സംശയ രോഗത്താല്‍ ഭാര്യയെ വിളക്ക് കൊണ്ട് കുത്തിയും തലക്കടിച്ചും കൊലപ്പെടുത്തിയ വര്‍ക്കല നിഖിത കൊലക്കേസ് പ്രതി പ്രവാസി അ നീഷ് എന്ന അമ്പുവിനെ ജയിലില്‍ നിന്ന് പേരൂര്‍ക്കട മെന്റല്‍ ഹെല്‍ത്ത് സെന്ററിലേയ്ക്ക് മാറ്റിയതായി ജയില്‍ സൂപ്രണ്ട് തലസ്ഥാന വിചാരണ കോടതിയില്‍ റിപ്പോര്‍ട്ട് സമര്‍പ്പിച്ചു. തിരുവനന്തപുരം അഞ്ചാം അഡീ. ജില്ലാ സെഷന്‍സ് കോടതി മുമ്പാകെയാണ് പൂജപ്പുര സെന്‍ട്രല്‍ ജയില്‍ സൂപ്രണ്ട് പ്രതിയെ ഹാജരാക്കാതെയുള്ള റിമാന്റ് വാറണ്ട് റിപ്പോര്‍ട്ട് സഹിതം ഹാജരാക്കിയത്. ജയില്‍ ഡോക്ടറുടെ പരിശോധനയില്‍ മാനസിക പ്രശ്‌നങ്ങള്‍ കണ്ടെത്തിയതിന്റെ വെളിച്ചത്തില്‍ ഡോക്ടറുടെ നിര്‍ദേശപ്രകാരം മാനസിക ആരോഗ്യ കേന്ദ്രത്തില്‍ കിടത്തി ചികിത്സക്കായി അഡ്മിറ്റ് ചെയ്ത് ഐ.പി.നമ്പരായി കഴിയുന്നതായാണ് ജയില്‍ സൂപ്രണ്ട് കോടതിയില്‍ ഹാജരാക്കിയ റിപ്പോര്‍ട്ടില്‍ പറയുന്നത്.
തുടര്‍ന്ന് ജാമ്യം നിരസിക്കപ്പെട്ട് ജയിലില്‍ കഴിയുന്ന പ്രതി അമ്പുവിന്റെ റിമാന്റ് സെപ്റ്റംബര്‍ 12 വരെ കോടതി ദീര്‍ഘിപ്പിച്ചു. അമ്പുവിനെ ഹാജരാക്കാന്‍ കഴിഞ്ഞ ദിവസം കോടതി ഉത്തരവിട്ടിരുന്നു. 2022 സെപ്റ്റംബര്‍ 6 വെളുപ്പിന് 2 മണിക്കാണ് നാടിനെ ഞെട്ടിച്ച കൊലപാതക സംഭവം നടന്നത്.പുലര്‍ച്ചെ വര്‍ക്കല അയന്തിയിലെ അനീഷിന്റെ വീട്ടിലായിരുന്നു ദാരുണമായ കൃത്യം നടന്നത്.

2022 ജൂലായ് എട്ടാം തീയതിയാണ് നിഖിതയും അനീഷും വിവാഹിതരായത്. വിവാഹത്തിന് ശേഷം ഇരുവരും വിദേശത്തേക്ക് പോയി. പത്തുദിവസം മുമ്ബാണ് നവദമ്ബതിമാര്‍ നാട്ടില്‍ തിരിച്ചെത്തിയത്. അനീഷിന്റെ കാലിന് പരിക്കേറ്റതിനാല്‍ ഇതിന്റെ ചികിത്സയ്ക്കായാണ് ഇരുവരും നാട്ടില്‍ വന്നത്. എന്നാല്‍ ദമ്ബതിമാര്‍ക്കിടയില്‍ വഴക്കും തര്‍ക്കവും ഉണ്ടായിരുന്നതായാണ് വിവരം.

അനീഷിന് ഭാര്യയെക്കുറിച്ചുണ്ടായിരുന്ന സംശയമാണ് വഴക്കിന് കാരണമായിരുന്നത്. സെപ്റ്റംബര്‍ 5 തിങ്കളാഴ്ച രാത്രിയിലും ദമ്ബതിമാര്‍ തമ്മില്‍ വഴക്കുണ്ടായിരുന്നു. ഇതിനു പിന്നാലെയാണ് ചൊവ്വാഴ്ച പുലര്‍ച്ചെ അനീഷ് ഭാര്യയെ കൊലപ്പെടുത്തിയത്.

നിലവിളക്ക് കൊണ്ട് തലയ്ക്കടിച്ചും വയറില്‍ കുത്തിയുമാണ് അനീഷ് ഭാര്യയെ ആക്രമിച്ചതെന്നാണ് പ്രാഥമിക വിവരം. ഗുരുതരമായി പരിക്കേറ്റ നിഖിതയെ ഉടന്‍തന്നെ വര്‍ക്കല താലൂക്ക് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. പിന്നാലെ അനീഷിനെ പോലീസ് കസ്റ്റഡിയിലെടുക്കുകയും അറസ്റ്റ് രേഖപ്പെടുത്തുകയും ചെയ്തു. സംഭവസമയം അനീഷിന്റെ വീട്ടില്‍ മറ്റു കുടുംബാംഗങ്ങളും ഉണ്ടായിരുന്നതായാണ് വിവരം.