ചാണ്ടി ഉമ്മനെ സ്ഥാനാര്‍ത്ഥിയാക്കി വിജയ പ്രതീക്ഷ പുലര്‍ത്തിയ കോണ്‍ഗ്രസിന് തുടക്കത്തിലേ പാളുന്നു. ഇടത് മുന്നണിയുടെ അപ്രതീക്ഷിത ചടുല നീക്കത്തില്‍ ഞെട്ടി കോണ്‍ഗ്രസ്. പുതുപ്പള്ളിയില്‍ ഉമ്മന്‍ചാണ്ടിയുടെ വിശ്വസ്തനായ നേതാവിനെ മത്സരിപ്പിക്കാനുളള നീക്കം ഏത് വിധേനെയും തടയാന്‍ കോണ്‍ഗ്രസ് ശ്രമം. സിപിഎം ചര്‍ച്ചകള്‍ നടത്തുന്നുവെന്ന വിവരം പുറത്ത് വന്നതിന് പിന്നാലെ ഉമ്മന്‍ചാണ്ടിയുടെ വിശ്വസ്തന്‍ കൂടിയായ ഈ നേതാവിനെ പിന്തിരിപ്പിക്കാനാണ് കോണ്‍ഗ്രസ് ശ്രമിക്കുന്നത്.

ഉമ്മന്‍ചാണ്ടിയുടെ കുടുംബാംഗങ്ങള്‍ ഇദ്ദേഹവുമായി സംസാരിച്ചു. കോണ്‍ഗ്രസിന്റെ മുതിര്‍ന്ന നേതാക്കളും സംസാരിച്ചതായാണ് സൂചന. രാഷ്ട്രീയ കേരളത്തെയാകെ ഞെട്ടിച്ച്, പുതുപ്പള്ളിയില്‍ വമ്പന്‍ രാഷ്ട്രീയ കരുനീക്കമാണ് ഇടതുമുന്നണിയുടെ ഭാഗത്ത് നിന്നുമുണ്ടായത്. സിപിഎം സ്ഥിരമായി മത്സരിച്ചിരുന്ന സീറ്റില്‍ ഇക്കുറി ഉമ്മന്‍ചാണ്ടിയുടെ വിശ്വസ്തനെ മത്സരിപ്പിക്കാനാണ് ഇടത് മുന്നണി ആലോചിക്കുന്നത്. പുതുപ്പള്ളിയിലെ ഒരു ജനപ്രതിനിധിയായ ഇദ്ദേഹത്തിന്റെ പേര് പുറത്തുവിട്ടിട്ടില്ല.

നേരത്തെ ജയ്ക് സി തോമസ് അടക്കം മൂന്ന് സിപിഎം നേതാക്കളുടെ പേര് പാര്‍ട്ടി പരിഗണിക്കുന്നുവെന്നാണ് വാര്‍ത്തകള്‍ വന്നിരുന്നത്. എന്നാല്‍ ഇതില്‍ നിന്നെല്ലാം വ്യത്യസ്തമായി മണ്ഡലത്തിലേക്ക് കോണ്‍ഗ്രസുമായും ഉമ്മന്‍ചാണ്ടിയുമായും അടുത്തബന്ധമുള്ള ഒരു അപ്രതീക്ഷിത സ്ഥാനാര്‍ത്ഥിയെ എത്തിക്കാനുള്ള ശ്രമമാണ് ഇടത് മുന്നണിയുടെ ഭാഗത്ത് നിന്നും നടക്കുന്നത്.

അതേസമയം പുതുപ്പള്ളിയില്‍ പാര്‍ട്ടിക്ക് പുറത്തുനിന്നുള്ള ആളെ മത്സരിപ്പിക്കുമെന്ന അഭ്യൂഹം തള്ളി മണ്ഡലത്തിന്റെ ചുമതലയുള്ള മന്ത്രി വി.എന്‍.വാസവന്‍. സ്ഥാനാര്‍ഥിയാകാന്‍ പറ്റിയവര്‍ മുന്നണിയിലുണ്ടെന്നും അസംതൃപ്തരെ തിരയേണ്ട ആവശ്യം എല്‍ഡിഎഫിനില്ലെന്നും മന്ത്രി പറഞ്ഞു.

രാഷ്ട്രീയ പോരാട്ടത്തിനാണ് എല്‍ഡിഎഫ് ശ്രമിക്കുന്നത്. എല്‍ഡിഎഫ് സ്ഥാനാര്‍ഥിയായി ഒരു പേരും ഇതുവരെ ചര്‍ച്ച ചെയ്തിട്ടില്ല. ശനിയാഴ്ച സ്ഥാനാര്‍ഥിയെ പ്രഖ്യാപിക്കും. സെക്രട്ടറിയേറ്റും മണ്ഡലം കമ്മിറ്റിയും ചേര്‍ന്നശേഷമാകും പ്രഖ്യാപനം. പുതുപ്പള്ളി ശക്തമായ സംഘടനാ അടിത്തറയുള്ള മണ്ഡലമാണെന്നും വാസവന്‍ പറഞ്ഞു.

പുതുപ്പള്ളിയില്‍ വന്‍ രാഷ്ട്രീയ നീക്കത്തിന് എല്‍ഡിഎഫ് ഒരുങ്ങുന്നെന്ന് അഭ്യൂഹം പുറത്തുവന്നിരുന്നു. കോണ്‍ഗ്രസ് നേതാവിനെ മത്സരിപ്പിക്കാനാണ് നീക്കം നടക്കുന്നതെന്നായിരുന്നു പ്രചാരണം.

ഉമ്മന്‍ ചാണ്ടി ദീര്‍ഘ കാലം എംഎല്‍എ ആയിരുന്ന മണ്ഡലത്തില്‍ മകന്‍ ചാണ്ടി ഉമ്മനെയാണ് യുഡിഎഫ് മത്സരിപ്പിക്കുന്നത്. സഹതാപ തരംഗവും ഭരണവിരുദ്ധ വികാരവും വോട്ടാകുമെന്നാണ് യുഡിഎഫ് പ്രതീക്ഷിക്കുന്നത്. ഇതിന് തടയിടാനാണ് എല്‍ഡിഎഫ് ശ്രമിക്കുന്നത്. ജയ്ക് സി. തോമസ് അടക്കം മൂന്ന് സിപിഎം നേതാക്കളുടെ പേരു പാര്‍ട്ടി പരിഗണിച്ചിരുന്നു.

ഇതിനിടെയാണ്പുതുപ്പള്ളിയില്‍ വന്‍ രാഷ്ട്രീയ നീക്കത്തിന് എല്‍ഡിഎഫ് ശ്രമിക്കുന്നത്. കോട്ടയം ജില്ലാ പഞ്ചായത്ത് അംഗമായ നേതാവിനെയാണ് പരിഗണിക്കുന്നതെന്നാണ് സൂചന.

ഇടത് സ്വതന്ത്ര സ്ഥാനാര്‍ഥിയായി ഇദ്ദേഹത്തെ നിര്‍ത്താനാണ് നീക്കം. അതേസമയം സിപിഎം കേന്ദ്രങ്ങള്‍ ഇക്കാര്യം നിഷേധിച്ചു. സിപിഎം ചിഹ്നത്തില്‍ തന്നെ മത്സരമുണ്ടാകുമെന്ന് പാര്‍ട്ടി വൃത്തങ്ങള്‍ വ്യക്തമാക്കി.

അതേസമയം പരിഭ്രമം കൊണ്ടാണ് കോണ്‍ഗ്രസ് പെട്ടെന്നു സ്ഥാനാര്‍ഥിയെ തീരുമാനിച്ചതെന്ന് സിപിഎം സംസ്ഥാന കമ്മിറ്റി അംഗം കെ. അനില്‍കുമാര്‍ പറഞ്ഞു. പുതുപ്പള്ളി സീറ്റിനായി കൂടുതല്‍ പേര്‍ രംഗത്തു വരുമെന്ന ഭയമാണ്, തിരഞ്ഞെടുപ്പു പ്രഖ്യാപിച്ചതിനു തൊട്ടുപിന്നാലെ സ്ഥാനാര്‍ഥിയെ പ്രഖ്യാപിക്കാന്‍ കാരണമെന്ന് അനില്‍ കുമാര്‍ പറഞ്ഞു. ജീവിച്ചിരുന്ന കാലത്ത് ഉമ്മന്‍ ചാണ്ടിക്കെതിരെ ആക്ഷേപമുന്നയിക്കാത്ത ഏതു നേതാവാണ് കോണ്‍ഗ്രസിലുള്ളതെന്നും അനില്‍ കുമാര്‍ ചോദിച്ചു.