ചാണ്ടി ഉമ്മന്റെ തേരാട്ടം ആഘോഷമാക്കി യുഡിഎഫ് പ്രവര്‍ത്തകര്‍. ചാണ്ടി ഉമ്മനെ തോളിലേറ്റി പ്രവര്‍ത്തകരും...ചാണ്ടി ഉമ്മന്റെ ലീഡ് നില 40,000  കടന്നു പുതുപ്പള്ളിയില്‍ ശക്തികേന്ദ്രങ്ങളിലും തകര്‍ന്നടിഞ്ഞ് എല്‍ഡിഎഫ്. മണര്‍കാടുപോലും ഒരു ബൂത്തിലും നേ്ട്ടം കൈവരിക്കാനായില്ല.

വോട്ടെണ്ണല്‍ പുരോഗമിക്കുന്നതിനിടെ റെക്കോര്‍ഡ് ഭൂരിപക്ഷത്തില്‍ വിജയം നേടിയത് ഉമ്മന്‍ചാണ്ടിയെ അറിയിക്കാന്‍ ചാണ്ടി നേരെ എത്തിയത് പിതാവിന്റെ കല്ലറയിലേക്ക്. വീട്ടില്‍ നിന്നും കാല്‍നടയായിട്ടാണ് ചാണ്ടി പുതുപ്പള്ളി സെന്റ് ജോര്‍ജ് പള്ളിയിലെത്തിയത്. പിതാവിന്റെ കല്ലറിയിലെത്തിയ ചാണ്ടി അല്‍പനേരം കൈകൂപ്പി പ്രാര്‍ഥിച്ചു. തുടര്‍ന്ന് കല്ലറയില്‍ മുട്ടുകുത്തി മുഖം അമര്‍ത്തി ചുംബിച്ചു.

വോട്ടെണ്ണല്‍ തുടങ്ങിയപ്പോള്‍ തൊട്ട് ചാണ്ടിയുടെ മുഖം മാധ്യമങ്ങളില്‍ പ്രത്യക്ഷപ്പെട്ടിരുന്നില്ല. ഭൂരിപക്ഷം 33000 കടന്നപ്പോഴാണ് ചാണ്ടി വീടിനുള്ളില്‍ നിന്നും പുറത്തേക്കിറങ്ങിയത്. തുടര്‍ന്ന് മാധ്യമങ്ങളോടൊന്നും പ്രതികരിക്കാതെ അണികളുടെ ആവേശം ഏറ്റുവാങ്ങിയാണ് പിതാവിന്റെ കല്ലറയിലേയ്ക്ക് പോയത്.

അതേസമയം മുഖ്യമന്ത്രി പിണറായി വിജയന്‍ പ്രസംഗിച്ച ബൂത്തുകളില്‍ ചാണ്ടി ഉമ്മന് വന്‍ ലീഡെന്ന് റിപ്പോര്‍ട്ടുകളുള്ളത്. എല്‍ഡിഎഫ് സ്ഥാനാര്‍ഥി ജെയ്ക് സി. തോമസിനായി മുഖ്യമന്ത്രി പ്രസംഗിച്ച ബൂത്തുകളിലാണ് യുഡിഎഫ് സ്ഥാനാര്‍ഥി ചാണ്ടി ഉമ്മന്‍ ലീഡ് ചെയ്യുന്നത്. യുഡിഎഫിന് മുന്നൂറില്‍പ്പരം ലീഡാണ് ഇവിടങ്ങളിലുള്ളതെന്നാണ് വരുന്ന റിപ്പോര്‍ട്ടുകള്‍. സിപിഎം കോട്ടകളില്‍ ഉള്‍പ്പെടെ ചാണ്ടി ഉമ്മന്‍ ലീഡ് ഉയര്‍ത്തി. ജെയ്ക് പ്രതീക്ഷ പുലര്‍ത്തിയ മണര്‍കാട് പഞ്ചായത്തില്‍പ്പോലും എല്‍ഡിഎഫിന് ലീഡ് ഉയര്‍ത്താനായില്ല.