സോളാര്‍ തട്ടിപ്പില്‍ മുഖ്യമന്ത്രി ഉമ്മന്‍ചാണ്ടിക്ക് 30 ശതമാനം കമ്മീഷന്‍ നല്‍കാനായിരുന്നു ബിജുരാധാകൃഷ്ണന്‍ പദ്ധതിയിട്ടിരുന്നതെന്ന് ആരോപണം. സരിതയും ബിജു രാധാകൃഷ്ണും കബളിപ്പിച്ച പി.കെ ബാബു രാജനാണ് ആരോപണവുമായി രംഗത്തെത്തിയത്. കമ്മീഷന്റെ കാര്യം  ബിജൂ രാധാകൃഷ്ണന്‍ തന്നോട് പറഞ്ഞതായി ഇയാള്‍ പറഞ്ഞു. 830 കോടി രൂപയുടെ 30 ശതമാനമാണ് മുഖ്യമന്ത്രിക്ക് നല്‍കണമെന്ന് ബിജു പറഞ്ഞത്.  ബാബുരാജനില്‍ നിന്നും 1.9 കോടി രൂപയാണ് ബിജുവും സരിതയും പറ്റിച്ചത്.

തുക വാങ്ങാന്‍ വന്നപ്പോള്‍ മുഖ്യമന്ത്രിയുടെ ഒപ്പിട്ട കത്തും, പാരമ്പര്യേതര ഊര്‍ജ്ജ മന്ത്രാലയത്തിന്റെ കത്തും കാണിച്ചെന്ന് ബാബുരാജ് ആരോപിച്ചു. മുഖ്യമന്ത്രി കമ്മീഷന്‍ തുക കുറഞ്ഞ പലിശക്ക് ടീം സോളാറിന് വായ്പയായി നല്‍കുമെന്നും ബിജു പറഞ്ഞു. ലെറ്റര്‍പാഡും ശരിയായ ഒപ്പുമാണ് തന്നെ കാണിച്ചതെന്നും ഇതെങ്ങനെ വ്യാജമാണെന്ന് കരുതാനാകുമെന്നും ബാബുരാജ് ചോദിക്കുന്നു. 

കേസില്‍ ഇപ്പോള്‍ അന്വേഷണം ഒന്നും നടക്കുന്നില്ലെന്നും കുറ്റപത്രം സമര്‍പ്പിക്കാന്‍ പോലും പോലീസ് തയ്യാറാകുന്നില്ല. ഖജനാവിന് നഷ്ടം ഉണ്ടായില്ലെന്ന മുഖ്യമന്ത്രിയുടെ പ്രസ്താവന ശരിയല്ല. പൗരന്മാര്‍ കബളിപ്പിക്കപ്പെട്ടാല്‍ അവരെ സംരക്ഷിക്കേണ്ട ഉത്തരവാദിത്തം സര്‍ക്കാറിനില്ലേയെന്നും ബാബുരാജ് ചോദിച്ചു.

മുഖ്യമന്ത്രിയ്ക്കുള്ള തുക മുത്തൂറ്റില്‍ ഇടട്ടെയെന്ന് ചോദിച്ചപ്പോള്‍, അങ്ങനെ വേണ്ടെന്നും അതുവഴിയാണെങ്കില്‍ പുറത്തറിയുമെന്നുമാണ് ബിജു പറഞ്ഞത്. കേസില്‍ അന്വേഷണം നടക്കുന്നില്ലെന്ന് കാണിച്ച് ഹൈക്കോടതിയെ സമീപിക്കുമെന്നും ബാബുരാജ് പറഞ്ഞു.