. കേരളത്തില്‍ എത്തുന്നത് ആദ്യമായാണ്'- വ്യക്തമാക്കി എ ഡി ജി പി .

കസ്റ്റഡിയിലെടുത്ത് രണ്ടാഴ്ചയ്ക്കു ശേഷമാണ് ഷാരൂഖിനെതിരെ യു എ പി എ (നിയമ വിരുദ്ധ പ്രവര്‍ത്തനം തടയല്‍ നിയമം) ചുമത്തിയത് . നാളെ വൈകുന്നേരം ഷാരൂഖിന്റെ കസ്റ്റഡി കാലാവധി അവസാനിക്കാനിരിക്കെയാണ് നടപടി.