മുതലപ്പൊഴിയില്‍ വീണ്ടും അപകടം. കടലില്‍ വീണ മത്സ്യത്തൊഴിലാളിയെ  രക്ഷപ്പെടുത്തി.പൂന്തുറ സ്വദേശി ജോണ്‍സനാണ് പരിക്കേറ്റത്. ഇയാളെ ആശുപത്രിയിലേക്ക് മാറ്റി.


പരിക്ക് ഗുരുതരമല്ലെന്നാണ് വിവരം. ഇന്ന് രാവിലെയാണ് അപകടമുണ്ടായത്. ശക്തമായ തിരയില്‍പ്പെട്ട് വള്ളം ആടിയുലഞ്ഞതോടെ മത്സ്യതൊഴിലാളി കടലില്‍ പതിക്കുകയായിരുന്നു. ഒപ്പമുണ്ടായിരുന്ന മത്സ്യതൊഴിലാളികള്‍ ചേര്‍ന്നാണ് ഇയാളെ രക്ഷപെടുത്തിയത്.

അതേസമയം മുതലപ്പൊഴിയിലെ അപകടത്തിന് കാരണം നിര്‍മാണത്തിലെ അപാകതയെന്ന് ഫിഷറീസ് മന്ത്രി സജി ചെറിയാന്‍. അപകടം ഒഴിവാക്കാന്‍ അടിയന്തര നടപടികള്‍ തുടങ്ങിയെന്നും മന്ത്രി നിയമസഭയില്‍ . അപകടമുണ്ടായാല്‍ ഉടനെ ആളുകളെ രക്ഷപെടുത്താന്‍ വേണ്ട നടപടികള്‍ സ്വീകരിച്ചിട്ടുണ്ട്.

എട്ട് പേരാണ് രക്ഷാപ്രവര്‍ത്തനത്തിന് നേരത്തേ ഇവിടെ ഉണ്ടായിരുന്നത്. ഇത് 30 ആയി ഉയര്‍ത്തി. 10 പേര്‍ വീതം മുഴുവന്‍ സമയത്തും ഇവിടെ രക്ഷാപ്രവര്‍ത്തനത്തിന് ഉണ്ടാകും. മൂന്ന് ബോട്ടുകളും ആംബുലന്‍സും 24 മണിക്കൂറും രക്ഷാപ്രവര്‍ത്തനത്തിനായി സജ്ജീകരിച്ചിട്ടുണ്ട്.