ശ്രീകൃഷ്ണപുരം സെന്റ് ഡൊമിനിക്‌സ് ഇംഗ്ലീഷ് മീഡിയം സ്‌കൂളിലെ ഒമ്പതാം ക്ലാസ് വിദ്യാര്‍ത്ഥിനി ആശിര്‍നന്ദയുടെ മരണത്തില്‍ ബാലവകാശ കമ്മീഷന്‍ കേസെടുത്തു. ജില്ലാ ശിശുസംരക്ഷണ സമിതി സ്‌കൂള്‍ അധികൃതരില്‍ നിന്ന് വിശദമായ റിപ്പോര്‍ട്ടും തേടിയിട്ടുണ്ട്.

തച്ചനാട്ടുകര ചോളോടുള്ള ആശിര്‍നന്ദയുടെ വീടും പഠിച്ച സ്‌കൂളും കമ്മീഷന്‍ ചെയര്‍മാന്‍ കെവി മനോജ് കുമാര്‍ സന്ദര്‍ശിച്ചു. കുട്ടികള്‍ക്ക് അനുകൂലമായ സാഹചര്യം സ്‌കൂളില്‍ വളര്‍ത്തിയെടുക്കണമെന്നും കമ്മീഷന്‍ നിര്‍ദേശിച്ചു. കുട്ടികള്‍ക്ക് ആഘാതമില്ലാത്ത രീതിയില്‍ വേണം സ്‌കൂളിന്റെ തുടര്‍പ്രവര്‍ത്തനമെന്നും കമ്മീഷന്‍ നിര്‍ദേശിച്ചു. തിങ്കളാഴ്ച കുട്ടികള്‍ സ്‌കൂളിലെത്തുമ്പോള്‍ ആവശ്യമായ ക്ലാസും കൗണ്‍സിലിംഗും നല്‍കണമെന്നും കമ്മീഷന്‍ കൂട്ടിച്ചേര്‍ത്തു. സംഭവത്തില്‍ പൊലീസില്‍ നിന്നുള്ള റിപ്പോര്‍ട്ടും ബാലാവകാശ കമ്മീഷന്‍ തേടിയിട്ടുണ്ട്.

ക്‌ളാസ് ടെസ്റ്റില്‍ ഒന്നര മാര്‍ക്ക് കുറഞ്ഞതിന് മാനസികപീഡനം നേരിട്ടതിനെ തുടര്‍ന്നാണ് ആശിര്‍നന്ദ ആത്മഹത്യ ചെയ്തത്. സംഭവത്തില്‍ കഴിഞ്ഞ ദിവസം ശക്തമായ പ്രതിഷേധം ഉണ്ടായി. ശ്രീകൃഷ്ണപുരം സെന്റ് ഡൊമിനിക്ക്‌സ് സ്‌കൂളിലേക്ക് എസ്എഫ്‌ഐ നടത്തിയ മാര്‍ച്ചില്‍ സംഘര്‍ഷമുണ്ടായി. ഇവര്‍ സ്‌കൂളിലേക്ക് തള്ളിക്കയറാന്‍ ശ്രമിച്ചത് പൊലീസ് തടഞ്ഞു.

അതിനിടെ, സംഭവത്തില്‍ വീഴ്ചപറ്റിയെന്ന് സ്‌കൂള്‍ മാനേജ്‌മെന്റ് സമ്മതിച്ചു. ആരോപണവിധേയരായ അഞ്ചുപേരെയും പുറത്താക്കി. മാര്‍ക്കിന്റെ അടിസ്ഥാനത്തില്‍ കുട്ടികളെ ഇനി ക്ലാസ് മാറ്റിയിരുത്തില്ല. കഴിഞ്ഞദിവസം പുറത്താക്കിയ പ്രിന്‍സിപ്പലിന്റെ ചുമതല വൈസ് പ്രിന്‍സിപ്പലിന് നല്‍കി.

ഇക്കഴിഞ്ഞ തിങ്കളാഴ്ചയാണ് ആശിര്‍നന്ദ ആത്മഹത്യ ചെയ്തത്. പിന്നാലെ അദ്ധ്യാപകര്‍ക്കെതിരെ ഗുരുതര ആരോപണവുമായി കുടുംബം രംഗത്തുവന്നിരുന്നു. പ്രതിഷേധം കടുത്തതോടെ ആരോപണവിധേയരായ സ്‌കൂള്‍ പ്രിന്‍സിപ്പല്‍ ഒപി ജോയിസി, അദ്ധ്യാപികമാരായ സ്‌റ്റെല്ല ബാബു, എടി തങ്കം എന്നിവരെ പുറത്താക്കിയിരുന്നു. ഇവരെ കൂടാതെ അമ്പിളി, അര്‍ച്ചന എന്നീ അദ്ധ്യാപകരെ പുറത്താക്കാന്‍ മാനേജ്‌മെന്റ് തയ്യാറായി.

ആത്മഹത്യാക്കുറിപ്പില്‍ പേരുള്ള അദ്ധ്യാപകരെ മുഴുവന്‍ പുറത്താക്കണമെന്ന് രക്ഷിതാക്കള്‍ ആവശ്യപ്പെട്ടപ്പോള്‍ അദ്ധ്യാപകരില്‍ രണ്ടുപേരെ സസ്‌പെന്‍ഡ് ചെയ്യാമെന്നാണ് മാനേജ്‌മെന്റും പിടിഎയും ആദ്യം നിലപാടെടുത്തത്. ഇത് അംഗീകരിക്കില്ലെന്ന് വിദ്യാര്‍ത്ഥി സംഘടനാ നേതാക്കളും രക്ഷിതാക്കളും അറിയിച്ചു. തുടര്‍ന്നാണ് അഞ്ചുപേരെയും പുറത്താക്കാന്‍ തയ്യാറായത്.