ഗണേശ് കുമാർ മന്ത്രിയാകുമെന്ന ചർച്ചകൾക്കിടെ സോളാറിൽ പുതിയ ട്വിസ്റ്റ്. സോളാർ വിവാദങ്ങൾക്കിടെ ആത്മകഥയുമായി കേസിലെ മുഖ്യപ്രതി സരിത എസ് നായർ. 'പ്രതി നായിക ' എന്ന പേരിലുള്ള ആത്മകഥയുടെ കവർ ഫേസ്‌ബുക്ക് പേജിലൂടെയാണ് സരിത പങ്കുവച്ചത്. 'ഞാൻ പറഞ്ഞതെന്ന പേരിൽ നിങ്ങൾ അറിഞ്ഞവയുടെ പൊരുളും പറയാൻ വിട്ടു പോയവയും' പുസ്തകത്തിലുണ്ടെന്ന് സരിതയുടെ ഫേസ്‌ബുക്ക് കുറിപ്പ്. കൊല്ലം ആസ്ഥാനമായ റെസ്‌പോൻസ് ബുക്ക് ആണ് പുസ്തകം തയാറാക്കുന്നത്.

ഒരിടവേളക്ക് ശേഷം സോളാർ വിവാദം കേരള രാഷ്ട്രീയത്തിൽ സജീവ ചർച്ചകയാകുന്നതിനിടെയാണ് കേസിലെ പ്രതിസ്ഥാനത്തുള്ള മുഖ്യപ്രതിയായ സരിത എസ് നായർ ആത്മകഥയുമായി രംഗത്ത് വരുന്നത്. ഗണേശിന്റെ മന്ത്രിസ്ഥാനം ആശങ്കയിലാകുമെന്ന റിപ്പോർട്ടുകളും എത്തി. എന്നാൽ ഇതെല്ലാം അപ്രസക്തമാക്കിയാണ് ഗണേശിനെ മന്ത്രിയാക്കാൻ സിപിഎം തയ്യാറാകുന്നത്. ഇതിന് പിന്നാലെയാണ് സരിതയുടെ ആത്മകഥാ പ്രഖ്യാപനം.

ഫേസ്‌ബുക്ക് കുറിപ്പിലാണ് താൻ ഒരു ആത്മകഥ തയ്യാറാക്കുന്നു എന്ന കാര്യം സരിത പുറത്തുവിട്ടത്. പ്രതി നായിക എന്നോ പ്രതിനായിക എന്നോ വായിക്കാവുന്ന രീതിയിലാണ് പുസ്തകത്തിന്റെ കവർ പേജ് തയ്യാറാക്കിയിരിക്കുന്നത്. നേരത്തെ സ്വപ്‌നാ സുരേഷിന്റെ ആത്മകഥ ഇടതു സർക്കാരിനെ അടിമുടി വെട്ടിലാക്കിയിരുന്നു. മുഖ്യമന്ത്രിയുടെ മുൻ പൊളിട്ടിക്കൽ സെക്രട്ടറി എം ശിവശങ്കറിനെതിരെ നിരവധി ചിത്രങ്ങളും തെളിവായി സ്വപ്‌ന പുറത്തു വിട്ടിരുന്നു. ഇതിന് സമാനമായ വെളിപ്പെടുത്തൽ സരിതയും നടത്തുമോ എന്നതാണ് നിർണ്ണായകം

റെസ്‌പോൻസ് ബുക്ക് പങ്കുവച്ച ഫെയ്‌സ് ബുക്ക് കുറിപ്പിന്റെ പൂർണ്ണ രൂപം

'പ്രതിനായിക'
സരിത എസ് നായർ
ആത്മകഥ
സരിത പറഞ്ഞതെന്ന പേരിൽ നിങ്ങൾ അറിഞ്ഞവയുടെ പൊരുളും, പറയാൻ വിട്ടു പോയവയും
റെസ്പോൺസ്
ബുക്സിലൂടെ
നിങ്ങളിലേക്ക് ...
പ്രശസ്ത ഡിസൈനർ
രാജേഷ് ചാലോട്
രൂപകൽപ്പന ചെയ്ത കവർ...
പുസ്തകത്തിന്റെ കവർ പ്രകാശനം
ചെയ്യുന്നു. എല്ലാവരുടെയും
സ്നേഹ സഹകരണങ്ങൾ
പ്രതീക്ഷിക്കുന്നു.
*പ്രതിനായിക*

അഴിമതി ആരോപണങ്ങൾ പുത്തരിയല്ലാത്ത നാടാണ് രാഷ്ട്രീയ കേരളം. എന്നാൽ അത്തരം ആരോപണത്തിൽ ഒരു പെൺ പേര് ചേർത്ത് വയ്ക്കുന്നതിന്റെ ഗുണദോഷങ്ങൾ അനുഭവിച്ചറിയുകയാണ് കഴിഞ്ഞ ഒരു ദശാബ്ദമായി പ്രബുദ്ധരെന്ന് അഹങ്കരിക്കുന്ന നമ്മൾ. രാഷ്ട്രീയ പ്രതിയോഗികൾക്ക് പരസ്പരം പ്രയോഗിക്കാൻ ലക്ഷ്യവേധിയായ ഒരു ആയുധം എന്നതിനപ്പുറം അവരും തന്റേതു മാത്രമായ സ്വപ്നങ്ങളും ലക്ഷ്യങ്ങളും ഉണ്ടായിരുന്നവരാകും.

ഒരിക്കലും ആഗ്രഹിച്ചിട്ടില്ലാത്ത മാധ്യമ ശ്രദ്ധയും കുപ്രസിദ്ധിയും അപ്രതീക്ഷിതമായി കൈവന്ന അവർക്കും പറയാനുണ്ടാവും ഇതു വരെ പറയാൻ കഴിയാതെ പോയ പലതും. ചാനൽ മുറികളിൽ വരികൾക്ക് ഇടയിലൂടെ വായിച്ച് പൊതുജന സമക്ഷം വിചാരണ ചെയ്യപ്പെട്ട പലതിന്റെയും യഥാർത്ഥ വസ്തുതകൾ. അർധസത്യങ്ങളായിരുന്നിട്ടും നമ്മൾ കണ്ണടച്ചു വിശ്വസിച്ചു പൂരിപ്പിക്കാതെ വിട്ടു പോയവയുടെ പൊരുളുകൾ.

സോളാർ കേസിലെ സിബിഐ റിപ്പോർട്ട് വാർത്തയായതോടെ വീണ്ടും രാഷ്ട്രീയ വിവാദങ്ങളിലെ ശ്രദ്ധാകേന്ദ്രമായി മാറിയിരിക്കുന്ന സരിത എസ് നായർ സ്വന്തം ജീവിത കഥ എഴുതുകയാണ്. റെസ്‌പോൺസ് ബുക്‌സ് പ്രസിദ്ധീകരിക്കുന്ന 'പ്രതിനായിക'യിൽ ഇതുവരെ പറയാത്ത വസ്തുതകളും പറഞ്ഞതായി പ്രചരിക്കുന്നവയുടെ വാസ്തവവും അവർ വെളിപ്പെടുത്തുന്നു.