മുഖ്യമന്ത്രി ഉമ്മന്‍ചാണ്ടിയെ രക്ഷിക്കാന്‍ പൊലീസ് ക്വാറി മുതലാളി ശ്രീധരന്‍ നായരെ കുടുക്കി. അതിന്റെ അടിസ്ഥാനത്തിലാണ് സോളാര്‍ തട്ടിപ്പില്‍ മുഖ്യമന്ത്രിക്ക് പങ്കില്ലെന്ന് ശ്രീധരന്‍ നായര്‍ മൊഴി നല്‍കിയെന്ന് പൊലീസ് കോടതിയില്‍ റിപ്പോര്‍ട്ട് നല്‍കിയത്. 

ചെങ്ങന്നൂര്‍ ഡി.വൈ.എസ്.പി ഓഫീസില്‍ വച്ച് ചോദ്യം ചെയ്തപ്പോള്‍ കോടതിയില്‍ കൊടുത്ത രഹസ്യമൊഴിയില്‍ ഉറച്ചു നില്‍ക്കുന്നുണ്ടോ എന്ന് പൊലീസ് ചോദിച്ചു. ഉറച്ചു നില്‍ക്കുന്നെന്ന് മറുപടി നല്‍കി. തട്ടിപ്പില്‍ മുഖ്യമന്ത്രിക്ക് പങ്കുണ്ടോ എന്ന് കരുതുന്നുണ്ടോ എന്ന് വീണ്ടും ചോദിച്ചു. എന്നാല്‍ ശ്രീധരന്‍ നായര്‍ വ്യക്തമായ മറുപടി പറഞ്ഞില്ല. ഇത് വച്ചാണ് പൊലീസ് റിപ്പോര്‍ട്ട് നല്‍കിയത്. എന്നിട്ട് ശ്രീധരന്‍ നായരും അദ്ദേഹത്തിന്റെ അഭിഭാഷകനും അറിയാതെ ഈ ദൃശ്യങ്ങള്‍ ക്യാമറയില്‍ പകര്‍ത്തി. 

ഈ ദൃശ്യങ്ങള്‍ ഉപയോഗിച്ച് മുഖ്യമന്ത്രിയെ രക്ഷിക്കാനാണ് പൊലീസ് നീക്കം നടത്തുന്നത്. അതേസമയം തട്ടിപ്പില്‍ മുഖ്യമന്ത്രിക്കും അദ്ദേഹത്തിന്റെ ഓഫീസിനും പങ്കുണ്ടെന്ന് 164ലാം വകുപ്പ് പ്രകാരം ശ്രീധരന്‍ നായര്‍ റാന്നി കോടതിയില്‍ മൊഴി നല്‍കിയിട്ടുണ്ട്. ഈ മൊഴിയും പൊലീസിനു നല്‍കിയ മൊഴിയും തമ്മില്‍ വൈരുദ്ധ്യമുണ്ടെന്ന് വരുത്തിത്തീര്‍ക്കാനാണ് ശ്രമം നടക്കുന്നത്.