ഒരു വ്യാഴവട്ടത്തിനിടെ ബംഗാൾ ഉൾക്കടൽ കണ്ട ഏറ്റവും ഭീതിജനകമായ കാലാവസ്ഥാ പ്രതിഭാസങ്ങളിലൊന്നായി ‘അർണബ്’ ചുഴലിക്കാറ്റ് മാറിയിരിക്കുന്നു. കണക്കുകൂട്ടലുകളെയും പ്രവചനങ്ങളെയും തെറ്റിച്ച്, നിമിഷങ്ങൾക്കുള്ളിൽ ശക്തിയാർജിച്ച് ആന്ധ്രാതീരത്തേക്ക് പാഞ്ഞടുത്ത അർണബ്, കാലാവസ്ഥാ ശാസ്ത്രലോകത്തിന് മുന്നിൽ വലിയ ചോദ്യചിഹ്നങ്ങളാണ് ഉയർത്തുന്നത്. ഒക്ടോബർ 28-ന് പുലർച്ചെ 2 നും 4 നും ഇടയിൽ ആന്ധ്രാപ്രദേശ് തീരത്ത് കരതൊടുന്നതിന് തൊട്ടുമുൻപ് വരെ ഈ ചുഴലിക്കാറ്റിന്റെ യഥാർഥ ശേഷി കൃത്യമായി പ്രവചിക്കാൻ ശാസ്ത്രലോകത്തിന് സാധിച്ചിരുന്നില്ല. പുറത്തെ മഴമേഘങ്ങൾ തീരത്തെ തൊടുമ്പോഴേക്കും പ്രതീക്ഷിച്ചതിനേക്കാൾ വേഗത്തിലാണ് അർണബ് തീരത്തേക്ക് ഇരച്ചെത്തിയത്.

ഈ പെട്ടെന്നുള്ള ശക്തിപ്രാപിക്കൽ ഔദ്യോഗിക പ്രവചനങ്ങളെയും കാലാവസ്ഥാ മോഡലുകളെയും അമ്പരപ്പിച്ചു. പല മുൻനിര മോഡലുകളും കാറ്റിന്റെ വേഗവും തീവ്രതയും ഇത്രയധികം വർധിക്കുമെന്ന് മുൻകൂട്ടി കണ്ടിരുന്നില്ല. ചുഴലിക്കാറ്റ് കരതൊടുന്നതിന് മണിക്കൂറുകൾക്ക് മുൻപ് മാത്രമാണ് ഇതിന്റെ യഥാർഥ പ്രഹരശേഷി മനസ്സിലാക്കാൻ കഴിഞ്ഞത്, ഇത് ദുരന്ത നിവാരണ പ്രവർത്തനങ്ങൾക്ക് ലഭിച്ച സമയപരിധിയെ സാരമായി ബാധിച്ചു. കരയുമായുള്ള സമ്പർക്കം, സമുദ്രത്തിലെ ജലോപരിതല മാറ്റങ്ങൾ എന്നിവ കാരണം കാറ്റിന്റെ വേഗം കുറയാൻ സാധ്യതയുണ്ടെങ്കിലും, ആ കുറവ് എത്രത്തോളമായിരിക്കുമെന്നതിൽ ഇപ്പോഴും അനിശ്ചിതത്വം നിലനിൽക്കുന്നുണ്ട്. ശക്തി കുറഞ്ഞാൽ പോലും ശക്തമായ കാറ്റും കനത്ത മഴയും തീരദേശ വെള്ളപ്പൊക്കവും ഉണ്ടാക്കാൻ ഇത്തരം ചുഴലിക്കാറ്റുകൾക്ക് സാധിക്കും.

∙ എന്താണ് 'കാറ്റഗറി 4 ഡ്രിൽബിറ്റ്' ചുഴലിക്കാറ്റ്?സാഫിർ-സിംപ്സൺ ഹരിക്കെയ്ൻ വിൻഡ് സ്കെയിൽ പ്രകാരം കാറ്റഗറി 4 വിഭാഗത്തിൽ പെടുന്ന കാറ്റുകൾക്ക് മണിക്കൂറിൽ 200-250 കിലോമീറ്റർ വേഗതയുണ്ടാകും. എന്നാൽ ഈ സ്കെയിൽ സാധാരണയായി അറ്റ്ലാന്റിക്, കിഴക്കൻ പസിഫിക് സമുദ്രങ്ങളിലെ കാറ്റുകൾക്കാണ് ഉപയോഗിക്കുന്നത്. ഇന്ത്യയുടെ കാലാവസ്ഥാ വകുപ്പ് (ഐഎംഡി) ചുഴലിക്കാറ്റുകളെ തരംതിരിക്കാൻ വ്യത്യസ്തമായ ഒരു സംവിധാനമാണ് ഉപയോഗിക്കുന്നത്.

'ഡ്രിൽബിറ്റ്' എന്നത് ഔദ്യോഗിക കാലാവസ്ഥാ പദമല്ല, മറിച്ച് അനൗദ്യോഗികമായി ഉപയോഗിക്കുന്ന ഒരു വിവരണാത്മക പദം മാത്രമാണ്. ഡ്രില്ലിങ് യന്ത്രത്തിന്റെ അഗ്രം പോലെ വളരെ ചെറിയ വിസ്തൃതിയിൽ, എന്നാൽ വളരെ ശക്തമായ കാറ്റോടെ കേന്ദ്രീകരിച്ചിരിക്കുന്ന ചുഴലിക്കാറ്റുകളെയാണ് ഇത്തരത്തിൽ വിശേഷിപ്പിക്കുന്നത്. ഇത്തരം ഘടനയുള്ള കാറ്റുകൾക്ക് താരതമ്യേന ചെറിയ പ്രദേശത്ത് വലിയ തോതിലുള്ള നാശം വിതയ്ക്കാൻ കഴിയും. ഇന്ത്യൻ കാലാവസ്ഥാ വകുപ്പിന്റെ പ്രവചനപ്രകാരം അർണബ് ഒരു 'അതിതീവ്ര ചുഴലിക്കാറ്റ്' ആണ്. ഇതിന് നിലവിൽ 125-135 കിലോമീറ്റർ വേഗതയുണ്ട്. ഇന്ത്യയുടെ മാനദണ്ഡപ്രകാരം ഒരു സൂപ്പർ സൈക്ലോൺ ആകണമെങ്കിൽ കുറഞ്ഞത് 222 കിലോമീറ്റർ വേഗം ആവശ്യമാണ്.

∙ എന്തുകൊണ്ടാണ് അർണബ് ഇത്ര പെട്ടെന്ന് ശക്തിയാർജിച്ചത്?ചുഴലിക്കാറ്റുകൾക്ക് പ്രധാനമായും ഊർജം ലഭിക്കുന്നത് ചൂടുള്ള സമുദ്രജലത്തിൽ നിന്നാണ്. സമുദ്രത്തിലെ വെള്ളം ആവിയായി അന്തരീക്ഷത്തിൽ മേഘങ്ങളായി മാറുമ്പോൾ പുറന്തള്ളപ്പെടുന്ന താപം ചുഴലിക്കാറ്റിന്റെ ശക്തി വർധിപ്പിക്കുന്നു. ഈ പ്രക്രിയയെ വേഗത്തിലാക്കുന്ന ഒട്ടേറെ ഘടകങ്ങൾ ഉണ്ട്. ഉയർന്ന സമുദ്ര താപനില ചുഴലിക്കാറ്റിന് ആവശ്യമായ ഊർജവും ഈർപ്പവും നൽകുന്നു. എൽനിനോ പ്രതിഭാസം സമുദ്രത്തിലെ ജലം കൂടുതൽ ചൂടാക്കാൻ കാരണമായിട്ടുണ്ട്, ഇത് മുഴുവൻ സിസ്റ്റത്തിലേക്കും അധിക ഊർജം നൽകിയിരിക്കാം. അന്തരീക്ഷത്തിന്റെ വിവിധ ഉയരങ്ങളിലുള്ള കാറ്റ് ഒരേ ദിശയിലായിരിക്കുമ്പോൾ, ചുഴലിക്കാറ്റിന്റെ ഘടന തകരാതെ കൂടുതൽ ശക്തമായി നിലനിൽക്കാൻ സാധിക്കുന്നു.

കാറ്റിന്റെ കേന്ദ്രഭാഗം വളരെ കൃത്യമായി സംഘടിക്കപ്പെട്ടിട്ടുണ്ടെങ്കിൽ, മർദം കുറയുമ്പോൾ കാറ്റിന്റെ വേഗം പെട്ടെന്ന് വർധിക്കും. ഈർപ്പമുള്ള വായുവും ശക്തമായ ഇടിമിന്നലുകളും ചുഴലിക്കാറ്റിന്റെ തീവ്രത പെട്ടെന്ന് വർധിപ്പിക്കുന്നു. സമുദ്രത്തിലെ മാറ്റങ്ങളും കാറ്റിന്റെ ഗതിയും പെട്ടെന്ന് മാറിമറിയുന്നതിനാൽ ഇത്തരം കാറ്റുകൾ കൃത്യമായി പ്രവചിക്കുന്നത് കാലാവസ്ഥാ നിരീക്ഷകർക്ക് വലിയ വെല്ലുവിളിയാണ്.

∙ കരതൊട്ട ശേഷം എന്ത് സംഭവിക്കും?അർണബ് കരയിലേക്ക് പ്രവേശിക്കുമ്പോൾ കരയുമായുള്ള ഘർഷണം, ചൂടുള്ള സമുദ്രജലവുമായുള്ള സമ്പർക്കം നഷ്ടപ്പെടൽ എന്നിവ കാരണം സ്വാഭാവികമായും ശക്തി കുറയാൻ തുടങ്ങും. സമുദ്രത്തിന്റെ അടിത്തട്ടിലെ തണുത്ത വെള്ളം മുകളിലേക്ക് വരുന്നതും കാറ്റിന്റെ ശക്തി കുറയ്ക്കാൻ കാരണമാകും.

എന്നാൽ കാറ്റിന്റെ ശക്തി കുറയുന്നു എന്നത് കൊണ്ട് അപകടം പൂർണമായി ഒഴിവാകുന്നില്ല. കനത്ത മഴ ഉൾനാടുകളിൽ പെട്ടെന്നുള്ള വെള്ളപ്പൊക്കത്തിന് കാരണമാകാം. കൂടാതെ ശക്തമായ കാറ്റും വലിയ തിരമാലകളും യാത്രകളെയും തീരദേശവാസികളുടെ ജീവിതത്തെയും സാരമായി ബാധിക്കും. ഈ ദുരന്തം നൽകുന്ന പാഠങ്ങൾ ഉൾക്കൊണ്ട് ഭാവിയിൽ കൂടുതൽ കൃത്യമായ മുൻകരുതലുകൾ എടുക്കേണ്ടത് അത്യാവശ്യമാണ്.