ക്രൈംബ്രാഞ്ച് റിപ്പോര്ട്ട് ആഭ്യന്തര വകുപ്പ് പൂഴ്ത്തിയിട്ടില്ല, തന്റെ നിര്ദേശപ്രകാരമാണ് വിജിലന്സ് എസ്.പി. സുകേശനെക്കുറിച്ച് ക്രൈംബ്രാഞ്ച് അന്വേഷിച്ചത്
ബാര് കോഴക്കേസില് വിജിലന്സ് എസ്.പി ആര് സുകേശന് എതിരായ ക്രൈംബ്രാഞ്ച് റിപ്പോര്ട്ട് ആഭ്യന്തര വകുപ്പ് പൂഴ്ത്തിയെന്ന വാര്ത്ത അടിസ്ഥാനരഹിതമാണെന്ന് ആഭ്യന്തരമന്ത്രി രമേശ് ചെന്നിത്തല. തന്റെ നിര്ദേശപ്രകാരമാണ് വിജിലന്സ് എസ്.പി. സുകേശനെക്കുറിച്ച് ക്രൈംബ്രാഞ്ച് അന്വേഷിച്ചത്. സുകേശനെ സംശയമുണ്ടെന്ന റിപ്പോര്ട്ട് ഒക്ടോബര് ഒന്നിനാണ് ലഭിച്ചത്. എന്നാല്, സുകേശനെതിരെ നടപടിയെടുക്കണമെന്ന് റിപ്പോര്ട്ടില് നിര്ദേശമുണ്ടായിരുന്നില്ല.
റിപ്പോര്ട്ടിന്റെ അടിസ്ഥാനത്തില് സുകേശനെ ശാസിച്ചിരുന്നുവെന്നും രമേശ് ചെന്നിത്തല വ്യക്തമാക്കി. ബിജു രമേശിനൊപ്പം സര്ക്കാരിനെതിരെ ഗൂഢാലോചന നടത്തിയെന്നാരോപിക്കപ്പെടുന്ന എസ്.പി. ആര്.സുകേശനെതിരെ ക്രൈംബ്രാഞ്ച് ഒരു വര്ഷം മുമ്പ് നല്കിയ റിപ്പോര്ട്ട് ആഭ്യന്തര വകുപ്പ് പൂഴ്ത്തിവച്ചതായി ഇന്ന് ആരോപണമുയര്ന്നിരുന്നു. കെ.എം.മാണിക്ക് അനുകൂലമായേക്കാവുന്ന റിപ്പോര്ട്ടാണ് പരിഗണിക്കാതിരുന്ന വെളിപ്പെടുത്തല് വിവാദമാവുകയും ചെയ്തു.
അന്വേഷണത്തിലും നടപടികളും ഗൂഢാലോചന ഉണ്ടെന്ന് മാണി പരസ്യമായി ആരോപിച്ചിട്ടും രാജിവയ്ക്കുംവരെ ക്രൈംബ്രാഞ്ച് റിപ്പോര്ട്ട് പരിഗണിക്കപ്പെട്ടില്ലെന്നും ഒടുവില് ആഭ്യന്തരമന്ത്രിക്കും അദ്ദേഹത്തിന്റെ അതേ ഗ്രൂപ്പില്പ്പെട്ട ആരോഗ്യമന്ത്രിക്കുമെതിരെ ബിജു രമേശ് കോഴ ആരോപണം ഉന്നയിച്ചതിന് പിന്നാലെ അന്വേഷണത്തിന്റെ സാധുത ചോദ്യം ചെയ്യുന്ന പഴയ റിപ്പോര്ട്ട് പുറത്തായെന്നുമായിരുന്നു പ്രചാരണം. ഈ പശ്ചാത്തലത്തിലാണ് ആഭ്യന്തരമന്ത്രിയുടെ പ്രതികരണം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
