അരിക്കൊമ്പന്‍ പൂര്‍ണ്ണ ആരോഗ്യവാന്‍ അവന്‍ സുഖമായിരിക്കുന്നുവെന്ന വനംവകുപ്പിന്റെ തള്ള് പൊളിയുന്നു. അരിക്കൊമ്പന്റെ കണ്ണിന് കാഴ്ചക്കുറവ്, തുമ്പിക്കൈയ്യില്‍ രണ്ടുദിവസം പഴക്കമുള്ള മുറിവെന്നും റിപ്പോര്‍ട്ട്. ആനയുടെ വലതുകണ്ണിനാണ് കാഴ്ചക്കുറവുള്ളതെന്ന് വനംവകുപ്പ് അറിയിച്ചു. വനംവകുപ്പ് സി.സി.എഫിന്റെ റിപ്പോര്‍ട്ടിലാണ് പരാമര്‍ശമുള്ളത്.

ആനയെ മയക്കുവെടിവെച്ച് പിടികൂടിയ ശേഷം അതിന്റെ ആരോഗ്യനില വനംവകുപ്പിന്റെ വെറ്റിറനറി വിഭാഗം വിശദമായി പരിശോധിച്ചിരുന്നു. ഈ പരിശോധനയിലാണ് കാഴ്ചക്കുറവുള്ള കാര്യം വ്യക്തമായത്. എന്നാല്‍ ആനയ്ക്ക് മറ്റ് ആരോഗ്യപ്രശ്‌നങ്ങളൊന്നുമില്ല. മുപ്പത്തഞ്ചു വയസ്സുള്ള അരിക്കൊമ്പന്റെ ശരീരത്തിലെ മുറിവുകളേക്കുറിച്ച് വിശദമായ പരിശോധന നടത്തുകയും ചികിത്സ നല്‍കുകയും ചെയ്തിരുന്നു. പിടികൂടുന്ന സമയത്ത് അരിക്കൊമ്പന്റെ തുമ്പിക്കൈയ്യിലും ശരീരത്തിലും പരിക്കുണ്ടായിരുന്നു. ഇത് രണ്ടുദിവസം പഴക്കമുള്ള പരിക്കാണെന്നാണ് വനംവകുപ്പിന്റെ റിപ്പോര്‍ട്ടില്‍ പറയുന്നത്. ചക്കക്കൊമ്പനുമായി അരിക്കൊമ്പന്‍ സംഘര്‍ഷത്തില്‍ ഏര്‍പ്പെട്ടിരുന്നെന്നും അപ്പോഴുണ്ടായ പരിക്കാണ് തുമ്പിക്കയ്യില്‍ ഉള്‍പ്പെടെ ഉള്ളതെന്നുമാണ് കരുതുന്നത്. മുറിവുകളില്‍ മരുന്നുവെച്ചാണ് പെരിയാര്‍ ടൈഗര്‍ റിസര്‍വില്‍ തുറന്നുവിട്ടത്. അരിക്കൊമ്പന്‍ നിലവില്‍ മാവടിമുല്ലക്കൊടി പ്രദേശത്താണ് ഉള്ളതെന്നാണ് വിവരം.

അരിക്കൊമ്പന്റെ കാര്യത്തില്‍ ആശങ്ക പങ്കുവെച്ച് വിദഗ്ദര്‍ പലരും രംഗത്ത് വന്നിട്ടുണ്ട്. കാടാണെങ്കിലും അരിക്കൊമ്പന്‍ 30 കൊല്ല്ത്തിലധികമായ് സൈ്വര്യവിഹാരം നടത്തിയിരുന്നത് ചിന്നക്കനാലിലാണ്. അവന് ഒട്ടും പരിചിതമില്ലാത്ത സ്ഥലമാണ് പെരിയാര്‍. അതുമായ് ഇണങ്ങാന്‍ സമയമെടുക്കും. അവിടെ അവന് പലതും കണ്ടെത്തേണ്ടിയിരിക്കുന്നു. ആഹാരം,വെള്ളം ഇതൊക്കെ എവിടെ കിട്ടും ആ ഭാഗങ്ങള്‍ കണ്ടെണം. മറ്റ് മൃഗങ്ങളുമായ് ചങ്ങാത്തതിലാകണം. അതിനെടുക്കുന്ന സമയം എത്രയോ അതുവരെ അവന്‍ ഏത് രീതിയില്‍ പെരുമാറുമെന്നത് പ്രധാനമാണ്. തീര്‍ന്നില്ല തമിവ്‌നാട് അതിര്‍ത്തിയിലേക്ക് കടന്നാല്‍ സ്ഥിതി അതിലും ഗുരുതരമാണ്. തമിഴ്‌നാട് വനംവകുപ്പ് സദാ ജാഗരൂകരായ് നില്‍ക്കുകയാണ്. പെരിയാറില്‍ കൊണ്ടുചെന്നാക്കി എന്നത് കൊണ്ട് പ്രതിസന്ധികള്‍ അവസാനിക്കുന്നില്ലെന്ന് വിദഗ്ദര്‍ വിലയിരുത്തുന്നത്.

ഇതിനിടെ മിഷന്‍ അരിക്കൊമ്പന്‍ ദൗത്യം വിജയകരമായി പൂര്‍ത്തിയാക്കിയ ദൗത്യസംഘത്തെ അഭിനന്ദിച്ച് കത്തയച്ച് ഹൈക്കോടതി. ദൗത്യം രാജ്യത്തിനാകെ അഭിമാനകരമായ നേട്ടമാണെന്ന അനുമോദനത്തോടെ ഹൈക്കോടതി ജസ്റ്റിസ് എ.കെ ജയശങ്കരന്‍ നമ്പ്യാരാണ് കത്തയച്ചത്. കുങ്കിയാനകളുടെ പാപ്പാന്‍മാര്‍ ഉള്‍പ്പെടെ ദൗത്യസംഘത്തിലെ മുഴുവന്‍ ആളുകളുടെയും പേര് എടുത്തുപറഞ്ഞാണ് അഭിനന്ദനക്കത്ത്. ഒരു കാട്ടാനയെ ജീവിതകാലം മുഴുവന്‍ ബന്ധനത്തില്‍വെക്കുന്നതില്‍ നിന്ന് രക്ഷപ്പെടുത്തി അതിന്റെ സ്വാഭാവിക ആവാസവ്യവസ്ഥയിലേക്ക് വിടാന്‍ കഴിഞ്ഞത് സംസ്ഥാനത്തിനും രാജ്യത്തിനാകെയും അഭിമാനകരമായ നേട്ടമാണെന്ന് കത്തില്‍ പറയുന്നു. ദൗത്യത്തിലുടനീളം വനംവകുപ്പ് ഉദ്യോഗസ്ഥരും മറ്റും ആനയോട് കാണിച്ച കരുതലും സഹാനുഭൂതിയും മാനവികതയുടെ അടയാളമാണെന്നും കത്തില്‍ ജസ്റ്റിസ് വ്യക്തമാക്കി. ഭൂമിയിലെ മറ്റു ജീവികളുടെ താല്‍പ്പര്യങ്ങളെ കൂടി അനുഭാവപൂര്‍വം പരിഗണിച്ച് വൈവിധ്യമാര്‍ന്ന ആവാസവ്യവസ്ഥയില്‍ മനുഷ്യ നിയന്ത്രണം സാധ്യമാണെന്ന് ലോകത്തിനാകെ കാണിച്ചുകൊടുക്കാന്‍ ദൗത്യത്തിലൂടെ സാധിച്ചുവെന്നും കത്തില്‍ പറയുന്നു. ദൗത്യസംഘത്തിന്റെ പ്രവര്‍ത്തനം വനംവകുപ്പിലെ വരുന്ന തലമുറയും മാതൃകയാക്കേണ്ടതാണെന്നും ഹൈക്കോടതി ചൂണ്ടിക്കാണിച്ചു.