മന്ത്രി കെ.സി.ജോസഫിനെതിരെ ക്രിമിനല് കോടതിയലക്ഷ്യ നടപടി, നേരിട്ട് ഹാജരാകണം
സര്ക്കാരിന്റെ കേസുകള് കാര്യകക്ഷമമായി നടത്താന് കഴിയുന്നില്ലെങ്കില് അഡ്വേക്കറ്റ് ജനറലിന്റെ ഓഫീസ് അടച്ചുപൂട്ടണമെന്ന് വിമര്ശിച്ച ഹൈക്കോടതി ജസ്റ്രിസ് അലക്സാണ്ടര് തോമസിനെ 'ചായത്തൊട്ടിയില് വീണ കുറുക്കന്' എന്നു വിശേഷിപ്പിച്ച മന്ത്രി കെ.സി.ജോസഫിനെതിരെ ക്രിമിനല് കോടതിയലക്ഷ്യ നടപടി. ജോസഫിനോട് ഈ മാസം 16ന് ഹാജരാവാന് ജസ്റ്റിസുമാരായ തോട്ടത്തില് ബി രാധാകൃഷ്ണന്, സുനില് തോമസ് എന്നിവരടങ്ങിയ ഡിവിഷന് ബെഞ്ചിന്റെ നിര്ദ്ദേശം.
മന്ത്രിയുടെ പരാമര്ശത്തിനെതിരെ സി.പി.എം നേതാവ് വി.ശിവന്കുട്ടി എം.എല്.എയാണ് കോടതിയലക്ഷ്യ നടപടി ആവശ്യപ്പെട്ട് ഹൈക്കോടതിയെ സമീപിച്ചത്. പരാതിയില് നിലപാട് അറിയിക്കാന് നാലു തവണ ആവശ്യപ്പെട്ടിട്ടും അഡ്വക്കേറ്റ് ജനറല് അനുസരിച്ചില്ല. തുടര്ന്നാണ് കോടതിയലക്ഷ്യ നടപടി എടുക്കാന് ഡിവിഷന് ബെഞ്ച് ഉത്തരവിട്ടത്.
കഴിഞ്ഞ വര്ഷം ജൂലായില്, കൊടുങ്ങല്ലൂര് സ്വദേശിയായ അബ്ദു എന്നയാളുടെ മരണത്തെക്കുറിച്ച് സി.ബി.ഐ അന്വേഷണം ആവശ്യപ്പെട്ട് മാതാവ് നല്കിയ ഹര്ജി പരിഗണിക്കുമ്പോഴാണ് എ.ജിയുടെ ഓഫീസിനെ സിംഗിള്ബെഞ്ച് നിശിതമായി വിമര്ശിച്ചത്. ഹര്ജി പരിഗണിച്ചപ്പോള് നിലപാട് അറിയിക്കാന് സര്ക്കാര് അഭിഭാഷകന് കൂടുതല് സമയം ചോദിച്ചതാണ് കോടതിയെ ചൊടിപ്പിച്ചത്. സര്ക്കാരിന്റെ കേസുകളുടെ നടത്തിപ്പ് കാര്യക്ഷമമല്ല. എ.ജിയുടെ ഓഫീസ് അടച്ചുപൂട്ടുന്നതാണ് ഉചിതം. കേസുകള് സ്വകാര്യ അഭിഭാഷകരെ ഏല്പിക്കണം. ഒരു സംസ്ഥാനത്തെ ഏജീസ് ഓഫീസ് എങ്ങനെയാണ് പ്രവര്ത്തിക്കുന്നതെന്ന് തമിഴ്നാടിനെ കണ്ടു പഠിക്കണം. എ.ജിയും മറ്റും അവിടെ പോയി കണ്ടുപഠിക്കണം. മുല്ലപ്പെരിയാര് കേസ് അവര് മികച്ച രീതിയിലാണ് നടത്തുന്നത്. ഇവിടെ കോടതിക്ക് ആവശ്യമുള്ള വിവരങ്ങള് കൃത്യസമയത്തു നല്കുന്നതില് പോലും എ.ജിയുടെ ഓഫീസ് വീഴ്ച വരുത്തുന്നു. കോടതിയുടെ ഉത്തരവുകള് നടപ്പാക്കാന് മുന്കൈയെടുക്കുന്നില്ലെന്നുമായിരുന്നു ജഡ്ജിയുടെ വിമര്ശനം.
എന്നാല്, ജഡ്ജിക്കെതിരെ രൂക്ഷ വിമര്ശനമാണ് ഫേസ്ബുക്കിലൂടെ മന്ത്രി ജോസഫ് നടത്തിയത്. 'കമന്റ് പറയുന്നവരുടെ പൂര്വകാല ചരിത്രം നോക്കിയാല് അവര് പറയുന്നതില് അത്ഭുതപ്പെടാനില്ല. ചായത്തൊട്ടിയില് വീണ് രാജാവായ കുറുക്കന് അറിയാതെ ഓരിയിട്ടുപോയാല് കുറ്റം പറയാനാകുമോ' എന്നായിരുന്നു മന്ത്രിയുടെ വിവാദ പരാമര്ശം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
