കാട്ടാനയുടെ ആക്രമണത്തില്‍ വനം വാച്ചര്‍ കൊല്ലപ്പെട്ടു...ഒപ്പമുണ്ടായിരുന്ന മൂന്നുപേര്‍ രക്ഷപ്പെട്ടത് തലനാരിഴയ്ക്ക്. പെരിങ്ങല്‍കുത്ത് ആദിവാസി ഊരിലെ ഇരുമ്പന്‍ കുമാരനാണു ( 58) മരിച്ചത്.

ഇന്നലെ വൈകുന്നേരം 4 മണിയോടെ വാഴച്ചാല്‍ റേഞ്ചിലെ പച്ചിലവളം ഒപി കെട്ടിടത്തിനു സമീപത്തു വച്ചാണു സംഭവം. ഇഞ്ചി ശേഖരിക്കാന്‍ പോയപ്പോഴാണ് ആന ആക്രമിച്ചത്. കൂടെയുണ്ടായിരുന്ന സുനില്‍, പ്രേംജിത്ത്, പ്രസാദ് എന്നിവര്‍ തലനാരിഴക്ക് ആനയില്‍ നിന്നും രക്ഷപ്പെട്ടു.

എട്ടുവര്‍ഷം മുമ്പു മീന്‍ പിടിക്കാന്‍ പോയപ്പോള്‍ കാരാംതോടു ഭാഗത്തുവച്ചു കരടിയുടെ കടിയേറ്റു കുമാരന്റെ കാലിനു പരുക്കേറ്റിരുന്നു. ഇതേ തുടര്‍ന്ന് ഓടാന്‍ കഴിയാത്ത അവസ്ഥയിലായിരുന്നു കുമാരന്‍. അതിനാല്‍ ആനയുടെ ആക്രമണം ഉണ്ടായപ്പോള്‍ ഓടി രക്ഷപെടാന്‍ സാധിച്ചില്ലെന്നാണു കൂടെയുള്ളവര്‍ നല്‍കുന്ന സൂചന. നാലുകിലോമീറ്റര്‍ വാഹനത്തിലും തുടര്‍ന്ന് ഒരുമണിക്കൂര്‍ നടന്ന ശേഷവുമാണു വനപാലകരായ രക്ഷാപ്രവര്‍ത്തകര്‍ സംഭവ സ്ഥലത്തെത്തിയത്.

പോകുന്ന വഴിയില്‍ ആനക്കൂട്ടം ഇറങ്ങിയതു രക്ഷാപ്രവര്‍ത്തനത്തെ പ്രതികൂലമായി ബാധിച്ചു. സംഭവ സ്ഥലത്തേക്കു പോയ ആംബുലന്‍സ് വാഴച്ചാല്‍ ഇരുമ്പുപാലം പരിസരത്തുവച്ചു കാട്ടാനകൂട്ടം തടഞ്ഞു. കുമാരനെ ചാലക്കുടി താലൂക്ക് ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.