തൊഴിലാളികള്‍ മദ്യപിക്കുന്നതും വഴക്കിടുന്നതും മൊബൈലില്‍ പകര്‍ത്തി കെട്ടിട നിര്‍മാണ കരാറുകാരന് അയച്ചതിനെച്ചൊല്ലിയുള്ള തര്‍ക്കത്തില്‍ സുഹൃത്തുക്കളുടെ അടിയേറ്റ് തൊഴിലാളി കൊല്ലപ്പെട്ട കിളിമാനൂര്‍ ചെല്ലമണി കൊലക്കേസില്‍ പ്രതികളെ ഹാജരാക്കാന്‍ കോടതി ഉത്തരവിട്ടു. തിരുവനന്തപുരം അഞ്ചാം അഡീ. ജില്ലാ സെഷന്‍സ് കോടതിയുടേതാണുത്തരവ്.


പ്രതികള്‍ക്ക് മേല്‍ കുറ്റം ചുമത്തുന്നതിന് ഒക്ടോബര്‍ 16 ന് ഹാജരാക്കാനാണ് കോടതി ഉത്തരവ്. പ്രതികളായ എറണാകുളം പാതാളം നിവാസികളും തമിഴ്‌നാട് സ്വദേശികളുമായ മുരുകന്‍ (37), കൃഷ്ണന്‍ (38) എന്നിവരെയാണ് കിളിമാനൂര്‍ സര്‍ക്കിള്‍ ഇന്‍സ്‌പെക്ടര്‍ ഹാജരാക്കേണ്ടത്.


2020 ജനുവരി 12 ന് കിളിമാനൂരിലാണ് കേസിനാസ്പദമായ സംഭവം നടന്നത്. എറണാകുളം ഉദ്യോഗമണ്ഡല്‍ ഏലൂര്‍ ഈസ്റ്റ് പാതാളം കൊല്ലംപറമ്പില്‍ കോടത്ത് പി.ചെല്ലമണി (40) ആണ് കൊല്ലപ്പെട്ടത്. സംഭവത്തില്‍ മറ്റൊരു തൊഴിലാളിയായ വയനാട് സ്വദേശി നിധീഷ്(28) ഗുരുതര പരുക്കുകളോടെ തിരുവനന്തപുരം ഗവ. മെഡിക്കല്‍ കോളജ് ആശുപത്രിയില്‍ ചികിത്സയില്‍ കഴിഞ്ഞിരുന്നു.



കിളിമാനൂര്‍ ഗ്രാമ പഞ്ചായത്ത് ഓഫിസിനായി പുതുതായി നിര്‍മിക്കുന്ന കെട്ടിടത്തിന്റെ പൈലിങ് ശക്തി പരിശോധനയ്ക്ക് എത്തിയ ആറംഗ സംഘത്തിലെ തൊഴിലാളിയാണ് ചെല്ലമണി. ഭാര്യ കാര്‍ത്തിയും മക്കള്‍ പ്രിയങ്ക, ഹരികൃഷ്ണന്‍ എന്നിവരുമാണ്. തലയ്ക്കു പരുക്കേറ്റ് അവശനിലയില്‍ നിധീഷിനെ ജനുവരി 13 ന് രാവിലെ റോഡില്‍ കണ്ട നാട്ടുകാര്‍ വിവരം പൊലീസില്‍ അറിയിക്കുകയായിരുന്നു. പൊലീസ് പരിശോധനയിലാണ് ചെല്ലമണിയെ കൊല്ലപ്പെട്ട നിലയില്‍ ഓഫിസിനു മുന്നിലെ വരാന്തയില്‍ കണ്ടെത്തിയത്.


കൈ കൊണ്ടുള്ള ശക്തമായി അടിയേറ്റതും ചുടു കല്ലു കൊണ്ട് തലയ്‌ക്കേറ്റ ക്ഷതവുമാണ് മരണ കാരണമെന്നു പൊലീസ് കുറ്റപത്രത്തില്‍ പറയുന്നു. ചെല്ലമണിയുടെ മൂക്കിനും തലയ്ക്കും ശക്തമായ ക്ഷതമേറ്റ പാടുകളുണ്ട്. പല്ലുകള്‍ ഇളകി പോയിരുന്നു. നിധിഷീനെ പൊലീസാണ് ആശുപത്രിയില്‍ പ്രവേശിപ്പിച്ചത്.2020 ജനുവരി 10 വെള്ളിയാഴ്ചയാണ് പാതാളത്തു നിന്ന് തൊഴിലാളിസംഘം കിളിമാനൂരില്‍ എത്തിയത്. പഴയ പഞ്ചായത്ത് ഓഫിസ് കെട്ടിടം പൊളിച്ചു മാറ്റിയാണ് പുതിയ കെട്ടിടം നിര്‍മിക്കുന്നത്.


ഇതിനോടുള്ള കെട്ടിടത്തിലാണ് പഞ്ചായത്ത് ഓഫിസ് പ്രവര്‍ത്തിക്കുന്നത്. നിര്‍മാണത്തിനു ശേഷം തൊഴിലാളികള്‍ രാത്രി ഉറങ്ങുന്നതും പഞ്ചായത്ത് ഓഫിസ് വളപ്പിലെ വരാന്തയിലാണ്. ജോലി സമയത്ത് മദ്യപിക്കാന്‍ പാടില്ലെന്ന കരാറുകാരന്റെ നിര്‍ദേശം ചെല്ലമണിയും നിധിഷും ഒഴികെയുള്ളവര്‍ ലംഘിച്ചിരുന്നു. മദ്യപിക്കുന്ന രംഗം ചെല്ലമണിയുടെ മൊബൈല്‍ ഫോണില്‍ നിധീഷ് പകര്‍ത്തി എറണാകുളത്തുള്ള കരാറുകാരന്‍ രാമമൂര്‍ത്തിയ്ക്ക് വാട്‌സാപ് വഴി അയച്ചു കൊടുത്തതിലുള്ള വിരോധമാണ് കൊലപാതകത്തില്‍ കലാശിച്ചത്.

ചെല്ലമണി കരാറുകാരന്റെ ബന്ധുവാണ്. ഞായറാഴ്ച പണി ഇല്ലായിരുന്നു. അന്ന് രാവിലെ മുതല്‍ ആറു പേരും ചേര്‍ന്നു മദ്യപാനം തുടങ്ങി. രാത്രി 9.30 മണിയോടെ മദ്യപാനം തുടരുന്നതിനിടെ വാക്ക് തര്‍ക്കവും അടിപിടിയും ഉണ്ടായി. കിളിമാനൂര്‍ പൊലീസ് ഇന്‍സ്‌പെക്ടര്‍ കെ.ബി.മനോജ്കുമാര്‍ ആണ് പ്രതികളെ അറസ്റ്റ് ചെയ്തത് .