മാധ്യമങ്ങളും രാഷ്ട്രീയക്കാരും ചേര്‍ന്നാണ് സോളാര്‍ വിഷയം  വഷളാക്കിയതെന്ന് സരിതയുടെ അഭിഭാഷകന്‍ ഫെനി ബാലകൃഷ്ണന്‍ ആരോപിച്ചു. 33 കേസുകളാണ് ചാര്‍ജ് ചെയ്തത്. എല്ലാം വഞ്ചന കേസുകള്‍ മാത്രമാണ്. നഷ്ടപരിഹാരം നല്‍കിയാല്‍ അതില്‍നിന്നെല്ലാം ഒഴിവാകാം. ഇതൊരു സാധാരണ സാമ്പത്തിക ഇടപാട് തര്‍ക്കം മാത്രമാണ്. 

'ടീം സോളാര്‍' കമ്പനി തട്ടിപ്പുകമ്പനിയാണെന്ന് കരുതുന്നില്ല. കമ്പനി രജിസ്‌ട്രേഡാണെന്നും നിയമങ്ങളെല്ലാം പാലിച്ചിട്ടുണ്ട്. കൃത്യമായി നികുതി അടയ്ക്കുന്നുണ്ടായിരുന്നതായും ഫെനി വ്യക്തമാക്കുന്നു. പണം കൈകാര്യം ചെയ്യുന്നതില്‍ സംഭവിച്ച പിഴവും ശാലുമേനോന്റെ കടന്നുവരവുമാണ് എല്ലാ കുഴപ്പങ്ങള്‍ക്കും കാരണമായതെന്നും ഫെനി ബാലകൃഷ്ണന്‍ പറയുന്നു.

'സാങ്കേതിയ വൈദഗ്ധ്യം ഉള്ളവര്‍ ടീം സോളാര്‍ കമ്പനിയില്‍ ജോലി ചെയ്യുന്നുണ്ടായിരുന്നു. അവര്‍ പലര്‍ക്കും സോളാര്‍ ഉപകരണങ്ങള്‍ സ്ഥാപിച്ചു നല്‍കിയിട്ടുമുണ്ട്. പക്ഷേ പണം കൈകാര്യം ചെയ്യുന്നതില്‍ ചുവടു പിഴച്ചു. ശാലുവും ബിജുരാധാകൃഷ്ണനും തമ്മിലുള്ള അടുപ്പമാണ് കുഴപ്പത്തിലാക്കിയതെന്നാണ്  മനസിലാക്കുന്നത്. ബിജുവാണ് ബാധ്യതകള്‍ വരുത്തിവച്ചത്. വകമാറ്റി ബിജു ശാലുവിനു പണം നല്‍കി എന്നും സരിത പറഞ്ഞു. 

കേസുകൊടുത്ത പലര്‍ക്കും പണം മടക്കി നല്‍കാന്‍ സരിത ശ്രമിച്ചിരുന്നു. ഒരാള്‍ കേസ് കൊടുത്തതിനെത്തുടര്‍ന്ന് ബാക്കിയുള്ളവരും ഓടിപ്പോയി പരാതികൊടുത്തു. അങ്ങിനെയാണ് അവര്‍ ഊരാക്കുടുക്കിലാവുന്നത്. എന്തായാലും തട്ടിപ്പിനുവേണ്ടി തുടങ്ങിയ സ്ഥാപനമല്ല -ഫെനി വ്യക്തമാക്കി.