അലപ്പുഴയിൽ താമസസ്ഥലത്ത് കഞ്ചാവ് ചെടികൾ നട്ടുപിടിപ്പിച്ച ഇതരസംസ്ഥാന തൊഴിലാളി പിടിയിൽ. പശ്ചിമ ബംഗാൾ സ്വദേശിയായ അമിത് റോയിയാണ് കായംകുളത്ത് അറസ്റ്റിലായത്. രഹസ്യവിവരത്തെ തുടർന്ന് എക്സൈസ് സംഘത്തിന്റെ പരിശോധനയിൽ റെയിൽവേ സ്റ്റേഷന് സമീപത്തെ വീട്ടിൽ നിന്ന് 10 കഞ്ചാവ് ചെടികൾ കണ്ടെത്തി. കഴിഞ്ഞ കുറച്ച് ദിവസങ്ങളായി ഇയാള്‍ എക്സൈസിന്‍റെ നിരീക്ഷണത്തിലായിരുന്നു.

അതേസമയം എറണാകുളത്ത് വീട്ടുവളപ്പിൽ കഞ്ചാവ് ചെടികൾ കണ്ടെത്തിയ സംഭവവുമായി ബന്ധപ്പെട്ട് ഒരാൾ അറസ്റ്റിലായി. കുട്ടമ്പുഴ മാമലകണ്ടം അഞ്ചുകുടി ഗിരിജൻ സെറ്റിൽമെന്റ് കോളനി സ്വദേശി മുത്തു രാമകൃഷ്ണനാണ് അറസ്റ്റിലായത്. സ്വന്തം പുരയിടത്തിൽ നട്ടുവളർത്തിയ 9 കഞ്ചാവ് ചെടികൾ ആണ് ഇയാളുടെ പക്കൽ നിന്നും കണ്ടെടുത്തത്.