ഭാര്യാ പിതാവിനെ കൊലപ്പെടുത്തിയ കേസിലെ പ്രതിക്ക് ബന്ധുവിനെ കുത്തി പരുക്കേല്പ്പിച്ച കേസില് കഠിന തടവ് ശിക്ഷ
ഭാര്യാ പിതാവിനെ കൊലപ്പെടുത്തിയ കേസിലെ പ്രതിക്ക് ബന്ധുവിനെ കുത്തി പരുക്കേല്പ്പിച്ച കേസില് കഠിന തടവ് ശിക്ഷ. കട്ടപ്പന അമ്പലക്കവല സ്വദേശി പോത്തന് എന്നറിയപ്പെടുന്ന അഭിലാഷിനെ(50) ആണ് മൂന്നു വര്ഷം കഠിന തടവിന് ശിക്ഷിച്ചത്.
അയല്വാസിയും ബന്ധുവുമായ മുകുളേല് ജോയിയെ (52)കുത്തി പരിക്കേല്പിച്ച കേസിലാണ് ശിക്ഷ. തൊടുപുഴ അഡിഷണല് സെഷന്സ് ജഡ്ജ് പി.എന് സീതയാണ് ശിക്ഷാവിധി പ്രഖ്യാപിച്ചത്. 2018 ലാണ് കേസിന് ആസ്പദമായ സംഭവം നടന്നത്.
അഭിലാഷിന്റെ മാതൃസഹോദരിയുടെ പുത്രിയായ ജോയിയുടെ ഭാര്യ അഭിലാഷിനെതിരെ കേസ് നല്കിയിട്ടുണ്ടായിരുന്നു. ഇത് പിന്വലിക്കാത്തതിലുള്ള മുന്വിരോധത്തെ തുടര്ന്നാണ് അഭിലാഷ് ജോയിയെ ഭാര്യയും ഭാര്യാമാതാവും മക്കളും നോക്കി നില്ക്കെ കത്തികൊണ്ട് കുത്തി പരിക്കേല്പിച്ചത്. കേസില് പ്രോസീക്യൂഷന് എട്ട് സാക്ഷികളെ വിസ്തരിച്ചു 11 രേഖകള് സമര്പ്പിക്കുകയും ചെയ്തു.കേസില് പ്രോസീക്യൂഷനു വേണ്ടി അഡിഷണല് പ്രോസീക്യൂട്ടര് അഡ്വ. വി. എസ് അഭിലാഷ് ഹാജരായി. കട്ടപ്പന സ്റ്റേഷന് ഓഫീസര് ആയിരുന്ന സന്തോഷ് സജീവാണ് കുറ്റപത്രം സമര്പ്പിച്ചത്.
കൊലപാതകമുള്പ്പെടെ നിരവധി കേസുകളില് പ്രതിയായ പോത്തന് നിലവില് സ്വന്തം ഭാര്യാപിതാവിനെ കൊലപ്പെടുത്തിയ കേസില് ജീവപര്യന്തം ശിക്ഷ അനുഭവിച്ചു വരവെയാണ് പുതിയ ശിക്ഷ .
"
https://www.facebook.com/Malayalivartha
