മുഖ്യമന്ത്രി ഉമ്മന്‍ചാണ്ടി സ്വന്തം പാര്‍ട്ടിയിലെ ആരെയോ ലക്ഷ്യമിട്ട് എയ്ത അമ്പാണ് ലാവലിന്‍ കേസിലെ പുതിയ ഹര്‍ജി എന്ന് പിണറായി വിജയന്റെ പ്രതികരണം. പുതിയ ഹര്‍ജി നല്‍കിയത് മാധ്യമങ്ങളില്‍ നിന്നാണെന്ന് മുഖ്യമന്ത്രി പറയുമ്പോള്‍ തന്നെ മാത്രമല്ല മുഖ്യമന്ത്രി ലക്ഷ്യം വയ്ക്കുന്നത്. സ്വന്തം പാര്‍ട്ടിയിലെ മറ്റാരെയോ കൂടി ലക്ഷ്യം വെക്കുന്നുണ്ടെന്നും അതിനുള്ള വൈഭവം ഉള്ളയാളാണ് മുഖ്യമന്ത്രിയെന്നും അദ്ദേഹം പറഞ്ഞു. സ്വന്തം പാര്‍ട്ടിയില്‍ ഉളളവര്‍ക്ക് മുഖ്യമന്ത്രി നല്കുന്ന പണിയായിട്ടാണ് ലാവലിന്‍ കേസിനെ പിണറായി വിജയന്‍ വിലയിരുത്തിയത്.
മാധ്യമങ്ങളിലൂടെയാണ് ഹര്‍ജി നല്‍കിയ കാര്യം അറിഞ്ഞതെന്ന മുഖ്യമന്ത്രിയുടെ പ്രസ്താവന തമാശയായി തോന്നുന്നു. ഇത് തന്നെ അത്ഭുതപ്പെടുത്തിയെന്നും പിണറായി പറഞ്ഞു. നടപടിയുടെ പിന്നില്‍ സര്‍ക്കാര്‍ ഉള്ള കാര്യം എല്ലാവര്‍ക്കും ബോധ്യപ്പെടുന്നതാണെന്നും പിണറായി പറഞ്ഞു.
ഇനി ആര് വിചാരിച്ചാലും ലാവലിന്‍ കേസ് കത്തിക്കാനാകില്ലെന്ന് പിണറായി വിജയന്‍ ഒരു ദിനപത്രത്തിന് നല്‍കിയ അഭിമുഖത്തില്‍പറഞ്ഞിരുന്നു. ഇതെല്ലാം ചീറ്റിപോയ കാര്യമാണ്. തെരഞ്ഞെടുപ്പ് വരുമ്പോള്‍ ഏതെങ്കിലും തരത്തിലുള്ള പ്രചാരണം അഴിച്ചു വിടാന്‍ കോണ്‍ഗ്രസ് ആലോചിക്കാറുണ്ട്.അതിന്റെ ഭാഗമായിട്ടേ ഇപ്പോഴത്തെ കാര്യങ്ങളേയും കാണാനാകൂ.
2006 മുതല്‍ ഇതിന്റെ നീക്കങ്ങള്‍ നടന്നിട്ടുണ്ട്. കോടതിയുടെ പരിശോധനയും തീരുമാനവും വന്ന കാര്യമാണിതെന്നും പിണറായി പ്രതികരിച്ചു.