ബസുകളിലെ വേഗപ്പൂട്ട് പരിശോധനയില്‍ പ്രതിഷേധിച്ച്‌ സംസ്ഥാനത്ത് തിങ്കളാഴ്ച മുതല്‍ സ്വകാര്യ ബസുകള്‍ അനിശ്ചിതകാല പണിമുടക്കിലേക്ക്‌
സംസ്ഥാനത്ത് തിങ്കളാഴ്ച മുതല്‍ സ്വകാര്യ ബസുകള്‍ അനിശ്ചിതകാല പണിമുടക്ക് നടത്തും. മലപ്പുറം അപകടത്തെ തുടര്‍ന്ന് വേഗപ്പൂട്ട് സ്ഥാപിക്കാത്ത ബസുകള്‍ക്കെതിരെ മോട്ടോര്‍ വാഹന വകൂപ്പ് നടപടിയെടുക്കുന്നതില്‍ പ്രതിഷേധിച്ചാണ് സമരം. വേഗപ്പൂട്ടിന് സര്‍ക്കാര്‍ ബദല്‍ സംവിധാനം ഏര്‍പ്പെടുത്തണമെന്നും സര്‍ക്കാരുമായി ചര്‍ച്ചയ്ക്ക് തയ്യാറാണെന്നും ബസ്സുടമകള്‍ അറിയിച്ചു. സംസ്ഥാനത്തെ നിലവിലെ വേഗമാനക സംവിധാനങ്ങള്‍ കാര്യക്ഷമമല്ല. 2005ല്‍ വേഗമാനക സംവിധാനങ്ങള്‍ നടപ്പാക്കുമ്പോള്‍ നിശ്ചയിച്ച പതിഞഞ്ച് കമ്പനികളില്‍ 13 എണ്ണവും നിഷ്‌ക്രിയമാണ്. അതിനാല്‍ അറ്റകുറ്റപ്പണി നടത്താനാകില്ല. സര്‍ക്കാര്‍ ഉത്തരവാദിത്വം ഏറ്റെടുത്ത് കെല്‍ട്രോണ്‍ മുഖേന വേഗമാനകം തയ്യാറാക്കി നല്‍കണമെന്നും ഉടമകള്‍ ആവശ്യപ്പെട്ടു.
മോട്ടോര്‍വാഹന പരിശോധനയെ തുടര്‍ന്ന് സംസ്ഥാനത്ത് 30 ശതമാനം ബസുകള്‍ ഇപ്പോള്‍ സര്‍വ്വീസ് നടത്തുന്നില്ല. കര്‍ണാടക, തമിഴ്‌നാട് എന്നിവിടങ്ങളില്‍ നിന്നെത്തുന്ന ബസുകള്‍ വേഗമാനകങ്ങള്‍ ഇല്ലാതെയാണ് സംസ്ഥാനത്ത് സര്‍വ്വീസ് നടത്തുന്നത്.
ട്രാന്‍സ്‌പോര്‍ട് കമ്മീഷണര്‍ ഋഷിരാജ് സിംഗിന്റെ നിര്‍ദേശത്തെ തുടര്‍ന്നാണ് സംസ്ഥാനത്തിന്റെ വിവിധ ഭാഗങ്ങളില്‍ മോട്ടോര്‍ വാഹന വകുപ്പ് പരിശോധന നടത്തിയത്. പരിശോധന നടത്തിയ ബസ്സുകളില്‍ അമ്പത് ശതമാനവും ഒന്നുകില്‍ സ്പീഡ് ഗവേര്‍ണര്‍ ഇല്ലാത്തവയോ അല്ലെങ്കില്‍ പ്രവര്‍ത്തിക്കാത്തവയോ ആയിരുന്നു. ഇതേതുടര്‍ന്ന് വേഗപ്പൂട്ട് പ്രവര്‍ത്തിക്കാത്ത ബസുകളുടെ ഇന്നത്തെ സര്‍വീസ് റദ്ദാക്കുകയും വേഗപ്പൂട്ട് ഇല്ലാത്ത ബസ്സുകളുടെ ഫിറ്റ്‌നസ് സര്‍ട്ടിഫിക്കറ്റുകള്‍ റദ്ദാക്കുകയും ചെയ്തു.
റോഡപകടങ്ങളുടെ മറ്റൊരു കാരണം റോഡുകളുടെ ശോച്യാവസ്ഥയാണെന്നും ബസുടമകള്‍ ആരോപിക്കുന്നു. ബസ്സ് സമരത്തിന്റെ പശ്ചാത്തലത്തില്‍ എംജി യൂണിവേഴ്‌സിറ്റി നാളെ നടത്താനിരുന്ന എല്ലാ പരീക്ഷകളും അഭിമുഖകളും മാറ്റിവെച്ചു.
മലപ്പുറം അപകടത്തിന്റെ പശ്ചാത്തലത്തില്‍ സംസ്ഥാനത്തിന്റെ വിവിധ ഭാഗങ്ങളില്‍ ഇന്നലെ മോട്ടോര്‍ വാഹനവകുപ്പ് ബസ്സുകളിലെ വേഗപ്പൂട്ട് പരിശോധന കര്‍ശനമാക്കിയിരുന്നു കോഴിക്കോട്, കൊച്ചി, ഇടുക്കി ജില്ലകളില്‍ നടത്തിയ പരിശോധനകളില്‍ നൂറിലധികം ബസ്സുകളുടെ സര്‍വ്വീസ് തടയുകയും നിരവധി ബസ്സുകളുടെ പെര്‍മിറ്റ് റദ്ദാക്കുകയും ചെയ്തു.
അതേസമയം വിനായക ചതുര്‍ത്ഥി പ്രമാണിച്ച് കാസര്‍ഗോഡ് ജില്ലയില്‍ നാളെ സമരം ഉണ്ടായിരിക്കില്ലെന്ന് ബസ് ഉടമകള്‍ അറിയിച്ചു. സ്വകാര്യബസുകള്‍ക്ക് എതിരെ നടപടി എടുക്കുമ്പോള്‍ കെഎസ്ആര്‍ടിസി ബസുകള്‍ക്കെതിരെ നടപടി എടുക്കുന്നില്ലെന്നും ബസുടമകള്‍ ചൂണ്ടിക്കാണിച്ചു.
https://www.facebook.com/Malayalivartha
