മഹിളാ മന്ദിരത്തില്‍ നിന്നും രണ്ടു കൂട്ടുകാരികളോടൊപ്പം രക്ഷപ്പെട്ടു പോകാന്‍ ശ്രമിച്ച ദളിത് പെണ്‍കുട്ടിയെ വശീകരിച്ചു കൊണ്ട് പോയി വിവാഹം കഴിച്ചു എന്ന് വിശ്വസിപ്പിച്ചു ലൈംഗികമായി പീഡിപ്പിച്ച കേസില്‍ നെയ്യാറ്റിന്‍കര അമരവിള നടുവോര്‍ക്കൊല്ല റെയില്‍വേ ഗേറ്റിനു സമീപം കൃഷ്ണ വിലാസം വീട്ടില്‍ വിക്രമന്‍ മകന്‍ 27 വയസുള്ള സനല്‍കുമാറിനെ ആണ് തിരുവനന്തപുരം പോക്‌സോ കോടതി ജഡ്ജി എംപി ഷിബു ജീവപര്യന്തം കഠിന തടവും 50000 രൂപ പിഴയും ശിക്ഷിച്ചത്.

2016 ലാണ് കേസിനാ സ്പദമായ സംഭവം ഉണ്ടായത്. പതിനേഴു കാരിയായ പെണ്‍കുട്ടി സ്വന്തം പിതാവിനാല്‍ ലൈംഗികമായി പീഡിപ്പിക്കപ്പെട്ട സംഭവവുമായി ബന്ധപ്പെട്ടു മഹിളാമന്ദിരത്തില്‍ കഴിഞ്ഞു വരികയായിരുന്നു.

അവിടെ നിന്നും പെണ്‍കുട്ടി മറ്റു രണ്ടു പെണ്‍കുട്ടികളോടൊപ്പം മതില്‍ ചാടി രക്ഷപ്പെട്ടു പോകാന്‍ ശ്രമിക്കുന്നതിനിടയില്‍ പ്രതി പെണ്‍കുട്ടിയ വശീകരിച്ചു ഒരു അമ്പലത്തില്‍ കൊണ്ട് പോയി വിവാഹം കഴിച്ചു എന്ന് വിശ്വസിപ്പിച്ച ശേഷം 3 ദിവസം ഒന്നിച്ചു താമസിക്കുകയും അതിനു ശേഷം പെണ്‍കുട്ടിയെ ഉപേക്ഷിക്കുകയും ആണ് ഉണ്ടായത്.

വിവാഹം കഴിച്ച ശേഷമാണ് ലൈംഗികമായി ബന്ധപ്പെട്ടതെന്നും ആകയാല്‍ ലൈംഗിക പീഡന കേസ് നിലനില്‍ക്കില്ല എന്നുള്ള പ്രതിഭാഗത്തിന്റെ വാദം നിലനില്‍ക്കുന്നതല്ല എന്ന് കോടതി വിധിക്കുകയുണ്ടായി.

കുറവ സമുദായത്തില്‍ പ്പെട്ട പെണ്‍കുട്ടിയെ നായര്‍ സമുദായത്തില്‍പ്പെട്ട പ്രതി വിവാഹം കഴിച്ച് എന്ന് വിശ്വസിപ്പിച്ചു ലൈംഗികമായി പീഡിപ്പിച്ച ശേഷം ഉപേക്ഷിച്ച സംഭവം അതീവ ഗുരുതരമായ ഒരു കുറ്റ കൃത്യമാണെന്ന് കോടതി നിരീക്ഷിക്കുകയുണ്ടായി.

അത്യന്തം ഹീനമായ ഒരു പ്രവര്‍ത്തിയാണ് പ്രതി ചെയ്തത് എന്നും പ്രതിക്ക് വേറെ ഭാര്യയും മകളും ഉണ്ടെന്നും അകയാല്‍ ശിക്ഷയില്‍ ഇളവ് നല്‍കണമെന്ന വാദവും കോടതി നിരാ കരിക്കുകയുണ്ടായി. പ്രതി യാതൊരു ദയയും അര്‍ഹിക്കുന്നില്ല എന്ന പ്രോസിക്യൂഷന്‍ വാദം കോടതി അംഗീകരിക്കുകയുണ്ടായി.

ഹരിജന പീഡന നിയമപ്രകാരം ജീവപര്യന്തം കഠിന തടവും 25000 രൂപ പിഴയും പോക്‌സോ നിയമപ്രകാരം 10 വര്‍ഷം കഠിന തടവും 25000 രൂപ പിഴയും ആണ് കോടതി ശിക്ഷ വിധിച്ചത്. പ്രോസിക്യൂഷന്‍ ഭാഗത്തു നിന്നും 18 സാക്ഷികളെ വിസ്ത്തരിക്കുകയും 26 രേഖകള്‍ ഹാജരാക്കുകയും ഉണ്ടായി. പ്രോസിക്യൂഷനു വേണ്ടി പബ്ലിക് പ്രോസിക്യൂട്ടര്‍ കാട്ടായിക്കോണം ജെ കെ അജിത് പ്രസാദ് ഹാജരായി.