ബൊലീറോ ജീപ്പും പിക്കപ്പ് വാനും കൂട്ടിയിടിച്ചുണ്ടായ അപകടത്തില് രണ്ടുമരണം...അഞ്ചു പേര്ക്ക് പരുക്ക്

എം.സി റോഡില് കോട്ടയം കോടിമതയില് ബൊലീറോ ജീപ്പും പിക്കപ്പ് വാനും കൂട്ടിയിടിച്ചുണ്ടായ അപകടത്തില് രണ്ടു പേര് മരിച്ചു. ബൊലീറോ ജീപ്പിലെ യാത്രക്കാരായിരുന്ന കോട്ടയം കൊല്ലാട് കുഴക്കീല് ജെയ്മോന് ജെയിംസ് (43), കൊല്ലാട് മംഗളാലയം അര്ജുന് (19) എന്നിവരാണ് മരിച്ചത്.
വാഹനത്തിലുണ്ടായിരുന്ന ജാദവ് എന്നയാളെ കോട്ടയം മെഡിക്കല് കോളേജ് ആശുപത്രിയിലെ വെന്റിലേറ്ററില് പ്രവേശിപ്പിച്ചിരിക്കുകയാണ്. അപകടത്തില് അഞ്ചുപേര്ക്ക് പരിക്കേറ്റിട്ടുണ്ട്. തിങ്കളാഴ്ച രാത്രി 12 മണിയോടെ കോട്ടയം കോടിമതയിലായിരുന്നു സംഭവം നടന്നത്. മണിപ്പുഴ ഭാഗത്തുനിന്ന് കോട്ടയം ഭാഗത്തേയ്ക്ക് പോകുകയായിരുന്നു ബൊലീറോ ജീപ്പ്. ഈ സമയം എതിര്ദിശയില് നിന്നെത്തിയ പിക്കപ്പ് വാനുമായി ജീപ്പ് കൂട്ടിയിടിക്കുകയായിരുന്നു.
ഇടിയുടെ ആഘാതത്തില് ബൊലീറോ ജീപ്പ് പൂര്ണമായും തകര്ന്നു. പിക്കപ്പ് വാനിനും സാരമായി കേടുപാടുകള് സംഭവിച്ചു. ഓടിക്കൂടിയ നാട്ടുകാരാണ് രക്ഷാപ്രവര്ത്തനം നടത്തിയത്. അപകടവിവരം അറിഞ്ഞ് കോട്ടയത്തുനിന്ന് അഗ്നിരക്ഷാസേനാ യൂണിറ്റ് സംഘം സ്ഥലത്തെത്തി. അപകടത്തില്പ്പെട്ട ജീപ്പിനുള്ളില് പെട്ട ഡ്രൈവര് ജെയ്മോനെ ജീപ്പ് വെട്ടിപ്പൊളിച്ചാണ് പുറത്തെടുത്തത്. അഗ്നിരക്ഷാസേനയുടെ ആംബുലന്സിലും മറ്റ് ആംബുലന്സുകളിലുമായാണ് പരിക്കേറ്റവരെ കോട്ടയം മെഡിക്കല് കോളേജ് ആശുപത്രിയില് എത്തിച്ചത്.
ബൊലീറോ ജീപ്പിനുള്ളില് അഞ്ചുപേരാണ് ഉണ്ടായിരുന്നത്. രണ്ടു പേര് മരിക്കുകയും മൂന്നു പേര്ക്ക് പരിക്കേല്ക്കുകയും ചെയ്തു. പിക്കപ്പ് വാനിനുള്ളില് രണ്ടു പേരുണ്ടായിരുന്നു. രണ്ടു പേരുടെയും പരിക്ക് ഗുരുതരമല്ല. അപകടത്തെ തുടര്ന്ന് റോഡില് ഓയിലും രക്തവും പരന്നൊഴുകിയിരുന്നു. അഗ്നിരക്ഷാസേനാ സംഘം ഇത് കഴുകിക്കളഞ്ഞു. അപകടത്തെ തുടര്ന്ന് എം.സി റോഡില് ഏതാണ്ട് അരമണിക്കൂറോളം ഗതാഗത തടസ്സം നേരിട്ടു.
https://www.facebook.com/Malayalivartha

























