പ്രമുഖ സിനിമാ-നാടക പ്രവര്‍ത്തകനും നടനുമായ മുഹമ്മദ് പുഴക്കര നിര്യാതനായി...
പ്രമുഖ സിനിമാ-നാടക പ്രവര്‍ത്തകനും നടനുമായ മുഹമ്മദ് പുഴക്കര (78) നിര്യാതനായി. മൂവാറ്റുപുഴ പുഴക്കരയില്‍ പരേതരായ കൊച്ചുമൈതീന്റെയും മറിയുമ്മയുടെയും മകനാണ്.
ആറു പതിറ്റാണ്ടിലേറെ നാടക രചയിതാവ്, നടന്‍, സംവിധായകന്‍ തുടങ്ങിയ മേഖലകളില്‍ മികവ് തെളിയിച്ച അദ്ദേഹത്തിന് കേരള സംഗീത നാടക അക്കാദമിയുടെ ഗുരുപൂജ ഉള്‍പ്പെടെ നിരവധി അവാര്‍ഡുകള്‍ ലഭ്യമായിട്ടുണ്ട്.
ബ്രിട്ടീഷ് ഭരണത്തിനെതിരെ പടനയിച്ച വീരപാണ്ഡ്യ കട്ടബൊമ്മന്‍ എന്ന കഥാപാത്രത്തെ പുഴക്കര വേദികളില്‍ അവതരിപ്പിച്ചത് നാടകപ്രേമികളായ മൂവാറ്റുപുഴയിലെ പഴയ തലമുറക്ക് ആവേശം പകരുന്ന ഓര്‍മയാണ്. കട്ടബൊമ്മന്‍ എന്ന വിളിപ്പേരുകൂടി നേടിക്കൊടുത്തു ഈ പ്രകടനം.
വിശ്വരൂപം, പര്‍വ്വസന്ധി തുടങ്ങിയവയാണ് മറ്റു നാടകങ്ങള്‍. കലിയുഗ കലാസേന, കോഴിക്കോട് മ്യൂസിക്കല്‍ തിയറ്റേഴ്‌സ്, കോഴിക്കോട് കലാ കേന്ദ്രം തുടങ്ങിയ കലാസമിതികളില്‍ പ്രവര്‍ത്തിക്കുകയും ചെയ്തിട്ടുണ്ട്. മൂവാറ്റുപുഴയിലെ കലാകാരന്മാര്‍ ചേര്‍ന്ന് രൂപവത്കരിച്ച 'കലയരങ്ങിന്റെ' സ്ഥാപകനാണ്. നിരവധി സീരിയലുകളിലും പ്രവര്‍ത്തിച്ചിട്ടുണ്ട്.
ഭാര്യ: ആമിന. മക്കള്‍: ആലിഷ, അജാസ്, ജാനിഷ്. മരുമക്കള്‍: ഷീബ, സര്‍ജു, മജീദ്. ഖബറടക്കം ഞായറാഴ്ച ഉച്ചക്ക് 12 ന് വെങ്ങല്ലൂര്‍ വലിയവീട്ടില്‍ പള്ളി ഖബര്‍സ്ഥാനില്‍ നടക്കും.
https://www.facebook.com/Malayalivartha
