പ്രശസ്ത കഥകളി മദ്ദള ആചാര്യന്‍ കലാമണ്ഡലം നാരായണന്‍ നായര്‍ ആശാന്‍ (നെല്ലൂവായ്) അന്തരിച്ചു. ഇന്ന് പുലര്‍ച്ചെ തൃശൂര്‍ അമല ആശുപത്രിയിലായിരുന്നു അന്ത്യം സംഭവിച്ചത്.

കലാമണ്ഡലം അപ്പുക്കുട്ടി പൊതുവാളുടെ ആദ്യകാല ശിഷ്യരില്‍ ചിട്ട വിടാതെയുള്ള വാദന ശൈലി ഇദ്ദേഹത്തെ മറ്റു പല മദ്ദള വിദ്വന്മാരില്‍ നിന്നും വേറിട്ട് നിര്‍ത്തിയിട്ടുണ്ടായിരുന്നു. ഇക്കഴിഞ്ഞ കോട്ടക്കല്‍ വിശ്വംഭര ക്ഷേത്ര ഉത്സവം ആയിരുന്നു അവസാനത്തെ അരങ്ങ്. പഠിപ്പിച്ചത് അപ്പുക്കുട്ടി പൊതുവാളും കൊണ്ടുനടന്ന് വളര്‍ത്തിയത് കലാമണ്ഡലം കൃഷ്ണന്‍ കുട്ടി പൊതുവാളുമായിരുന്നുവെന്ന് നാരായണന്‍ നായര്‍ എപ്പോഴും പറയുമായിരുന്നു.

കേരള കലാമണ്ഡലം അവാര്‍ഡ്, സംഗീത നാടക അക്കാദമി അവാര്‍ഡ് എന്നിവയ്ക്കൊപ്പം നിരവധി കഥകളി ക്ലബുകളുടെ അവാര്‍ഡുകളും ലഭിച്ചിട്ടുണ്ട്. അമേരിക്ക, യൂറോപ്യന്‍ രാജ്യങ്ങള്‍, ജപ്പാന്‍, ഓസ്‌ട്രേലിയ, ന്യൂസിലാന്‍ഡ് അടക്കം 50 ല്‍പ്പരം വിദേശരാജ്യങ്ങളില്‍ കലാപ്രകടനം നടത്തിയിട്ടുണ്ട്.