കെഎസ്ആര്‍ടിസി സിറ്റി സര്‍ക്കുലറിന്റെ ഭാഗമായി 60 ഇലക്ട്രിക് ബസ് കൂടി ശനി മുതല്‍ നിരത്തില്‍. ഇതോടെ ഇലക്ട്രിക് ബസുകളുടെ എണ്ണം 110 എണ്ണമാകും. ഇ ബസുകളുടെയും പുതിയ ഹൈ ബ്രിഡ് ബസുകളുടെയും ഫ്ളാഗ് ഓഫും മാര്‍ഗദര്‍ശി ആപ് ഉദ്ഘാടനവും ഇന്ന് പകല്‍ 3.30ന് ചാല ഗവ. മോഡല്‍ ബോയ്സ് സ്‌കൂള്‍ ഗ്രൗണ്ടില്‍ മുഖ്യമന്ത്രി പിണറായി വിജയന്‍ നിര്‍വഹിക്കും.

62 ബസുകളാണ് ഒമ്പത് റൂട്ടുകളില്‍ സിറ്റി സര്‍ക്കുലര്‍ സര്‍വീസ് നടത്തുന്നത്. ഇതിലുള്ള 12 ഡീസല്‍ എന്‍ജിന്‍ ഇനി നഗരത്തിന് പുറത്തേക്കുള്ള റേഡിയല്‍ സര്‍വീസിനായി ഉപയോഗിക്കും. നാലു റൂട്ടുകളിലായി ഇന്‍ഡിഗോ (നമ്പര്‍10), ഗോള്‍ഡ് (11), ഒലിവ് (12), സിയാന്‍ (13) എന്നിങ്ങനെ സര്‍വീസ് നടത്തും.

ഒരു സ്ഥലത്തുനിന്ന് പുറപ്പെട്ട് അതേ വഴി തന്നെ തിരിച്ച് സര്‍വീസ് ആരംഭിച്ച സ്ഥലത്തേക്ക് വരുന്നതാണ് പോയിന്റ് ടു പോയിന്റ് സര്‍വീസ്. ഇത് തിരിച്ചറിയാനുള്ള എംബ്ലവും പുറത്തിറക്കി.

മാറിക്കയറി യാത്ര ചെയ്യാനായി സാധിക്കുന്ന ഇന്റര്‍ ചെയ്ഞ്ച് സ്റ്റോപ്പും അവതരിപ്പിക്കും. കെഎസ്ആര്‍ടിസി ബസ് സ്റ്റോപ്പ് തിരിച്ചറിയാനായി സഹായിക്കുന്ന എംബ്ലം പതിച്ച ബോര്‍ഡുകളും സ്ഥാപിക്കുകയും ചെയ്യും.