നിലമ്പൂരില്‍ ഇടത് സ്ഥാനാര്‍ത്ഥിക്കായി വോട്ടു തേടുന്ന സാംസ്‌ക്കാരിക പ്രവര്‍ത്തകര്‍ അധികാരത്തിന്റെ അപ്പകഷ്ണത്തിന് പിന്നാലെ പോകുന്നവരാണെന്ന് പ്രതിപക്ഷ നേതാവ് വി.ഡി സതീശന്‍. ന്യായമായ ആവശ്യങ്ങള്‍ക്ക് വേണ്ടി സമരം ചെയ്ത ആശ വര്‍ക്കര്‍മാരുടെ കണ്ണീര് കാണാത്തവരാണിവരെന്നും കുറ്റപ്പെടുത്തി.

യു.ഡി.എഫ് സ്ഥാനാര്‍ത്ഥി ആര്യാടന്‍ ഷൗക്കത്തിന് വോട്ടുതേടി കെ.പി.സി.സി സാംസ്‌ക്കാരിക വിഭാഗമായ സംസ്‌ക്കാര സാഹിതി ഒരുക്കിയ തെരുവു നാടകത്തിന്റെ ആദ്യ അവതരണം ചന്തക്കുന്ന് ബസ് സ്റ്റാന്റില്‍ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.

ജനങ്ങളെയും പാവപ്പെട്ടവരെയും പുച്ഛത്തോടെ കാണുന്ന ഇവരെ സാംസ്‌ക്കാരിക നായകരെന്ന് വിളിക്കുന്നത് തന്നെ അപമാനമാണ്. സര്‍ക്കാരിന്റെ നെറികേടുകളെ കണ്ണടച്ച് പിന്തുണക്കുകയാണിവര്‍. ഇടതുപക്ഷ നിലപാടുണ്ടായിട്ടും ആശാസമരത്തെ പിന്തുണച്ച സാഹിത്യഅക്കാദമി ചെയര്‍മാന്‍ സച്ചിദാനന്ദന്റെയും കലാമണ്ഡലം വൈസ് ചാന്‍സിലര്‍ മല്ലികാ സാരാഭായിയുടെ നിലപാടിനോടും ആദരവുണ്ട്.

ഒരു പറ്റം നല്ല മനുഷ്യരാണ് ആശ സമരത്തെ പിന്തുണച്ചത്. സ്വരാജിനെ പിന്തുണക്കുന്ന സാംസ്‌ക്കാരിക പ്രവര്‍ത്തകരുടെ കാപട്യം ജനങ്ങള്‍ കാണുന്നുണ്ട്. ജനദ്രോഹ സര്‍ക്കാരിനെ നിലമ്പൂരില്‍ ജനങ്ങള്‍ വിചാരണ നടത്തും. ജനങ്ങള്‍ക്ക് വേണ്ടി സര്‍ക്കാരിനെ വിചാരണ ചെയ്യുന്ന അഭിഭാഷകരുടെ ജോലിയാണ് പ്രതിപക്ഷം ചെയ്യുന്നതെന്നും അദ്ദേഹം വ്യക്തമാക്കി.