അരിക്കൊമ്പന്റെ വലതുകണ്ണിന് കാഴ്ച്ചക്കുറവെന്ന് വെറ്റിറനറി വിഭാഗത്തിന്റെ റിപ്പോര്‍ട്ട് . മയക്കുവെടിവെച്ച് പരിശോധിച്ചപ്പോഴാണ് വ്യക്തമായതെന്നും വനംവകുപ്പ് ഹൈക്കോടതിയില്‍ സമര്‍പ്പിച്ച റിപ്പോര്‍ട്ടില്‍ പറയുന്നു. അതേസമയം കൂടുതല്‍ ചികിത്സ ആവശ്യമില്ലെന്നും വനംവകുപ്പ് നിര്‍ദേശിച്ചു. ഇത് കൂടാതെ അരിക്കൊമ്പന്റെ തുമ്പിക്കൈയിലെ പരിക്കിന് രണ്ടുദിവസത്തെ പഴക്കമുണ്ടെന്നും റിപ്പോര്‍ട്ട് വ്യക്തമാക്കുന്നു.

ആനയെ പെരിയാര്‍ കടുവ സങ്കേതത്തിലെ ഉള്‍വനത്തിലേക്ക് മുറിവിന് ചികിത്സ നല്‍കിയതിനു ശേഷമാണ് വിട്ടയച്ചത്. അരിക്കൊമ്പനെ മയക്കുവെടിവെച്ച് പിടികൂടിയ ശേഷം അതിന്റെ ആരോഗ്യനില വെറ്റിറനറി വിഭാഗം വിശദമായി പരിശോധിച്ചിരുന്നു. ഈ പരിശോധനയിലാണ് കാഴ്ചക്കുറവുള്ള കാര്യം വ്യക്തമായത്. എന്നാല്‍ മറ്റ് ആരോഗ്യപ്രശ്‌നങ്ങളൊന്നും ആനയ്ക്കില്ല.

അതിനിടെ അരിക്കൊമ്പന്‍ ദൗത്യം വിജയിപ്പിച്ച ഉദ്യോഗസ്ഥര്‍ക്ക് ഹൈക്കോടതി അഭിനന്ദനം അറിയിച്ചു. സഹാനുഭൂതിയോടെ ദൗത്യം നിറവേറ്റിയത് മനുഷ്യത്വത്തിന്റെ അടയാളമാണെന്നും നന്ദി പറഞ്ഞുളള കത്തില്‍ ജസ്റ്റിസ് വ്യക്തമാക്കി. ഇത് കൂടാതെ മനുഷ്യമൃഗ സംഘര്‍ഷങ്ങള്‍ പരിഹരിക്കാന്‍ വിദഗ്ധ സമിതി രൂപീകരിക്കണമെന്നും ഹൈക്കോടതി നിര്‍ദേശിച്ചിട്ടുണ്ട്.