മൂത്രത്തിലൂടെ പ്രോട്ടീൻ ഒലിച്ച് പോവുന്നു...!17-കാരിയുടെ വൃക്ക തകർത്ത ഇൻസ്റ്റാ കാലന്മാരെ തൂക്കും.. 3 ബോട്ടിൽ കാളകൂട വിഷം

ഇൻസ്റ്റാഗ്രാം പരസ്യങ്ങളും ഇൻഫ്ലുവൻസർമാരുടെ വീഡിയോകളും കണ്ട് ഓൺലൈൻ വഴി വാങ്ങിയ ഫെയർനെസ് ക്രീമിലെ വിഷബാധ മൂലം പതിനേഴുകാരിക്ക് ഗുരുതരമായ വൃക്കരോഗം ബാധിച്ചതായി റിപ്പോർട്ട്. ശാസ്ത്രീയ പരിശോധനയിൽ ഈ ക്രീമിൽ 1.25 ശതമാനം മെർക്കുറി അടങ്ങിയിട്ടുള്ളതായി സ്ഥിരീകരിച്ചിട്ടുണ്ട്. മുഖക്കുരുവും കരുവാളിപ്പും മാറുമെന്നും പതിനഞ്ച് ദിവസം കൊണ്ട് മുഖകാന്തി വർദ്ധിക്കുമെന്നുമുള്ള കമ്പനിയുടെ അവകാശവാദങ്ങൾ വിശ്വസിച്ചാണ് പെൺകുട്ടി ക്രീം ഉപയോഗിച്ചത്. ആരോഗ്യപ്രശ്നങ്ങൾ രൂക്ഷമായതോടെ കമ്പനിയെ വിവരം അറിയിച്ചെങ്കിലും അനുകൂലമായ പ്രതികരണം ലഭിക്കാത്ത സാഹചര്യത്തിൽ ഉപഭോക്തൃ കോടതിയെ സമീപിക്കാനുള്ള നിയമനടപടികൾക്ക് ഒരുങ്ങുകയാണ് കുടുംബം.
ഇൻസ്റ്റാഗ്രാമിൽ പ്രചരിച്ച വീഡിയോകൾ കണ്ടാണ് പെൺകുട്ടി ഓൺലൈനിൽ നിന്നും ക്രീം ഓർഡർ ചെയ്ത് നൈറ്റ് ക്രീമായി ഉപയോഗിച്ചു തുടങ്ങിയത്. ആദ്യ ബോട്ടിൽ ഉപയോഗിച്ചപ്പോൾ ചർമ്മത്തിന് മാറ്റം തോന്നിയതോടെ ഒരു വർഷത്തിനിടെ മൂന്ന് ബോട്ടിലുകളോളം കുട്ടി ഉപയോഗിച്ചു. ഇതിന് പിന്നാലെയാണ് പെൺകുട്ടിയിൽ ശാരീരിക അസ്വസ്ഥതകളും ആരോഗ്യപ്രശ്നങ്ങളും പ്രകടമായത്. തുടർന്ന് നടത്തിയ വിശദമായ വൈദ്യപരിശോധനയിലാണ് കുട്ടിയുടെ രക്തത്തിലും ശരീരത്തിലും അപകടകരമായ അളവിൽ മെർക്കുറിയുടെ സാന്നിധ്യം കണ്ടെത്തിയത്. നിയമനടപടികൾ ആരംഭിക്കുന്നതിനാലാണ് ക്രീമിന്റെ പേര് കുടുംബം നിലവിൽ പരസ്യപ്പെടുത്താത്തത്.
ശരീരത്തിലെത്തുന്ന മെർക്കുറി വൃക്കകളുടെ അരിപ്പകളെ സാരമായി ബാധിക്കുകയും, മൂത്രത്തിലൂടെ പ്രോട്ടീൻ നഷ്ടപ്പെടുന്ന 'നെഫ്രോട്ടിക് സിൻഡ്രോം' എന്ന ഗുരുതരാവസ്ഥയിലേക്ക് രോഗിയെ എത്തിക്കുകയും ചെയ്യും. ചർമ്മത്തിൽ ദിവസവും ഇത്തരം വിഷാംശം കലർന്ന ക്രീമുകൾ പുരട്ടുമ്പോൾ അവ രക്തത്തിൽ കലരുകയും, രക്തം ശുദ്ധീകരിക്കുന്ന വൃക്കകളെ ക്രമേണ തകരാറിലാക്കുകയും ചെയ്യുന്നു. അപകടകരമായ രീതിയിൽ വൃക്കകൾക്ക് തകരാർ സംഭവിച്ചതോടെ പെൺകുട്ടിക്ക് ദീർഘകാല ചികിത്സ ആവശ്യമായി വന്നിരിക്കുകയാണ്.
അതേസമയം, സമൂഹത്തിൽ നിലനിൽക്കുന്ന വർണവിവേചനത്തെയും ചർമ്മത്തിന്റെ നിറത്തെക്കുറിച്ചുള്ള തെറ്റിദ്ധാരണകളെയും ചൂഷണം ചെയ്താണ് വ്യാജ ഫെയർനെസ് ക്രീം കമ്പനികൾ വലിയ ലാഭം കൊയ്യുന്നതെന്ന് ഫുഡ് ആൻഡ് സോഷ്യൽ ആക്ടിവിസ്റ്റ് സജിൻ സുരേന്ദ്രൻ ചൂണ്ടിക്കാട്ടി. സംഭവത്തിന്റെ പശ്ചാത്തലത്തിൽ മാധ്യമങ്ങളോട് പ്രതികരിക്കുകയായിരുന്നു അദ്ദേഹം. ഇരുണ്ട നിറമുള്ളവർക്ക് സമൂഹത്തിൽ അർഹമായ സ്ഥാനമാനങ്ങൾ ലഭിക്കില്ലെന്നും അവർ മാറ്റിനിർത്തപ്പെടുമെന്നുമുള്ള സമൂഹത്തിലെ തെറ്റായ ചിന്താഗതിയാണ് ഇത്തരം കമ്പനികൾ മുതലെടുക്കുന്നത്.
പെട്ടെന്ന് വെളുക്കാനും മുഖത്തിന് അമിത തിളക്കം ലഭിക്കാനുമായി ഇത്തരം ഉൽപ്പന്നങ്ങളിൽ അപകടകരമായ അളവിൽ മെർക്കുറി ഉൾപ്പെടെയുള്ള രാസവസ്തുക്കൾ ചേർക്കുന്നുണ്ടെന്ന് അദ്ദേഹം വ്യക്തമാക്കി. സൗന്ദര്യവർധക വസ്തുക്കളിൽ അനുവദനീയമായ മെർക്കുറിയുടെ പരമാവധി അളവ് 1 പിപിഎം (1 ppm) മാത്രമായിരിക്കെ, സെൻട്രൽ ഡ്രഗ് കൺട്രോൾ ബോർഡ് നടത്തിയ പരിശോധനകളിൽ 12,000 മുതൽ 40,000 പിപിഎം വരെ മെർക്കുറി അടങ്ങിയ ക്രീമുകൾ കണ്ടെത്തിയിട്ടുണ്ട്. മെർക്കുറിക്ക് പുറമെ ലെഡ്, ആർസനിക് തുടങ്ങിയ മാരകമായ ഹെവി മെറ്റലുകളും പല സൗന്ദര്യവർധക ഉൽപ്പന്നങ്ങളിലും അടങ്ങിയിട്ടുണ്ടെന്നത് ആശങ്കാജനകമാണ്.
https://www.facebook.com/Malayalivartha

























