വീട്ടമ്മയുടെ ചിത്രം മോര്‍ഫ് ചെയ്ത് നഗ്ന ചിത്രമാക്കി സോഷ്യല്‍ മീഡിയയില്‍ പ്രചരിപ്പിച്ചതിന് യുവതിയുടെ അടുത്ത ബന്ധുവായ തിരുവനന്തപുരം മെഡിക്കല്‍ കോളേജ് ആശുപത്രിയിലെ ഡെന്റല്‍ വിഭാഗം ഡോക്ടറും സീരിയല്‍ നടനുമടക്കം 3 പേര്‍ക്കെതിരെ പോലീസ് കുറ്റപത്രം സമര്‍പ്പിച്ചു. തിരുവനന്തപുരം രണ്ടാം ജുഡീഷ്യല്‍ ഫസ്റ്റ് ക്ലാസ്സ് മജിസ്‌ട്രേട്ട് കോടതിയിലാണ് സിറ്റി ഫോര്‍ട്ട് പൊലീസ് കുറ്റപത്രം സമര്‍പ്പിച്ചത്.

ഡോ.സുബു(40), സീരിയല്‍ നടന്‍ നെടുമങ്ങാട് വാളിക്കോട് സ്വദേശി ജാസ്മീര്‍ ഖാന്‍ (36), നെടുമങ്ങാട്ട് മൊബൈല്‍ കട നടത്തുന്ന വേങ്കവിള സ്വദേശി ശ്രീജിത്ത് (30) എന്നിവരാണ് 1 മുതല്‍ 3 വരെയുള്ള പ്രതികള്‍. 2020 ഒക്ടോബര്‍ 4 നാണ് പ്രതികളെ അറസ്റ്റ് ചെയ്തത്. യുവതിയുടെ ദാമ്പത്യബന്ധം തകര്‍ക്കാനാണ് ഡോക്ടര്‍ ഇപ്രകാരം പ്രവര്‍ത്തിച്ചതെന്നാണ് കേസ്.

വര്‍ക്കല സ്വദേശിയായ യുവതി നല്‍കിയ പരാതിയിലായിരുന്നു കേസ്. യുവതിയുടെ അമ്മയുടെ സഹോദരിയുടെ മകനാണ് ഡോ.സുബു. യുവതിയുടെ ചിത്രം ഇയാള്‍ മോര്‍ഫ് ചെയ്യാനായി സുഹൃത്തും രണ്ടാം പ്രതിയുമായ ജാസ്മീര്‍ ഖാന് നല്‍കി. ഇയാളുടെ സുഹൃത്താണ് മൂന്നാം പ്രതി ശ്രീജിത്ത്. മൊബൈല്‍ കടയില്‍ പുതിയ സിം എടുക്കാനെത്തിയ വട്ടപ്പാറ സ്വദേശിയുടെ തിരിച്ചറിയല്‍ രേഖകള്‍ ഉപയോഗിച്ച് ശ്രീജിത്ത് പുതിയ സിം എടുത്തു. അതിലൂടെ മോര്‍ഫ് ചെയ്ത ചിത്രങ്ങള്‍ യുവതിയുടെ ഭര്‍ത്താവിന്റെയും ബന്ധുക്കളുടെയും വാട്സാപ്പ് നമ്പരുകളിലേക്ക് അയച്ച് ഭീഷണിപ്പെടുത്തിയെന്നാണ് കേസ്.
മൊബൈല്‍ ഫോണ്‍ കമ്പനിയുടെയും സൈബര്‍ സെല്ലിന്റെയും സഹായത്തോടെയാണ് ശ്രീജിത്തിനെ പിടികൂടിയത്. തുടര്‍ന്ന് നടത്തിയ അന്വേഷണത്തിലാണ് മറ്റു പേരെ അറസ്റ്റ് ചെയ്തത്. യുവതിയുടെ ദാമ്പത്യബന്ധം തകര്‍ക്കാനാണ് സുബു ഈ ക്രൂരത കാട്ടിയതെന്ന് പൊലീസ് കുറ്റപത്രത്തില്‍ പറയുന്നു. പൊലീസ് സ്റ്റേഷനുകളില്‍ പരാതി നല്‍കാനും മൊഴി നല്‍കാനുമെല്ലാം വീട്ടമ്മയോടൊപ്പം എത്തിയതും സുബുവായിരുന്നു.
അതിനിടെ ജാസ്മീര്‍ ഖാനെതിരെ ഗുരുതര ആരോപണവുമായി ഭാര്യ സജ്‌നയും രംഗത്തെത്തി. തന്നോട് പിണങ്ങി മറ്റൊരു സ്ത്രീയോടൊപ്പം കഴിയുന്ന ഇയാളില്‍ നിന്നു വിവാഹ മോചനം നേടാന്‍ ആറ്റിങ്ങല്‍ കോടതിയില്‍ കേസ് നടക്കുന്നുണ്ടെന്ന് ഫോര്‍ട്ട് സ്റ്റേഷനില്‍ വച്ച് സജ്‌ന മാദ്ധ്യമങ്ങളോട് പറഞ്ഞു. നെടുമങ്ങാട് ഓപ്റ്റിക്കല്‍സ് കട നടത്തുന്ന ജാസ്മീര്‍ഖാന്‍ ഏതാനും സീരിയലുകളില്‍ അഭിനയിച്ചിട്ടുണ്ട്. ഇയാള്‍ സീരിയലുകള്‍ക്ക് പണം മുടക്കിയിട്ടുമുണ്ടെന്നും പോലീസ് കേസിലുണ്ട്.