ഒന്നരമാസം പ്രായമുള്ള ആൺകുഞ്ഞിനെ കൊലപ്പെടുത്തിയ കേസിലെ പ്രതികളെ കോടതിയിൽ ഹാജരാക്കുന്നതിനിടെ അരങ്ങേറിയത് നാടകീയ രംഗങ്ങൾ. ജീപ്പിനുള്ളിൽ വെച്ച് പ്രതികളായ ചേർത്തല സ്വദേശിനി അശ്വതി ഓമനക്കുട്ടൻ, കണ്ണൂർ സ്വദേശി പി.പി. ഷാനിഫ് എന്നിവർ കോടതിമുറ്റത്ത് നിർത്തിയിട്ട ജീപ്പിനുള്ളിൽ വെച്ച് ഏറ്റുമുട്ടുകയായിരുന്നു.

കുഞ്ഞിനെ കൊന്നതുമായി ബന്ധപ്പെട്ട കാര്യങ്ങൾ സംസാരിച്ച് ഇരുവരും വഴക്കടിക്കുകയും പിൻസീറ്റിലിരുന്ന അശ്വതി നടുഭാഗത്തെ സീറ്റിലിരുന്ന ഷാനിഫിനെ മർദിക്കുകയുമായിരുന്നു. ഷാനിഫ് തിരിച്ചടിക്കാൻ ശ്രമിക്കുകയുമായിരുന്നു. ജീപ്പിനരികിൽ നിന്നിരുന്ന പോലീസുകാർ ഇടപെട്ട് ഇത് തടയുകയായിരുന്നു.

ബുധനാഴ്ച ഉച്ചയോടെയാണ് ഇരുവരെയും കോടതിയിൽ ഹാജരാക്കിയത്. ഒന്നാം പ്രതി ഷാനിഫിനെ ആലുവ സബ് ജയിലിലേക്കും രണ്ടാം പ്രതി അശ്വതിയെ കാക്കനാട് വനിതാ സെല്ലിലേക്കും മാറ്റി. കറുകപ്പിള്ളിയിലെ ലോഡ്ജ് മുറിയിൽ വെച്ചാണ് ഇരുവരും ചേർന്ന് കുട്ടിയെ കൊലപ്പെടുത്തിയത്. ഷാനിഫ് സ്വന്തം കാൽമുട്ടിൽ കുട്ടിയുടെ തല ഇടിച്ച് തലയോട്ടി പൊട്ടിച്ചാണ് കുഞ്ഞിനെ കൊന്നതെന്നാണ് പോലീസ് കണ്ടെത്തൽ.