ഇന്ത്യ ചന്ദ്രനില്‍ വെന്നിക്കൊടി പാറിച്ചതിന് പിന്നാലെ മറ്റൊരു മഹാത്ഭുതം ചന്ദ്രനില്‍ സംഭവിക്കുമോ എന്നാണ് ആകാംക്ഷ. ചന്ദ്രയാന്‍ ഒരിക്കല്‍ കൂടി ഉണര്‍ന്നാല്‍ അത് ചരിത്ര നേട്ടമാകും.

ചന്ദ്രനിലെ ദക്ഷിണ ധ്രുവത്തിലെ ശിവശക്തി പോയന്റില്‍ ഉറങ്ങുന്ന വിക്രം ലാന്‍ഡറും പ്രജ്ഞാന്‍ റോവറും സൂര്യ പ്രകാശം പരന്നിട്ടും ഉണര്‍ന്നില്ല. ഉണര്‍ത്താന്‍ ബാംഗ്‌ളൂരിലെ മിഷന്‍ കണ്‍ട്രോള്‍ സെന്ററില്‍ നിന്ന് ഐ.എസ്.ആര്‍.ഒ. കമാന്‍ഡുകള്‍ നല്‍കിയിട്ടും ഇരുവരും മൗനത്തിലാണ്.

ചന്ദ്രനിലെ രാത്രി തണുപ്പ് മൈനസ് 200ഡിഗ്രിയായതോടെ ഫ്രീസറില്‍ നിന്ന് പുറത്തെടുത്ത സ്ഥിതിയിലാണ് ലാന്‍ഡറും റോവറും. സൂര്യന്‍ ഉദിച്ചത് ബുധനാഴ്ചയാണെങ്കിലും വെയില്‍ചൂട് കൂടാന്‍ കാത്തിരിക്കുകയായിരുന്നു ഐ.എസ്.ആര്‍.ഒ. താപനില മൈനസ് 10ല്‍ എത്തിയതോടെയാണ് സ്‌ളീപ്പ് മോഡില്‍ നിന്ന് ഉണര്‍ത്താനുള്ള റീആക്ടിവേഷന്‍ ശ്രമം തുടങ്ങിയത്.

ഉണര്‍ത്താനുള്ള വേക്ക്അപ് സര്‍ക്കീറ്റ് ആക്ടിവേറ്റായിട്ടുണ്ട്. ഏത് നിമിഷവും ലാന്‍ഡറും റോവറും ഉണര്‍ന്ന് സിഗ്‌നല്‍ നല്‍കി തുടങ്ങുമെന്ന പ്രതീക്ഷയിലാണ് ശാസ്ത്രജ്ഞര്‍. ചൂട് കൂടുന്നത് അനുസരിച്ച് അത് എപ്പോള്‍ വേണമെങ്കിലും സംഭവിക്കാം. ബാറ്ററികള്‍ പൂര്‍ണ്ണമായും ചാര്‍ജ്ജ് ചെയ്തിട്ടുണ്ട്. ലാന്‍ഡറിലേയും റോവറിലേയും സിഗ്‌നല്‍ സംവിധാനങ്ങള്‍ക്കും ഉപകരണങ്ങള്‍ക്കും താപപ്രതിരോധ സംവിധാനങ്ങളുണ്ട്. അതാണ് പ്രതീക്ഷ നല്‍കുന്നത്. മറ്റെന്തെങ്കിലും കാരണത്താല്‍ ഉണരാതിരിക്കാന്‍ സാധ്യത 50 ശതമാനമാണ്.

ആഗസ്റ്റ് 23ന് ചന്ദ്രനിലെ ദക്ഷിണധ്രുവത്തില്‍ ഇറങ്ങിയ ലാന്‍ഡറും റോവറും ഇന്ത്യയുടേയും ഐ.എസ്.ആര്‍.ഒ.യുടേയും അഭിമാനമാണ്. സെപ്തംബര്‍ രണ്ടുവരെ ഇതെല്ലാം മികച്ച രീതിയില്‍ പ്രവര്‍ത്തിച്ചു. നൂറുകണക്കിന് ഡേറ്റയാണ് ഭൂമിയിലേക്ക് അയച്ചത്. അതെല്ലാം അപഗ്രഥിച്ചുവരികയാണ്. ചന്ദ്രനില്‍ പതിനാലുദിവസത്തെ രാത്രി തുടങ്ങിയതോടെയാണ് സെപ്തംബര്‍ രണ്ടിന് റോവറിനേയും നാലിന് ലാന്‍ഡറിനേയും സ്‌ളീപ്പ് മോഡിലാക്കിയത്. ഇതിനിടെ ലാന്‍ഡറിനെ റീസ്റ്റാര്‍ട്ട് ചെയ്ത് ഉയര്‍ത്തി 16 ഇഞ്ച് അകലെ ലാന്‍ഡ് ചെയ്യിച്ചു. രണ്ടിനെയും ഉണര്‍ത്തിയാല്‍ ചരിത്രനേട്ടമാവും. കൂടുതല്‍ ബഹിരാകാശ ദൗത്യങ്ങള്‍ക്ക് കരുത്തേകും. ഉണര്‍ത്തിയില്ലെങ്കില്‍ ഇന്ത്യയുടെ വിജയസ്മാരകങ്ങളായി ചന്ദ്രനിലെ ദക്ഷിണധ്രുവത്തിലെ ശിവശക്തി പോയന്റില്‍ അനന്തകാലം തുടരും.

ചന്ദ്രനില്‍ പകലിന് തുടക്കമായതോടെ സുഷുപ്തിയിലാണ്ട ചന്ദ്രയാന്‍ 3 ദൗത്യം വീണ്ടെടുക്കാനുള്ള ശ്രമം നടത്തിയതായി ഐഎസ്ആര്‍ഒ. എന്നാല്‍ പ്രഗ്യാന്‍ റോവറും വിക്രം ലാന്‍ഡറും സ്ലീപ്പ് മോഡ് വിട്ട് ഉണര്‍ന്നതായി സ്ഥിരീകരണമില്ല. ലാന്‍ഡറും റോവറും പ്രവര്‍ത്തനക്ഷമമായി എന്ന് കാണിക്കുന്ന സിഗ്‌നലുകള്‍ ഒന്നും തന്നെ ലഭിച്ചിട്ടില്ലെന്നും വരും ദിവസങ്ങളില്‍ ഇതിനായുള്ള ശ്രമം തുടരുമെന്നും ഐഎസ്ആര്‍ഒ എക്‌സ് പ്‌ളാറ്റ്‌ഫോമിലൂടെ അറിയിച്ചു.

ചന്ദ്രനില്‍ രാത്രി തുടങ്ങിയതോടെ സെപ്തംബര്‍ രണ്ടിനാണ് ലാന്‍ഡറിനേയും റോവറിനേയും സ്‌ളീപ്പ് മോഡിലാക്കിയത്. കഴിഞ്ഞ ദിവസം സൂര്യനുദിച്ചെങ്കിലും ലാന്‍ഡറിലെയും റോവറിലെയും സോളാര്‍ പാനലുകള്‍ പ്രവര്‍ത്തിക്കാന്‍ തക്കവണ്ണം പകലിന് ചൂടും വെളിച്ചവും കൂടാന്‍ കാത്തിരിക്കുകയായിരുന്നു ഐഎസ്ആര്‍ഒ. എന്നാല്‍ ഉടന്‍ തന്നെ ചന്ദ്രയാന്‍ മൂന്ന് പ്രവര്‍ത്തനക്ഷമമാകും എന്ന പ്രതീക്ഷയാണ് നിലവില്‍ ഐഎസ്ആര്‍ഒ പങ്കുവയ്ക്കുന്നത്.

ഭൂമിയിലെ 14 ദിവസമാണ് ചന്ദ്രനിലെ ഒരു പകല്‍, രാത്രിയും അത്രയും നീളും. ചന്ദ്രയാന്‍ 3 ഇറങ്ങിയ ദക്ഷിണധ്രുവത്തില്‍ പകല്‍ദൈര്‍ഘ്യം രണ്ടുനാള്‍ കുറയും. തണുപ്പ് കൂടുതലുമായിരിക്കും. മൈനസ് 200 ഡിഗ്രി സെല്‍ഷ്യസില്‍ താഴെയുള്ള ഈ തണുപ്പിനെ ലാന്‍ഡറിലേയും റോവറിലേയും ഉപകരണങ്ങള്‍ അതിജീവിക്കുമോ എന്ന് സംശയമുണ്ട്.എന്നാല്‍ സ്‌ളീപ്പ് മോഡിലേക്ക് മാറ്റും മുമ്പ് ലാന്‍ഡറിനെ ഓഫ് ചെയ്ത് റീസ്റ്റാര്‍ട്ട് ചെയ്തിരുന്നു. ചന്ദ്രോപരിതലത്തില്‍ നിന്ന് ഉയര്‍ത്തി വീണ്ടും സോഫ്റ്റ് ലാന്‍ഡും ചെയ്യിച്ചു. 16 ഇഞ്ച് അകലെയാണ് വീണ്ടും ഇറങ്ങിയത്. ഇതാണ് വീണ്ടും ഉണര്‍ത്താമെന്ന പ്രതീക്ഷ നല്‍കുന്നത്. ഉണര്‍ത്തിയാല്‍ ബോണസാവും. രണ്ടാഴ്ചയായിരുന്നു പ്രവര്‍ത്തന കാലാവധി. വീണ്ടും പ്രവര്‍ത്തിച്ചാല്‍ ഇതുവരെ കിട്ടിയ വിവരങ്ങള്‍ വിശകലനം ചെയ്യുമ്പോഴുണ്ടാകുന്ന സംശയങ്ങള്‍ തീര്‍ക്കാനും പുതിയ വിവരങ്ങള്‍ ലഭ്യമാക്കാനും കഴിയും.