വീടിന് സമീപം രാത്രി സംഘം ചേര്‍ന്നത് ചോദ്യം ചെയ്ത ഗൃഹനാഥനെ യുവാക്കള്‍ കമ്പിപ്പാരകൊണ്ട് തലയ്ക്കടിച്ച് പരിക്കേല്പിച്ച കേസില്‍ കോവളം പോലീസ് റിപ്പോര്‍ട്ട് ഹാജരാക്കാനും പ്രോസിക്യൂഷന്‍ നിലപാടറിയിക്കാനും ജില്ലാ കോടതി ഉത്തരവിട്ടു.


തിരുവനന്തപുരം പ്രിന്‍സിപ്പല്‍ ജില്ലാ സെഷന്‍സ് കോടതിയുടേതാണുത്തരവ്. ആഗസ്റ്റ് 21 മുതല്‍ റിമാന്റില്‍ കഴിയുന്ന പ്രതികളായ രാഹുല്‍ , ജിത്തു എന്നിവര്‍ സമര്‍പ്പിച്ച ജാമ്യ ഹര്‍ജിയിലാണ് കോടതി ഉത്തരവ്. ആരോപണം ഗൗരവമേറിയതാണെന്നും കൃത്യത്തില്‍ പ്രതികളുടെ പങ്കും പങ്കാളിത്തവും കേസ് റെക്കോര്‍ഡില്‍ പ്രഥമദൃഷ്ട്യാ കാണുന്നുണ്ടെന്നും അന്വേഷണം പ്രാരംഭ ഘട്ടത്തിലാണെന്നും നിരീക്ഷിച്ച്
നെയ്യാറ്റിന്‍കര ഏഴാം ജുഡീഷ്യല്‍ ഫസ്റ്റ് ക്ലാസ്സ് മജിസ്‌ട്രേട്ട് എം.മഹേഷ് ഇവരുടെ ജാമ്യഹര്‍ജികള്‍ തള്ളിയിരുന്നു.

നെയ്യാറ്റിന്‍കര കോടതി ജാമ്യഹര്‍ജി തള്ളിയപ്പോഴുണ്ടായ സാഹചര്യങ്ങളില്‍ മാറ്റമുണ്ടായെന്നും കേസ് അന്വേഷണം പ്രായോഗികമായി പൂര്‍ത്തിയായെന്നും തൊണ്ടിമുതലുകള്‍ പോലീസ് വീണ്ടെടുത്തിട്ടുണ്ടെന്നും തങ്ങളുടെ തുടര്‍ കസ്റ്റഡി യാതൊരന്വേഷണത്തിനും ഇനി ആവശ്യമില്ലായെന്നും അതിനാല്‍ ജാമ്യം അനുവദിച്ചുത്തരവുണ്ടാകണമെന്നുമാണ് ജില്ലാ കോടതിയില്‍ പ്രതികള്‍ സമര്‍പ്പിച്ച ജാമ്യ ഹര്‍ജിയില്‍ പ്രതികളുടെ ആവശ്യം.

2023 ആഗസ്റ്റ് 20 രാത്രി 11.30 ഓടെ സംഭവം നടന്നുവെന്നാണ് പ്രോസിക്യൂഷന്‍ കേസ്. കോവളം കെ.എസ് റോഡ് വേടര്‍ കോളനിയില്‍ സുധീന്ദ്രനാണ് (40) പ്രതികളുടെ കൃത്യത്തില്‍ വച്ച് പരിക്കേറ്റത്. സംഭവത്തില്‍ കെ.എസ് റോഡ് വേടര്‍ കോളനി ഒലിപ്പുവിള വീട്ടില്‍ ബേബി സദനത്തില്‍ രാഹുല്‍ പി.എ. (22) , പാറവിള വീട്ടില്‍ ജിത്തു (24), 16 കാരനായ പ്രായപൂര്‍ത്തിയാകാത്ത ആണ്‍കുട്ടി എന്നിവരെ കോവളം പൊലീസ് അറസ്റ്റുചെയ്തിരുന്നു.

കോവളം എസ്.എച്ച്.ഒ എസ്. ബിജോയ്, എസ്.ഐമാരായ എസ്.അനീഷ്‌കുമാര്‍, സുരേഷ് കുമാര്‍ എന്നിവരാണ് പ്രതികളെ പിടികൂടിയത്. 16 കാരന്‍ ഒഴികെയുള്ള രണ്ടുപേരെയാണ് കോടതി റിമാന്‍ഡ് ചെയ്തത്. 16 കാരനെ തിരുവനന്തപുരം ജുവനൈല്‍ ജസ്റ്റിസ് ബോര്‍ഡ് ചെയര്‍മാനായ തിരുവനന്തപുരം രണ്ടാം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് കോടതി പ്രൊബേഷന്‍ ഓഫീസറുടെ നിരീക്ഷണത്തില്‍ ജുവനൈല്‍ ഹോമിലേക്ക് മാറ്റി.