കൊല്ലം ഉളിയക്കോവിലില്‍ മരുന്നു സംഭരണശാലയില്‍ വന്‍ തീപിടിത്തം. കേരള മെഡിക്കല്‍ സര്‍വീസ് കോര്‍പ്പറേഷന്റെ ജില്ലാ മരുന്നുസംഭരണശാലയിലാണ് തീപിടിച്ചത്. ഗോഡൗണ്‍ പൂര്‍ണമായും കത്തിനശിച്ചു. കടപ്പാക്കട, ചാമക്കട, കുണ്ടറ, ചവറ എന്നിവിടങ്ങളില്‍ നിന്നായി 15 യൂണിറ്റ് ഫയര്‍ഫോഴ്‌സെത്തി. പുലര്‍ച്ചെ ഒരു മണിയോടെയാണ് അഗ്‌നിബാധ പൂര്‍ണമായും നിയന്ത്രണ വിധേയമാക്കിയത്


കെട്ടിടങ്ങള്‍ക്കുള്ളില്‍ തീ നിറഞ്ഞു കത്തുന്നതിനാല്‍ അഗ്നിരക്ഷാസേനയ്ക്ക് ഉള്ളിലേക്കുകടന്ന് തീ കെടുത്താനാകാത്തത് രക്ഷാപ്രവര്‍ത്തനത്തെ ബുദ്ധിമുട്ടിലാക്കിയിരുന്നു. സാനിറ്റൈസറുകളുള്‍പ്പെടെ ഉള്ളതിനാല്‍ പല ഭാഗത്തും തീ നിയന്ത്രണാതീതമായി പടരുന്ന സ്ഥിതിയാണ്. വലിയ ശബ്ദത്തോടെ പൊട്ടിത്തെറികളും കേള്‍ക്കാമായിരുന്നു. കെട്ടിടത്തിന്റെ ഷീറ്റുകള്‍ ശബ്ദത്തോടെ കത്തി പുറത്തേക്ക് തെറിച്ചുവീണത്.

മരുന്നുകത്തിയ പുക ശ്വസിച്ച സമീപത്തെ മഹാത്മാഗാന്ധി കോളനിയിലെ നിരവധിപേര്‍ക്ക് ദേഹാസ്വാസ്ഥ്യമുണ്ടായി. ഇന്നലെ രാത്രി 8.45-നാണ് തീപ്പിടിത്തമുണ്ടായത്. പാര്‍ക്കിങ് ഏരിയയ്ക്കുസമീപം ബ്ലീച്ചിങ് പൗഡര്‍ സൂക്ഷിച്ചിരുന്ന ഭാഗത്താണ് ആദ്യം തീപിടിച്ചതെന്നാണ് കരുതുന്നത്. നിമിഷങ്ങള്‍കൊണ്ട് തീ കെട്ടിടങ്ങളിലേക്ക് പടര്‍ന്നു.

കടപ്പാക്കടയില്‍നിന്നും തുടര്‍ന്ന് ചാമക്കടയില്‍നിന്നും അഗ്നിരക്ഷാസേനയെത്തിയെങ്കിലും തീ കെടുത്താനാകാതെവന്നതോടെ ജില്ലയിലെ എല്ലാ അഗ്നിരക്ഷാനിലയങ്ങളില്‍നിന്നും മുഴുവന്‍ യൂണിറ്റുകളും മണിക്കൂറുകള്‍ക്കുള്ളില്‍ സ്ഥലത്തെത്തി. ജില്ലാഭരണകൂടം ആവശ്യപ്പെട്ടതനുസരിച്ച് കെ.എം.എം.എല്ലില്‍നിന്നും തിരുവനന്തപുരം വിമാനത്താവളത്തില്‍നിന്നുമുള്ള അഗ്നിരക്ഷാസേനയും എത്തി.
അതേസമയം അഗ്‌നിബാധയെ തുടര്‍ന്നുണ്ടായ വിഷവാതകം ശ്വസിച്ച് എം.ജി കോളനിയിലും പരിസരത്തുമുള്ള കുട്ടികളും മുതിര്‍ന്നവരുമടക്കം 15 ഓളം പേരെ ജില്ലാ ആശുപത്രിയില്‍ പ്രവേശിച്ചെങ്കിലും ഇവര്‍ക്ക് കാര്യമായ ആരോഗ്യ പ്രശ്‌നങ്ങളൊന്നുമില്ല. തീ പെട്ടെന്ന് നിയന്ത്രണ വിധേയമാകില്ലെന്ന ആശങ്ക പടര്‍ന്നതിനെ തുടര്‍ന്ന് എം.ജി കോളനിയിലെയും പരിസരത്തെയും 75 കുടുംബങ്ങളെ പ്രദേശത്ത് നിന്ന് ഒഴിപ്പിച്ചിട്ടുണ്ടായിരുന്നു.