ഒരു കുപ്പി പെട്രോളിനും ഒരുതീപ്പെട്ടി കൊള്ളിയിലും ആളിയ തീ അണക്കാന്‍ വേണ്ടി വന്നത് ഒരു കോടി രൂപ. ബ്രഹ്മപുരത്തെ തീ ഖജനാവിന് ഉണ്ടാക്കിയത് വലിയ വലിയ ചെലവ്. ഈ ഒരു കോടിയില്‍ കൈയ്യിട്ട് വാരിയോ എന്നും വ്യക്തമാല്ല. കൊച്ചിയെ ശ്വാസം മുട്ടിക്കുക മാത്രമല്ല കേരളത്തിന് വലിയ ബാധ്യത കൂടിയാണ് ബ്രഹ്മപുരം ഉണ്ടാക്കാന്‍ പോകുന്നത്. വീണ്ടും കരാര്‍ കൊടുക്കാനുള്ള നീക്കവും നടക്കുന്നുണ്ട്. 52 കോടി തൊലച്ചത് മാത്രം മിച്ചം. ഇനി ആദ്യംമുതല്‍ കരാര്‍ കൊടുത്ത് മാലിന്യ നിര്‍മ്മാര്‍ജ്ജനത്തിനുള്ള നീക്കം നടക്കുന്നത്. തീ അണയ്ക്കാന്‍ ചെലവായത് 1.14 കോടി രൂപയാണ്. ഇതില്‍ 90 ലക്ഷം രൂപ ചെലവഴിച്ചത് കൊച്ചി കോര്‍പ്പറേഷനാണ്. മണ്ണുമാന്തിയന്ത്രങ്ങള്‍, ഫ്‌ളോട്ടിങ് മെഷീനുകള്‍, മോട്ടോര്‍ പമ്പുകള്‍, രാത്രികാലങ്ങളില്‍ ഉപയോഗിക്കുന്നതിനുള്ള ലൈറ്റുകള്‍ എന്നിവയുടെ വാടക, ഇവ സ്ഥലത്ത് എത്തിക്കുന്നതിനും പ്രവര്‍ത്തിക്കുന്നതിനുള്ള ഇന്ധനച്ചെലവുകള്‍, ഓപ്പറേറ്റര്‍മാരുടെ കൂലി, മണ്ണ് പരിശോധന, താത്കാലിക വിശ്രമകേന്ദ്രങ്ങളുടെ നിര്‍മാണം, ബയോ ടോയ്‌ലറ്റുകള്‍, ഭക്ഷണം എന്നീ ചെലവുകളാണ് കോര്‍പ്പറേഷന്‍ വഹിച്ചത്.

മെഡിക്കല്‍ ക്യാമ്പുകള്‍ ഉള്‍പ്പെടെയുള്ള പ്രവര്‍ത്തനങ്ങള്‍ക്ക് 24 ലക്ഷം രൂപ ചെലവായി. ബ്രഹ്മപുരം തീപ്പിടിത്തവുമായി ബന്ധപ്പെട്ട് ചെലവഴിച്ച തുക അനുവദിക്കണമെന്നാവശ്യപ്പെട്ട് തീ അണയ്ക്കാന്‍ മേല്‍നോട്ടം വഹിച്ച ജില്ലാ ഭരണകൂടം സര്‍ക്കാരിന് കത്ത് നല്‍കിയിരിക്കുകയാണ്. ജില്ലാ ഹെല്‍ത്ത് ആന്‍ഡ് ഫാമിലി വെല്‍ഫെയര്‍ സൊസൈറ്റി പ്രോഗ്രാം മാനേജര്‍ 11 ലക്ഷം രൂപയുടെയും ജില്ലാ മെഡിക്കല്‍ ഓഫീസര്‍ 13 ലക്ഷം രൂപയുടെയും ബില്ലുകളാണ് സമര്‍പ്പിച്ചിട്ടുള്ളത്. അഗ്‌നിരക്ഷാ ദൗത്യത്തിലേര്‍പ്പെട്ട ഉദ്യോഗസ്ഥര്‍ക്കായി കാക്കനാട് തയ്യാറാക്കിയ മെഡിക്കല്‍ ക്യാമ്പിലേക്ക് വേണ്ട ഉപകരണങ്ങള്‍ വാങ്ങുന്നതിനും ഡോക്ടര്‍മാരുടെ താമസസൗകര്യം ഒരുക്കുന്നതിനുമായിരുന്നു 11 ലക്ഷം രൂപ.

മറ്റ് മെഡിക്കല്‍ ആവശ്യങ്ങള്‍ക്ക് വേണ്ടിയാണ് 13 ലക്ഷം രൂപ ചെലവഴിച്ചത്. എറണാകുളം കളക്ടറേറ്റിലെ ദുരന്തനിവാരണ വിഭാഗത്തില്‍നിന്ന് ലഭിച്ച വിവരാവകാശ രേഖയിലാണ് ബ്രഹ്മപുരത്തെ തീയണയ്ക്കാന്‍ ചെലവായ തുകയുടെ കണക്കുകള്‍ പുറത്തുവന്നത്. മാര്‍ച്ച് രണ്ടിനായിരുന്നു കൊച്ചി കോര്‍പ്പറേഷന്റെ ഉടമസ്ഥതയിലുള്ള ബ്രഹ്മപുരത്തെ 110 ഏക്കറോളമുള്ള മാലിന്യശേഖരണ പ്ലാന്റില്‍ തീപിടിച്ചത്. 13 ദിവസത്തോളമെടുത്തായിരുന്നു തീയുംപുകയും നിയന്ത്രണ വിധേയമാക്കിയത്.

സര്‍ക്കാരും കോര്‍പറേഷനും കാണിച്ച അഴിമതിക്കും കൂട്ടുകച്ചവടത്തിനും കാശ് പോയത് ജനങ്ങളുടേത്. കോടികളാണ് മാലിന്യ പ്ലാന്റിന് കരാര്‍ കൊടുത്ത വകയിലും സോണ്‍ഡയെ ഇറക്കിയ വകയിലും പൊടിച്ചത്. സിപിഎം നേതാവിന്റെ മകന്റെ കമ്പനിക്ക് കരാര്‍ കൊടുക്കാന്‍ ചില്ലറക്കളിയല്ല സര്‍ക്കാരും കോര്‍പറേഷനും ചേര്‍ന്ന് നടത്തിയത്. ഇതിനിടയില്‍ കോണ്‍ഗ്രസ് നേതാവിന്റെ കുടുംബക്കാരുടെ കമ്പനിക്ക് കരാര്‍ കൊടുത്ത് അഴിമതിക്ക് കൂട്ടുപിടിച്ചു. അതുകൊണ്ട് ബ്രഹ്മപുരം അഴിമതിയില്‍ ഇടത് വലതിന് പങ്കുണ്ട്. ഈ കളിയില്‍ ജനം പൊട്ടരായി. ഇനി വീണ്ടും കോടികള്‍ പൊടിച്ച് പ്ലാന്റുണ്ടാക്കാനാണ് പ്ലാന്‍. ഇതുവരെ അവിടെ മാലിന്യ നിര്‍മ്മാര്‍ജ്ജനം നടത്താതെ സോണ്‍ഡ കാശടിച്ചു. ഉപകരാര്‍ പോയ വഴിക്ക് ആ കമ്പനികളും കീശ വീര്‍പ്പിച്ചു. ഇതേ സോണ്‍ഡയ്ക്ക് കോഴിക്കോടുള്ള പദ്ധതി കൊടുക്കാനുള്ള നീക്കം സര്‍ക്കാര്‍ വതലത്തില്‍ നടക്കുകയാണ്. മുഖ്യമന്ത്രിയുടെ ഓഫീസില്‍ ജപ്പാന്‍ കമ്പനി പ്രതിനിധിയുമായ് ചര്‍ച്ചയും നടന്ന് കഴിഞ്ഞു. കാശെടുത്ത് വീശുന്നത് തറവാട്ട് വകയല്ലെന്ന് പിണറായി ഓര്‍ക്കണം. ജനങ്ങളുടെ കാശാണ്.