യുവതി ആത്മഹത്യ ചെയ്ത സംഭവത്തില്‍ പ്രതിയെ കണ്ടെത്താന്‍ പൊലീസ് ലുക്ക്ഔട്ട് നോട്ടീസ് പുറത്തിറക്കി. സൈബര്‍ ആക്രമണത്തില്‍ മനംനൊന്താണ് കടുത്തുരുത്തി കോതനല്ലൂര്‍ സ്വദേശി ആതിര ആത്മഹത്യ ചെയ്തത്. കോതനല്ലൂര്‍ മുണ്ടക്കല്‍ വീട്ടില്‍ അരുണ്‍ വിദ്യാധരന് എതിരെയാണ് (32) കോട്ടയം പൊലീസ് ലുക്ക് ഔട്ട് നോട്ടീസ് പുറപ്പെടുവിച്ചത്. സംഭവം നടന്ന് നാലുദിവസമായിട്ടും പ്രതിയെ പിടികൂടാനാകാത്ത സാഹചര്യത്തിലാണ് ലുക്ക് ഔട്ട് നോട്ടീസ് പുറത്തിറക്കിയത്.

ആതിരയ്‌ക്കെതിരെ കഴിഞ്ഞ ഞായറാഴ്ചയാണ് അരുണ്‍ അപകീര്‍ത്തികരമായ പോസ്റ്റിട്ടത്. ആതിരയുടെ പരാതിക്ക് പിന്നാലെ പൊലീസ് അന്വേഷണം തുടങ്ങിയെങ്കിലും അരുണ്‍ ഒളിവില്‍ പോയി. തിങ്കളാഴ്ച ആതിരയുടെ ആത്മഹത്യക്ക് പിന്നാലെ അരുണിന്റെ ഫോണ്‍ സ്വിച്ച് ഓഫായ നിലയിലാണ്. അരുണ്‍ തമിഴ്‌നാട്ടിലേക്ക് കടന്നതായാണ് പൊലീസ് നല്‍കുന്ന സൂചന.

കഴിഞ്ഞ ദിവസം അരുണിന്റെ മൊബൈല്‍ ടവര്‍ ലൊക്കേഷന്‍ കോയമ്പത്തൂരിലാണെന്ന് കണ്ടെത്തിയിരുന്നു. നിലവില്‍ അയല്‍സംസ്ഥാനങ്ങള്‍ കേന്ദ്രീകരിച്ചാണ് പൊലീസ് പ്രതിക്കായി തെരച്ചില്‍ തുടരുന്നത്.