വിവാഹ നിശ്ചയവും സേവ് ദി ഡേറ്റും വിവാഹവും മധുവിധുവും വരെ ഫോട്ടോയും വീഡിയോയുമാക്കി നാടായ നാട്ടിലെല്ലാം കാണുന്ന വിധത്തില്‍ ഇന്‍സ്റ്റയിലും ഫേസ്ബുക്കിലുമൊക്കെ പോസ്റ്റുന്നവര്‍ക്ക് അടുത്തിടെയാണ് വിവാഹ മോചനത്തിന്റെ പുതിയ ആഘോഷവും എത്തിയത്. . തമിഴ് സീരിയല്‍ താരവും ഫാഷന്‍ ഡിസൈനറുമായ ശാലിനിയാണ് തന്റെ വിവാഹ മോചനം 'ഗംഭീരമായി' ആഘോഷിച്ചത്. ഭര്‍ത്താവുമൊന്നിച്ചുള്ള ചിത്രങ്ങള്‍ വലിച്ചു കീറിയും ഡിവോഴ്സ് എന്നെഴുതിയ അക്ഷരങ്ങല്‍ ചേര്‍ത്തു പിടിച്ചും ചുവന്ന വസ്ത്രത്തില്‍ ആഘോഷമാക്കുന്ന ശാലിനി ഇതിനകം സോഷ്യല്‍ മീഡിയ ഡൈവോഴ്‌സ് താരമായിട്ടുണ്ട്.

മോശം ദാമ്പത്യം അവസാനിപ്പിക്കുന്നതില്‍ തെറ്റൊന്നുമില്ലെന്നും നിങ്ങള്‍ക്ക് സന്തോഷവതിയായിരിക്കാന്‍ അവകാശമുണ്ടെന്നും പറഞ്ഞുകൊണ്ടുള്ള കുറിപ്പും ശാലിനി തന്റെ ഫോട്ടോകള്‍ക്കൊപ്പം ഇന്‍സ്റ്റാഗ്രാമില്‍ എഴുതിയിട്ടുണ്ട്. എന്നാല്‍ എല്ലായിടത്തും ഒരു പോലെ ട്രെന്‍ഡാണ് പ്രീ വെഡ്ഡീംഗ് ഫോട്ടോ ഷൂട്ടും, വെഡ്ഡിംഗ് ഫോട്ടോ ഷൂട്ടും . മറ്റാരും ചെയ്യാത്ത തരത്തിലുള്ള ചിത്രങ്ങള്‍ തയ്യാറാക്കി നാലാളെ കാണിക്കാനായി നടത്തുന്ന കൂത്തുകളില്‍ അപ്രതീക്ഷിത മരണങ്ങളും അപകടങ്ങളും ധാരാളം നടന്നിട്ടുണ്ട്. ഇവിടെ ഛത്തീസ് ഗഡിലെ വനിത കമ്മിഷന്‍ ഇതൊക്കെ വിലിയിരുത്തിയാണ് പ്രീ വെഡ്ഡിംഗ് ഫോട്ടോ ഷൂട്ട് പെണ്‍കുട്ടികള്‍ അപകടമാണെന്നും അതൊഴിവാക്കണമെന്നും ആവശ്യപ്പെട്ടിരിക്കുന്നത്. യോയോ മോഡല്‍ വെഡ്ഡിംഗ് ഷൂട്ടുകളില്‍ കാണിക്കുന്ന കോപ്രായങ്ങള്‍ മാതാപിതാക്കളും നിയന്ത്രിക്കാന്‍ ബാധ്യസ്ഥരാണെന്നാണ് വനിത കമ്മിഷന്‍ പറയുന്നത്.

വിവാഹത്തിന് മുമ്പുള്ള ഫോട്ടോകളും വീഡിയോകളും ചിത്രീകരിക്കുന്ന പ്രവണത പെണ്‍കുട്ടികളുടെ ഭാവിക്ക് അപകടകരമാണെന്ന് ഛത്തീസ്ഗഢ് സംസ്ഥാന വനിതാ കമ്മീഷന്‍ അധ്യക്ഷ ഡോ. കിരണ്‍മയി നായകിന്റെ അഭിപ്രായം. കമ്മീഷനില്‍ എത്തിയ ഒരു കേസ് പരിഗണിക്കുന്നതിനിടെയായിരുന്നു വനിതാ കമ്മീഷന്‍ ചെയര്‍പേഴ്സണ്‍റെ പരാമര്‍ശം. വിവാഹത്തിന് മുമ്പ് പ്രീ വെഡിങ് ഫോട്ടോഷൂട്ടും, വീഡിയോ ഷൂട്ടുമെല്ലാം കഴിഞ്ഞതിന് ശേഷം വരന്റെ വീട്ടുകാര്‍ കല്യാണത്തില്‍ നിന്ന് പിന്മാറിയെന്നാണ് കേസ്.

വിവാഹത്തില്‍ നിന്ന് പിന്മാറിയതോടെ പെണ്‍ വീട്ടുകാര്‍ വിവാഹ ഒരുക്കങ്ങള്‍ക്കായി ചെലവഴിച്ച പണം തിരികെ നല്‍കാന്‍ വരന്റെ വീട്ടുകാര്‍ വിസമ്മതിച്ചു. ഇതിന് പുറമെ വരന്റെ കൂടെയെടുത്ത ഫോട്ടോകളില്‍ പെണ്‍കുട്ടിക്ക് ആശങ്കയുണ്ടായിരുന്നു. കമ്മീഷന്‍ ഇടപെട്ട് പണം തിരികെ വാങ്ങി വധുവിന്റെ വീട്ടുകാര്‍ക്ക് നല്‍കി. എടുത്ത എല്ലാ ഫോട്ടോകളും വീഡിയോകളും ഡിലീറ്റ് ചെയ്തിട്ടുണ്ടെന്ന് കമ്മിഷന്‍ ഉറപ്പാക്കുകയും ചെയ്തു.

ഇത്തരം സംസ്‌കാരം നമ്മുടെ സമൂഹത്തിന് നല്ലതല്ലെന്നും ആളുകള്‍ തെറ്റായ വഴിക്ക് പോകുമെന്നും അതിന്റെ അനന്തരഫലങ്ങള്‍ ഭാവിയില്‍ അപകടകരമാകുമെന്നും തോന്നുന്ന നിരവധി കേസുകള്‍ കമ്മീഷന്റെ മുന്നില്‍ വന്നിട്ടുണ്ട്. അതുകൂടി കണക്കിലെടുത്താണ് ഞാന്‍ ഇക്കാര്യം പറയുന്നത്. വിവാഹത്തിന് മുമ്പുള്ള ഷൂട്ടിംഗ് പെണ്‍കുട്ടികളുടെ ഭാവിക്ക് അപകടകരമാണ്, രക്ഷിതാക്കള്‍ ഇത്തരം പ്രവണത പ്രോത്സാഹിപ്പിക്കരുത്,' ചെയര്‍പേഴ്സണ്‍ പറഞ്ഞു. ഇത്തരത്തിലുള്ള കേസുകള്‍ ഉണ്ടെങ്കില്‍ ഉടന്‍ വനിതാ കമ്മീഷനെ സമീപിക്കണമെന്നും അവര്‍ പറഞ്ഞു. രാജ്യത്ത് മുഴുവന്‍ ഇതിന് നിയന്ത്രണം ഉണ്ടാക്കേണ്ടത് അത്യാവശ്യമാണെന്നും അവര്‍ കൂട്ടിച്ചേര്‍ത്തു.

കേരളത്തില്‍ ഏറെ വിവാദങ്ങള്‍ ക്ഷണിച്ചു വരുത്തിയിട്ടുണ്ട് പ്രീ വെഡ്ഡിംഗ് ഫോട്ടോ ഷൂട്ടുകള്‍. ലക്ഷങ്ങള്‍ ചിലവാക്കിയാണ് ഇത് നടത്തുന്നതെന്നത് ധൂര്‍ത്തിന്റെ മറ്റൊരു വശമാണ്. ഗുരുവായൂരില്‍ ആനയുടെ മുന്നില്‍ ഫോട്ടോ ഷൂട്ടു നടത്തിയപ്പോള്‍ പ്രകോപിതനായ ആന പാപ്പാന്റെ മുണ്ടുരുഞ്ഞെടുത്തു. ആറ്റിലും കുളത്തിലും ഡാമിലും മൊക്കെ നടത്തിയ ഈ പേക്കൂത്തില്‍ മരിച്ചത് നരവധി പേരാണ്. സഭ്യമല്ലാത്ത തരത്തില്‍ നഗ്ന പ്രദര്‍ശിപ്പിച്ചും ചുംബന രംഗങ്ങള്‍ ഉള്‍പ്പെടുത്തിയും ഫോട്ടോ ഷൂട്ടിലൂടെ വൈറലാകാന്‍ നോക്കിയവര്‍ ഇപ്പോഴും നിയമ നടപടികള്‍ നേരിടുകയാണ്. കേരളം വളരെ വിശദമായ ചര്‍ച്ചകള്‍ക്ക് വിധേയമാക്കിയതാണ് ഇത്തരം ഫോട്ടോ ഷൂട്ടുകള്‍ എന്നിട്ടും ഇവിടത്തെ വനിത കമ്മിഷന്‍ ഇത്തരം കാര്യങ്ങളില്‍ അഭിപ്രായം പ്രകടനം നടത്തിയിട്ടില്ലെന്നതും ശ്രദ്ധേയമാണ്.

പോലീസ് യൂണിഫോമില്‍ വനിത എസ് ഐ സേവ് ദി ഡേറ്റ് ഫോട്ടോ ഷൂട്ട് നടത്തിയതും കേരളത്തിലായിരുന്നു. കോഴിക്കോട് സിറ്റി പരിധിയിലെ പോലീസ്  സ്‌റ്റേഷനിലെ വനിത എസ് ഐ ആണ് യൂണിഫോമില്‍ ഫോട്ടോ ഷൂട്ട് നടത്തിയത്. യൂണിഫോമിനെ അപകീര്‍ത്തിപ്പെടുത്തിയ തരത്തിലായിരന്നു ആ ഫോട്ടോ ഷൂട്ടെന്ന് വിലിയിരുത്തപ്പെട്ടിരുന്നു. ന്യൂജെന്‍ ഫോട്ടോ ഷൂട്ടുകളെ കുറിച്ച് ഫെയ്‌സ് ബുക്ക് പോജിലൂടെ നിരന്തരം വിമര്‍ശനം നടത്തി കൊണ്ടിരുന്ന കേരള പോലീസിന് അപമാനമുണ്ടാക്കുന്നതായിരുന്നു വനിത എസ് ഐ യുടെ നടപടി . എന്നിട്ടും കേരളത്തിലെ വനിത കമ്മിഷന്‍ മിണ്ടിയിട്ടില്ല. അപകടങ്ങള്‍ ക്ഷണിച്ചു വരുത്തുന്ന സാഹസിക പ്രീ വെഡിംഗ് ഫോട്ടോ ഷൂട്ടുകള്‍ നിയമം കൊണ്ട് നിരോധിക്കേണ്ട സമയം കഴിഞ്ഞെന്നാണ് ഛത്തീസ്ഗഡ് വനിത കമ്മിഷന്‍ ഓര്‍മ്മിപ്പിക്കുന്നത്.