കാറിനകത്താണോ ഏമാന്മാരെ ഹെല്‍മെറ്റ് വെച്ച് യാത്ര ചെയ്യേണ്ടത്. കേരളത്തില്‍ പുതിയ പരിഷ്‌കാരം. കാറിലിരുന്നവന് ഹെല്‍മെറ്റ് ഇല്ലാത്തതിന് പിഴ. കാറുള്ളവര്‍ ഓരോ ഹെല്‍മെറ്റും വാങ്ങുക. ഖജനാവ് നിറയ്ക്കാന്‍ പോലീസിനേയും എംവിഡിയേയും മുക്കിന് മുക്കിന് ഇറക്കിയിരിക്കുകയാണ്. പക്ഷെ വെളിവും വെള്ളിയാഴ്ചയും ഉള്ള ഏമാന്മാരെ ഇറക്കിക്കൂടെ. എഐ ക്യാമറയെ തന്നെ താങ്ങാന്‍ വയ്യ അതിന്റെ കൂടെ എംവിഡിയും വലവിരിച്ചിരിക്കുന്നത്. ഇനിയിപ്പോള്‍ റോഡില്‍ക്കൂടാണോടാ വണ്ടിയോടിക്കുന്നതെന്നും പറഞ്ഞ് പിഴ അടിച്ച് കൈയ്യില്‍ തരുമോ എന്തോ.

ഹെല്‍മറ്റില്ലാതെ വണ്ടിയോടിച്ചെന്ന് കാട്ടി കാര്‍ യാത്രികന് പിഴയിട്ട് മോട്ടോര്‍ വാഹന വകുപ്പ്. മലപ്പുറം തിരൂര്‍ സ്വദേശി മുഹമ്മദ് സാലിക്കാണ് 500 രൂപ പിഴയടക്കാന്‍ നോട്ടീസ് ലഭിച്ചത്. അമളി തിരിച്ചറിഞ്ഞതോടെ പിഴയൊടുക്കേണ്ടെന്ന് അറിയിച്ച് ഉദ്യോഗസ്ഥര്‍ തന്നെ സംഭവം ഒത്തുതീര്‍പ്പാക്കി. KL 55 V 1610 എന്ന നമ്പറിലുള്ള വാഹനത്തില്‍ ബാവപ്പടിയിലൂടെ ഹെല്‍മെറ്റില്ലാതെ യാത്ര ചെയ്തതിന് 500 രൂപ പിഴയടയ്ക്കണമെന്ന് ആവശ്യപ്പെട്ടാണ് സാലിയുടെ ഫോണിലേക്ക് സന്ദേശമെത്തിയത്. സാലിക്ക് ഈ നമ്പറിലുള്ളത് ഒരു ആള്‍ട്ടോ കാറാണ്. നിയമലംഘനം നടന്നെന്ന് നോട്ടീസില്‍ പറയുന്ന ബാവപ്പടിയിലൂടെ സാലി അന്നേദിവസം യാത്രചെയ്തിട്ടുമില്ല. ഇതോടെ സത്യാവസ്ഥ അന്വേഷിച്ചിറങ്ങിയ സാലി മോട്ടോര്‍ വാഹന വകുപ്പിനെ തെറ്റ് ബോധ്യപ്പെടുത്തുകയായിരുന്നു. രണ്ട് യുവാക്കള്‍ ബൈക്കില്‍ ഹെല്‍മെറ്റ് ധരിക്കാതെ യാത്രചെയ്യുന്ന ചിത്രമാണ് നോട്ടീസിലുള്ളത്. ദൃശ്യം റോഡിലെ ക്യാറയില്‍ പതിഞ്ഞപ്പോള്‍ വാഹന നമ്പര്‍ തെറ്റിയതാകാം പിഴവിന് കാരണമെന്നാണ് നിഗമനം.

ആ കാറുകാരന്‍ സത്യാവസ്ഥ പുറത്തുകൊണ്ടുവരാന്‍ തുനിഞ്ഞിറഹ്ങിയതും സംഭവം വാര്‍ത്ത ആയതും നന്നായി. ഇല്ലേല്‍ എംവിഡി പെറ്റി അടപ്പിച്ചേനെ. നീ കാറിലോ ബൈക്കിലോ എങ്ങനെ വേണേ പോ പക്ഷെ ഹെല്‍മെറ്റ് വെക്കാത്തതിന് ഹെല്‍മെറ്റ് വെച്ചിട്ട് പോയാല്‍ മതിയെന്ന് പറയും. ഖജനാവ് കാലിയാകുമ്പോഴെല്ലാം രസീത് കുറ്റിയും കൊടുത്ത് ഏമാന്മാരെ പറഞ്ഞുവിടും. പിന്നെയൊരു ഓട്ടമാണ് പോലീസും എംവിഡിയും. എങ്ങനെയും കാശെത്തിക്കുക എന്ന ജോലിയാണ് ഇവര്‍ക്കുള്ളത്. അതുകൊണ്ട് കാറില്‍ ഹെല്‍മെറ്റ് വെക്കേണ്ടി വരും ബൈക്കില്‍ സീറ്റ് ബെല്‍റ്റ് ഇടേണ്ടി വരും. ഇങ്ങനെ പലതും കേരളത്തില്‍ അരങ്ങേറും. അല്ലെങ്കിലും ജനങ്ങളുടെ മെക്കിട്ട് കേറാനല്ലെ ഇവര്‍ക്കൊക്കെ അറിയൂ.

ഹെല്‍മെറ്റ് വെക്കാതെ പോകുന്നവരെ തല്ലി താഴെയിടാനും വലിച്ച് താഴെയിടാനും. ഏമാന്മാര്‍ക്ക് വലിയ ഉത്സാഹമാണ്. ഇനി മൂന്നാംമുറ പുറത്തെടുക്കും. ആരെയൊക്കെ ഇനി തല്ലിക്കൊല്ലുമോ. അടുത്തിടെയാണ് ഒരു സാധു മനുഷ്യനെ തല്ലിക്കൊന്നത്. പോലീസിനെ കണ്ട് പേടിച്ചിട്ട് ആ പാവം കുറച്ച് മുന്നോട്ട് നീങ്ങിയാണ് വണ്ടി നിര്‍ത്തിയത്. ചെന്നപാടെ മുഖമടച്ചൊരു അടി. ബോധംകെട്ട് നിലത്ത് വീണുപോയി ആ മനുഷ്യന്‍. അഹ്ങനെ കാക്കിയുടെ ഹുങ്ക് കാണിക്കുന്ന പോലീസുകാരുടേയും എംവിഡിയുടേയും മുന്നിലാണ് ചെന്നുപെടുന്നതെങ്കില്‍ അടിച്ച് കൊല്ലാനും മടിക്കില്ല ഇക്കൂട്ടര്‍. ഏതായാലും കാറില്‍ ഹെല്‍മെറ്റ് വെക്കാതെ പിഴ അടിച്ച് കൊടുത്ത സംഭവത്തോടെ എംവിഡി എയറിലാണ്. ഇങ്ങനെ എയറില്‍ക്കേറാനാണ് ഇവരുടെയൊക്കെ യോഗം. എഐ ക്യാമറ കൊണ്ടുവന് ഇവര്‍ക്ക് അഴിമതി നടത്താം എന്നിട്ട് ജനങ്ങള്‍ നന്നാകുന്നില്ലെന്ന് പോലും. ആദ്യം റോഡ് നന്നാക്ക് എന്നിട്ടാകാം പെറ്റി.