യുവാക്കള്‍ തമ്മിലുണ്ടായ അടിപിടി കൊലപാതകത്തില്‍ കലാശിച്ചതു വക്കം ഗ്രാമത്തെയാകെ ഭീതിയിലാഴ്ത്തി. മര്‍ദനമേറ്റ ഷെബീര്‍ മരണപ്പെട്ട വാര്‍ത്തയറിഞ്ഞതോടെ സംഭവത്തിനു കാരണക്കാരായ യുവാക്കളെത്തേടി ഒരുസംഘം വക്കത്തും പരിസരപ്രദേശങ്ങളിലും സംഘടിതരായി തിരച്ചിലാരംഭിച്ചതോടെ ജനം നടുങ്ങി. വക്കം ദൈവപ്പുര ഭാഗത്ത് ആയുധങ്ങളുമായി ഒരുസംഘമെത്തി പ്രതിയെന്നു സംശയിക്കുന്ന യുവാവിന്റെ വീടിനു നേര്‍ക്ക് അക്രമമഴിച്ചുവിടാന്‍ ശ്രമിച്ചു. പൊലീസ് എത്തിയാണ് സ്ഥിതി ഗതികള്‍ ഗതികള്‍ നിയന്ത്രിച്ചത്.
അഭ്യൂഹങ്ങളില്‍ കുടുങ്ങരുതെന്നും ആക്രമണത്തിന് ഒരുങ്ങുന്നവരെപ്പറ്റി വിവരം ലഭിച്ചാലുടന്‍ പൊലീസിനെ അറിയിക്കണമെന്നും അധികൃതര്‍ മുന്നറിയിപ്പു നല്‍കിയിട്ടുണ്ട്. രണ്ടാഴ്ച മുന്‍പു കേസന്വേഷിക്കാനെത്തിയ കടയ്ക്കാവൂര്‍ എസ്‌ഐയെയും ഒപ്പമുണ്ടായിരുന്ന പൊലീസുകാരനെയും പ്രതിയായ യുവാവ് വെട്ടിപ്പരുക്കേല്‍പ്പിച്ചിരുന്നു. ്അതിന്റെ നടുക്കം മാറുംമുമ്പാണ് അടുത്ത കൊലപാതകം.
വീണ്ടും ആറംഗ അക്രമിസംഘം നടത്തിയ പേക്കൂത്തില്‍ യുവാവിന്റെ ജീവന്‍ പൊലിഞ്ഞതും ഒപ്പമുണ്ടായിരുന്ന സുഹൃത്ത് മൃഗീയ മര്‍ദനമേറ്റു മെഡിക്കല്‍ കോളജ് ആശുപത്രിയില്‍ ചികില്‍സയിലായതും വക്കം നിവാസികള്‍ക്കിടയില്‍ വല്ലാത്ത ഭയപ്പാടാണ് ഉയര്‍ത്തിയിരിക്കുന്നത്.
ഞായറാഴ്ച വൈകിട്ട് അഞ്ചര മണിയോടെ തോപ്പിക്കവിളാകം റയില്‍വേ ഗേറ്റിനടുത്തു നടന്ന അടിപിടി യുവാക്കള്‍ തമ്മിലുണ്ടായ കശപിശയായാണു നാട്ടുകാര്‍ നോക്കിക്കണ്ടത്. എന്നാല്‍ സംഭവം നടന്നു മിനിറ്റുകള്‍ക്കകം ബൈക്കില്‍ വന്ന യുവാക്കളിലൊരാള്‍ റയില്‍വേ ഗേറ്റിനു സമീപം രക്തത്തില്‍ കുളിച്ച് അബോധാവസ്ഥയില്‍ കിടക്കുന്നതായി കണ്ടെത്തിയതോടെയാണു പ്രശ്‌നം ഗുരുതരമാണെന്നു നാട്ടുകാര്‍ക്കു ബോധ്യമായത്. ഇതിനിടെ മറ്റൊരു യുവാവിനെയും ഭീകരമായി മര്‍ദനമേറ്റു ചോരവാര്‍ന്നൊഴുകുന്ന നിലയില്‍ സമീപവാസികള്‍ കണ്ടെത്തിയിരുന്നു.
ഇവിടെ വീട്ടിലുണ്ടായിരുന്ന സ്ത്രീകള്‍ക്കും കുട്ടികള്‍ക്കും നേരെ ചെറിയ അക്രമം നടന്നതായും ചിലര്‍ക്കു പരുക്കേറ്റതായും അറിയുന്നു. പൊലീസ് സമയോചിതമായി ഇടപെട്ടതുമൂലം സ്ഥലത്തു ശാന്തമായ സ്ഥിതി രാത്രിയോടെ സംജാതമായിട്ടുണ്ട്. വന്‍ പൊലീസ് സന്നാഹമാണു വക്കത്തു വിന്യസിച്ചിരിക്കുന്നത്. പൊലീസ് പട്രോളിങ്ങും ഊര്‍ജിതമാക്കിക്കഴിഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha