ജനം ഏറ്റെടുത്താല് തീര്ന്നു... ദി കേരള സ്റ്റോറി ഇന്ന് റിലീസ് ചെയ്യുമ്പോള് എങ്ങും ആകാംക്ഷ; വിവാദമുണ്ടാക്കിയവര് സിനിമയ്ക്ക് നല്കിയത് വന് മൈലേജ്; ആദ്യ ഷോ കണ്ടിറങ്ങുന്നവരുടെ അഭിപ്രായം പ്രധാനം; നല്ല ഫാമിലി സിനിമയെന്ന് വിധിയെഴുതിയാല് തീര്ന്നു; കേരള സ്റ്റോറിക്കെതിരായ ഹര്ജിയില് ഇടപെടാതെ സുപ്രീംകോടതി
ദി കേരള സ്റ്റോറിയുടെ വിധി ഇന്നറിയാം. ഒരു വശത്ത് ജനം തീയറ്ററിലും മറുവശത്ത് ഹൈക്കോടയും വിധി പറയും. ജനം നല്ല ചിത്രമെന്ന് പറഞ്ഞാല് തീര്ന്നു. വിവാദമുണ്ടാക്കിയവര് തീരും. മാത്രമല്ല സിനിമ വന് ഹിറ്റിലേക്കും പോകും.
വിവാദങ്ങളള്ക്കും വിമര്ശനങ്ങള്ക്കുമിടെ 'ദി കേരള സ്റ്റോറി' സിനിമ ഇന്ന് റിലീസ് ചെയ്യും. സെന്സര് ബോര്ഡ് നിര്ദ്ദേശപ്രകാരമുള്ള 7 മാറ്റങ്ങളോടെയാണ് ചിത്രം തിയേറ്ററുകളില് എത്തുന്നത്. കേരളത്തില് ആദ്യ ദിനം 21 തിയേറ്ററുകളിലാണ് പ്രദര്ശനമുള്ളത്.
കേരളത്തില് നിന്നും മതപരിവര്ത്തനം നടത്തി സിറിയയിലേക്ക് തീവ്രവാദ പ്രവര്ത്തനത്തിന് യുവതികളെ കൊണ്ടുപോകുന്നു എന്ന പ്രമേയത്തില് എത്തുന്ന ചിത്രം സംഘപരിവാര് ഗൂഢാലോചനയാണ് എന്നാണ് ഉയരുന്ന വിമര്ശനം. സിനിമയിലുള്ളതെല്ലാം യാഥാര്ത്യമായ കാര്യങ്ങളാണ് എന്നാണ് നിര്മ്മാതാവ് വിപുല് അമൃത്ലാല് ഷായുടെ വാദം. ചിത്രം റിലീസ് ചെയ്യാനിരിക്കെ തമിഴ്നാട്ടിലും ജാഗ്രത നിര്ദേശം.
ക്രമസമാധാന പ്രശ്നം ഉണ്ടാകാനിടയുണ്ടെന്ന പൊലീസ് രഹസ്യാന്വേഷണ വിഭാഗം റിപ്പോര്ട്ടിനെ തുടര്ന്നാണ് നിര്ദ്ദേശം നല്കിയത്. അതേസമയം, കേരള സ്റ്റോറി ഇന്ന് റിലീസ് ചെയ്യാനിരിക്കെ സിനിമയുടെ പ്രദര്ശനം തടയണം എന്ന് ആവശ്യപ്പെട്ടുള്ള വിവിധ ഹര്ജികള് ഹൈക്കോടതി ഇന്ന് പരിഗണിക്കും. നേരത്തെ കേസ് പരിഗണിച്ചപ്പോള് സെന്റര് ബോര്ഡ് ഓഫ് ഫിലിം സര്ട്ടിഫിക്കേഷനോട് കോടതി വിശദീകരണം തേടിയിരുന്നു.
സിനിമയുടെ റിലീസ് തടയണമെന്ന ഹര്ജിയില് സിബിഎഫ്സി ഇന്ന് കോടതിയില് നിലപാട് അറിയിക്കും. കേസ് നേരത്തെ പരിഗണിച്ചപ്പോള് സിനിമ അടിയന്തരമായി സ്റ്റേ ചെയ്യേണ്ട സാഹചര്യമില്ലെന്നായിരുന്നു കോടതി പറഞ്ഞത്. സിനിമയുടെ ഉളളടക്കം സംബന്ധിച്ച് കേട്ടറിവല്ലേ ഉള്ളതെന്നും ട്രെയിലര് മാത്രം പുറത്ത് വന്ന ഘട്ടത്തില് ഹര്ജിക്കാരനോട് കോടതി ചോദിച്ചിരുന്നു. ഇസ്ലാമിക് ഗേള്സ് ഓര്ഗനൈസേഷന്റേതടക്കം വിവിധ ഹര്ജികളാണ് ഹൈക്കോടതിയുടെ പരിഗണനയിലുള്ളത്.
അതേസമയം വിവാദ ചലച്ചിത്രം ദ കേരള സ്റ്റോറിക്കെതിരായ ഹര്ജിയില് ഇടപെടാന് വിസമ്മതിച്ച് വീണ്ടും സുപ്രീംകോടതി. വിഷയം ഹൈക്കോടതിക്ക് വിട്ടതെന്ന് കോടതി അറിയിച്ചു. സിനിമയ്ക്ക് നിലവാരമുണ്ടോയെന്ന് പ്രേക്ഷകര് തീരുമാനിക്കുമെന്നും ചീഫ് ജസ്റ്റിസ് പറഞ്ഞു. സുപ്രീംകോടതി നിര്ദ്ദേശം കേരള ഹൈക്കോടതി പാലിച്ചില്ലെന്നാണ് ഹര്ജിക്കാരന്റെ വാദം.
അതേസമയം, സിനിമ നിരോധിക്കണം എന്നാവശ്യപ്പെടുന്ന പൊതുതാല്പ്പര്യ ഹര്ജി മദ്രാസ് ഹൈക്കോടതി ഉച്ചയ്ക്ക് ശേഷം പരിഗണിച്ചേക്കും. മാധ്യമപ്രവര്ത്തകനായ ബി.ആര്. അരവിന്ദാക്ഷനാണ് ഹര്ജി നല്കിയത്. കേരളത്തിനെതിരെ വ്യാജപ്രചാരണം നടത്തുന്ന സിനിമ ഇന്ത്യയുടെ അഖണ്ഡത തകര്ക്കാനാണ് ശ്രമിക്കുന്നതെന്നാണ് ഹര്ജിക്കാരന്റെ ആരോപണം. ഇന്ത്യയുടെ അഖണ്ഡതയെ തടയുമെന്നും പ്രത്യേക മതവിഭാഗത്തിനെതിരായി വലിയ തോതിലുള്ള പ്രചാരണമാണ് നടക്കുന്നത്.
വ്യാജ പ്രചാരണമാണ് സിനിമ മുന്നോട്ട് വെക്കുന്നതെന്നും ഹര്ജിയില് പറയുന്നു. രാജ്യത്തിന്റെ അഖണ്ഡതയെ തകര്ക്കുന്നതാണ് സിനിമ എന്ന് ചൂണ്ടിക്കാട്ടി കേരള ഡിജിപിക്കും തമിഴ്നാട് ഡിജിപ്പിക്കും അരവിന്ദാക്ഷന് പരാതി നല്കിയിട്ടുണ്ട്. കൂടാതെ തമിഴ്നാട് സര്ക്കാരിനും കേരള സര്ക്കാരിനും കേന്ദ്ര സംസ്ഥാന സെന്സര് ബോര്ഡുകള്ക്കും ചിത്രം പ്രദര്ശിപ്പിക്കുന്ന വിവിധ സംസ്ഥാനങ്ങള്ക്കും അരവിന്ദാക്ഷന് പരാതി നല്കി.
അതേസമയം, കേരളാ സ്റ്റോറി ഇന്ന് റിലീസ് ചെയ്യാനിരിക്കെ ജില്ലാ കളക്ടര്മാര്ക്കും ജില്ലാ പൊലീസ് മേധാവിമാര്ക്കും തമിഴ്നാട് സര്ക്കാര് ജാഗ്രതാ നിര്ദ്ദേശം നല്കി. സിനിമ റിലീസ് ചെയ്താല് ക്രമസമാധാന പ്രശ്നം ഉണ്ടാകാനിടയുണ്ടെന്ന തമിഴ്നാട് പൊലീസ് ഇന്റലിജന്സിന്റെ രഹസ്യാന്വേഷണ റിപ്പോര്ട്ടിനെ തുടര്ന്നാണിത്. സിനിമയുടെ പ്രദര്ശനം തടയാനുള്ള ആലോചന നിലവില് സര്ക്കാര് തലത്തിലില്ല.
https://www.facebook.com/Malayalivartha
