കോഴിക്കോട് നടന്നുവരുന്ന സംസ്ഥാന സ്‌കൂള്‍ കായികമേളയില്‍ പ്രായത്തട്ടിപ്പ് നടന്നതായി സ്ഥിരീകരിച്ചു. കോട്ടയം ജില്ലയിലെ കോരുത്തോട് സി.കെ.എം.എച്ച്.എസ്.എസ് സ്‌കൂളിലെ വിദ്യാര്‍ത്ഥിയാണ് പരിശോധനയില്‍ പരാജയപ്പെട്ടത്. ; 14 വയസിന് താഴെയുള്ളവര്‍ പങ്കെടുക്കുന്ന സബ് ജൂനിയര്‍ വിഭാഗത്തില്‍ പങ്കെടുത്ത വിദ്യാര്‍ക്ക് പ്രായം15നും 18നും ഇടയിലെന്ന് റിപ്പോര്‍ട്ട്. ഈ വര്‍ഷം ഉത്തര്‍പ്രദേശില്‍ നിന്ന് കേരളത്തിലെത്തിയ കുട്ടിയാണിത്. എല്ല് പരിശോധനയിലാണ് പ്രായം തെളിഞ്ഞത്. സബ് ജൂനിയര്‍ 400 മീറ്ററില്‍ ഈ വിദ്യാര്‍ത്ഥി സ്വര്‍ണം നേടിയിരുന്നു. ഇതോടെ ഈ വിദ്യാര്‍ത്ഥിയെ അയോഗ്യനാക്കി വെള്ളി മെഡല്‍ നേടിയ താരത്തിന് സ്വര്‍ണം നല്‍കാന്‍ തീരുമാനമായി.

കോതമംഗലം മാര്‍ ബേസില്‍ സ്‌കൂളാണ് പ്രായത്തട്ടിപ്പ് നടന്നുവെന്ന പരാതി നല്‍കിയത്. 14 വയസിന് താഴെയുള്ളവര്‍ പങ്കെടുക്കുന്ന സബ് ജൂനിയര്‍ വിഭാഗത്തിലാണ് വ്യാജ പ്രായം കാണിച്ച് താരം പങ്കെടുത്തത്. എന്നാല്‍, മെഡിക്കല്‍ റിപ്പോര്‍ട്ട് പ്രകാരം താരത്തിന് 15നും 18നും ഇടയില്‍ പ്രായമുണ്ടെന്ന് തെളിഞ്ഞു. സംസ്ഥാന സ്‌കൂള്‍ കായികമേളയുടെ ചരിത്രത്തില്‍ ആദ്യമായാണ് എല്ലുപരിശോധനയിലൂടെ പ്രായത്തട്ടിപ്പ് കണ്ടെത്തുന്നത്.

രേഖകള്‍ പ്രകാരം 2014ല്‍ ജനിച്ചതാണെന്ന് കാണിച്ച താരം യഥാര്‍ത്ഥത്തില്‍ 2012ലാണ് ജനിച്ചതെന്ന് കണ്ടെത്തുകയായിരുന്നു. പ്രായത്തട്ടിപ്പ് സ്ഥിരീകരിച്ചതോടെ താരത്തെ കായികമേളയില്‍ നിന്ന് അയോഗ്യനാക്കാന്‍ തീരുമാനിച്ചു. നിലവില്‍ 400 മീറ്റര്‍ മത്സരത്തിന്റെ ഫലം തടഞ്ഞുവെച്ചിരിക്കുകയാണ്.