നിറകണ്ണുകളോടെ ആ മാതാപിതാക്കള്‍ മകന്റെ കണ്ണുകള്‍ ദാനം ചെയ്‌തു
ഇമ്മാനുവലിന്റെ കണ്ണുകള്‍ വെളിച്ചം പകര്‍ന്ന്‌ ഇനിയും ജീവിയ്‌ക്കും. ഇന്നലെ അന്തരിച്ച മകന്റെ കണ്ണുകള്‍ ദാനം ചെയ്യാന്‍ മോന്‍സ്‌ ജോസഫ്‌ എം.എല്‍.എയും ഭാര്യ സോണിയയും തീരുമാനിച്ചു. ആറാം ക്ലാസ് വിദ്യാര്‍ഥിയായ ഇമ്മാനുവലിന്റെ കഴുത്തില്‍ ഷോള്‍ കുരുങ്ങിയാണ് മരിച്ചത്. രാവിലെ കളിക്കുന്നതിനിടെ ഇമ്മാനുവലിന്റെ കഴുത്തില്‍ ഷോള്‍ കുരുങ്ങുകയായിരുന്നുവെന്ന് ബന്ധുക്കള്‍ പറഞ്ഞു.
ഇമ്മാനുവലിന്റെ കണ്ണുകള്‍ കോട്ടയം മെഡിക്കല്‍ കോളേജിലെ നേത്രബാങ്കിലേക്കാണ്‌ ദാനം ചെയ്‌തത്‌. മുന്‍ഗണനാ ക്രമത്തിലായിരിക്കും അനുയോജ്യരായവര്‍ക്ക്‌ കണ്ണുകള്‍ നല്‍കുകയെന്ന്‌ നേത്രവിഭാഗം മേധാവി ഡോ.ശേഷാദ്രിനാഥന്‍ അറിയിച്ചു.
തിങ്കളാഴ്ചത്തെ പരീക്ഷയ്ക്ക് പഠിച്ചുകൊണ്ടിരിക്കെ ഇടവേളയില്‍ കളിക്കാന്‍ പോയതായിരുന്നു ഇമ്മാനുവല്‍ . തുടര്‍ന്ന് രാവിലെ എട്ടരയോടെ വീട്ടിലെ മുറിക്കകത്താണ് മരിച്ചനിലയില്‍ കണ്ടെത്തിയത്. രാവിലെ പള്ളിയില്‍ പോയി വന്നശേഷം വീട്ടിനുള്ളിലെ മുറിയില്‍ കയറിയ ഇമ്മാനുവേല്‍ പുറത്തുവരാതായതിനെ തുടര്‍ന്ന് മുറി തുറന്നു നോക്കിയപ്പോഴാണ് കഴുത്തില്‍ ഷോള്‍ കുരുങ്ങികിടക്കുന്നത് കണ്ടത്.
തുടര്‍ന്ന് ആശുപത്രിയിലും എത്തിച്ചെങ്കിലും മരണം സംഭവിച്ചിരുന്നു. മുട്ടുചിറ മിഷന്‍ ആശുപത്രിയില്‍ പൊതുദര്‍ശനത്തിന് വച്ച മൃതദേഹത്തില്‍ നിരവധി രാഷ്ട്രീയ നേതാക്കളും നാട്ടുകാരും അന്ത്യോപചാരമര്‍പ്പിച്ചു. സംസ്‌കാരം കടുത്തുരുത്തി സെന്റ്‌ മേരീസ്‌ താഴത്തു പള്ളിയില്‍ നടക്കും. എട്ടാം ക്ലാസ് വിദ്യാര്‍ത്ഥിനി മരിയയാണ്‌ ഇമ്മാനുവലിന്റെ സഹോദരി.
https://www.facebook.com/Malayalivartha
