രാമനാട്ടുകരയില്‍ നിയന്ത്രണം വിട്ട കാര്‍ പൊലീസ് ജീപ്പില്‍ ഇടിച്ച് തലകീഴായി മറിഞ്ഞ് അപകടം. ഇന്ന് രാവിലെയാണ് അപകടുണ്ടായത്. രണ്ട് പൊലീസുകാര്‍ക്കും രണ്ട് യാത്രക്കാര്‍ക്കും പരിക്കേറ്റു. രാമനാട്ടുകര നിസരി ജംഗ്ഷനില്‍ വെച്ചാണ് അപകടമുണ്ടായത്. ഇടിയുടെ ശക്തിയില്‍ കാര്‍ തലകീഴായി മറിയുകയായിരുന്നു.

അതേസമയം മറ്റൊരു സംഭവത്തില്‍ കണ്ണൂര്‍ നഗരത്തിലെ പൊടിക്കുണ്ടില്‍ നിയന്ത്രണം വിട്ട ചെങ്കല്‍ ലോറി മരത്തിലിടിച്ച് ഡ്രൈവര്‍ക്ക് ദാരുണാന്ത്യം. തിങ്കളാഴ്ച വൈകുന്നേരം നടന്ന അപകടത്തില്‍ മലപ്പുറം കൊണ്ടോട്ടി സ്വദേശി പി ജലീലാണ് മരിച്ചത്. അപകടത്തില്‍ ലോറിയുടെ മുന്‍ ഭാഗം പൂര്‍ണമായി തകര്‍ന്നനിലയിലാണ്.

ലോറിയുടെ കാബിനില്‍ നിന്നും ജലീലിനെ പൊലിസും ഫയര്‍ ഫോഴ്‌സും പുറത്തെടുത്ത് കണ്ണൂരിലെ സ്വകാര്യ ആശുപത്രിയിലെത്തിച്ചുവെങ്കിലും ജീവന്‍ രക്ഷിക്കാനായില്ല. ലോറിയുടെ അമിത വേഗതയാണ് അപകടത്തിന് കാരണമെന്നാണ് പൊലിസിന്റെ പ്രാഥമിക നിഗമനത്തിലുള്ളത്.